00:00:00 IGIHE NETWORK KN KINYARWANDA EN ENGLISH FR FRANCAIS

Abanyeshuri barwaye COVID-19 bateguriwe uburyo bazakora ibizamini bya Leta

Yanditswe na Dufitumukiza Salathiel
Kuya 11 Nyakanga 2021 saa 09:13
Yasuwe :
0 0

Minisitiri w’Uburezi, Dr Uwamariya Valentine, yatangaje ko kuri buri shuri rizakorerwaho ibizamini bisoza amashuri abanza, hateguwe icyumba cyihariye abana barwaye COVID-19 bazakoreramo.

Yabivugiye mu kiganiro yagiranye na RBA ku mugoroba wo kuri iki Cyumweru, habura amasaha make ngo ibyo bizamini bitangire gukorwa mu gitondo cyo ku wa 12 Nyakanga 2021.

Dr Uwamariya yasobanuye ko hashyizweho ahantu hihariye abatarembye muri abo barwaye bazakorera.

Ati “Hari abana bagaragayeho ubwandu bwa COVID-19 kandi ari abakandida bagomba gukora ibizamini. […] Ntawe uri mu bitaro ni cyo cyiza, bose barwariye mu ngo. Ikindi cyiyongeraho, mu mibare dufite uyu munsi nta mwana urembye.”

“Abo bana [barwaye] rero ejo bazajya ku mashuri nabo, bateganyirizwe icyumba cyihariye, habe hari umuntu wo kwa muganga, ku buryo nta mwana uzacikanwa.”

Minisitiri Uwamariya yavuze ko mbere yo gutangira ibizamini nta gikorwa cyo gupima Coronavirus giteganyijwe nk’uko byagenze mbere y’uko abanyeshuri bava ku bigo.

Mu bipimo 6.300 byari byafashwe icyo gihe hagaragayemo abanduye 73.

Abanyeshuri bazindukira mu bizamini bya Leta bisoza amashuri abanza ni 254.678.

Minisitiri Uwamariya yavuze ko aho bazakorera hateguwe kandi ibyumba bakoreramo byongerewe kugira ngo byorohe kubahiriza n’amabwiriza yo kwirinda icyorezo.

Minisitiri w’Uburezi, Dr Uwamariya Valentine, yatangaje ko kuri buri shuri rizakorerwaho ibizamini bisoza abanza, ryateguweho icyumba cyihariye abana barwaye COVID-19 bazakoreramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .