00:00:00 IGIHE NETWORK KN KINYARWANDA EN ENGLISH FR FRANCAIS

Abanyeshuri barenga 80 basoje amasomo muri Kaminuza ya Oklohama

Yanditswe na Muhonzire Sylvine
Kuya 28 Kanama 2021 saa 03:46
Yasuwe :
0 0

Abanyeshuri 84 basoje icyiciro cya ‘masters’ muri Kaminuza ya Gikristu ya Oklahama mu Rwanda, basabwa gukoresha ubumenyi bahawe mu bikorwa biteza imbere igihugu.

Iyi kaminuza ifite icyicaro muri Leta Zunze Ubumwe za Amerika, yasohoye aba banyeshuri kuri uyu wa 27 Kanama 2021, barangije kwiga ibijyanye na siyansi (Master of Science: MSc) ndetse n’imicungire y’imari (Master of Business Administration: MBA)

The New Times itangaza ko umubare munini w’abarangije ari ab’igitsina gore, aho abanyeshuri bahawe impamyabumenyi uyu munsi ari abarangije mu 2020 na 2021 kubera icyorezo cya Covid-19 cyahagaritse ibikorwa byinshi mu mwaka wa 2020.

Umuyobozi w’iyi Kaminuza mu Rwanda, Anitha Ingabe, yavuze ko yizeye ko abanyeshuri barangije muri Oklohama bajyanye ubumenyi bw’ingenzi kandi bazabukoresha neza mu kazi kabo.

Ati “Abenshi mu banyeshuri baza kwiga hano baba basanzwe bafite akazi, twizeye ko iyi mpamyabumenyi bahawe izatuma batera indi ntambwe, kandi ko ubumenyi n’indangagaciro bavanye muri porogaramu zacu bazabukoresha mu kuzana impinduka mu Rwanda.”

Uhagarariye ishami ryigisha ibijyanye n’ubucuruzi muri iyi Kaminuza, Ken Johnson, yavuze ko abanyeshuri barangije muri iri shuri baba bafite “ubumenyi mu bijyanye n’ubucuruzi, imico myiza, indangagaciro z’ubukiristu ndetse n’ubumenyi bwo guhangana ku isoko ry’umurimo bibafasha kugira ubuzima bwiza no guteza imbere igihugu.”

Mpano Paulette wahawe impamyabumenyi mu bijyanye n’ubuyobozi ndetse n’iterambere [MBA in leadership and organization development] yavuze ko urugendo rutari rworoshye kubera icyorezo cya Covid-19 ariko uburyo bafashijwe n’iri shuri ndetse n’abarimu byatumye barangiza amasomo yose.

Perezida wa Kaminuza ya Gikristu ya Oklohama ku Isi, guhera mu 2012, John deSteiguer, yashimiye abanyeshuri barangije kwiga avuga ko iyi kaminuza izakomeza kwifatanya na bo.

Ati “Muduteye ishema cyane ndetse dushaka gushimangira umubano hagati yacu namwe mukajya mu muryango w’abarangije muri Kaminuza ya Gikristu ya Oklohama.”

Iyi kaminuza yatangiye gutanga amasomo mu Rwanda mu 2012 ikoresheje ikoranabuhanga, nyuma mu 2013 yemererwa na Perezida Paul Kagame gutangira gukorera mu Rwanda ndetse impamyabumenyi za mbere mu Rwanda yazitanze mu 2014.

Abanyeshuri 84 ni bo barangije amasomo y'icyiciro cya Masters muri Kaminuza ya Oklahoma Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .