Abanyeshuri ba Kaminuza y’u Rwanda bagaragaje ubushobozi bwabo mu guhanga udushya

Yanditswe na Evariste Nsengimana
Kuya 5 Mata 2018 saa 07:39
Yasuwe :
2 0

Abanyeshuri biga muri Kaminuza mu Rwanda, bahishuriwe ko kugira ngo umuntu ahange udushya kandi tugire uruhare mu iterambere rye n’iry’igihugu bidasaba ubushobozi buhambaye, ahubwo bihera ku bintu biciriritse akora n’uwifuza kugira ibyo ahanga akabiharira umwanya uhagije.

Byagarutsweho ku wa 4 Mata 2018, ubwo Kaminuza y’u Rwanda, ishami ry’ubumenyi n’ikoranabuhanga yizihizaga umunsi ngarukamwaka wo kugaragaza udushya (Annual career day and skills exhibition), waranzwe no kugaragaza ibyahanzwe n’abanyeshuri byiganjemo ibikorwa by’ikoranabuhanga mu buhinzi, ingufu n’ibindi.

Umuyobozi wungirije wa Kaminuza y’u Rwanda ushinzwe iterambere, Dr. Charles Muligande, yagize ati “Turi hano ngo duhamye ibyo abanyeshuri bacu ba Kaminuza bashoboye gukora mu guhanga udushya nubwo bakorera ahantu bahura na byinshi bibagora. Benshi si abana b’abaherwe ku buryo babasha kubagurira ibikoresho by’ikoranabyuhanga bakoresheje kugira ngo bagere kuri utu dushya. Akenshi usanga baterateranya udufaranga duke babona nk’igice cy’abafasha kubaho ariko bakayakoresha bahanga udushya bafite mu mutwe.”

Dr. Muligande yakomeje abasobanurira ko abenshi mu bahanze udushya bitabasaba kwirirwa mu ishuri, ahubwo ko igihe cyabo bakimara aho baterateranyiriza ibikoresho, basangira ubusabusa ariko bakagera ku kintu gikomeye, anabasaba kudacibwa intege n’ababatanze guhanga kandi ko Kaminuza n’abandi bafatanyabikorwa bazakomeza kubafasha mu bushobozi bafite.

Umuyobozi ushinzwe guteza imbere ikoranabuhanga n’ikoreshwa ryaryo mu kigo cy’igihugu gishinzwe iterambere (RDB), Steve Mutabazi, yasabye abanyeshuri kugira umuco wo guhanga udushya kandi ko batabigeraho mu gihe badasoma ibitabo

Itsinda ry’abanyeshuri biga mu mwaka wa Gatatu, ryavumbuye agakoresho gashobora kugenzura abarimu n’abanyeshuri basibye n’abakererewe, batangaje ko bifuza kuzashinga ikigo gikomeye kikubaka izina mu Rwanda no hanze.

Ni agakoresho kitwa ‘Attendance system’ umwarimu n’abanyeshuri bazajya binjira bagakozamo urutoki, kakegeranya amakuru agaragagaza uko bitabiriye igihe runaka.

Asobanura umumaro wako, Muhawenayo Gideon, umwe mu bagize iryo tsinda ry’abanyeshuri barindwi bagakoze, yagize ati “Nko mu ishuri umuntu ashobora kuba arimo, umunyeshuri akandika udahari mu kwegeranya ayo makuru bikagaragara nk’aho yari ahari kandi atari ahari.”

“Ubundi ni akazi gakomeye ko kwiyandika ku mpapuro, bigatwara igihe kirekire kandi ntibibe byizewe. Twahise dutekereza tuti kuki tutakora agakoresho kabikora. Twanatekereje ku muntu ufite ikigo, si ngomba ko ahorayo buri gihe ariko afite agakoresho nk’aka akaba ashobora kumenya uko abakozi bitabira.”

Yasobanuye ko gatandukanye n’udusanzwe tumenyerewe dukoreshwa mu bigo tugaragaza igihe abakozi bagereye cyangwa baviriye ku kazi, kuko akabo kadakenera gucomekwaho imigozi ijyana amakuru ako kanya, ahubwo gashirwamo Memory Card kakabika ayo makuru, kandi kakayatanga atondetse neza.

Agakoresho gashobora kugenzura abarimu n’abanyeshuri basibye n’abakererewe kahimbwe n'abanyeshuri bo muri Kaminuza y'u Rwanda
Abayobozi berekwa uko ako gakoresho gakora
Muhawenayo Gideon, umwe mu bagize itsinda ry’abanyeshuri barindwi bakoze 'Attendance system’
Umuyobozi ushinzwe guteza imbere ikoranabuhanga n’ikoreshwa ryaryo mu kigo cy’igihugu gishinzwe iterambere (RDB), Steve Mutabazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza