Abanyeshuri ba IPRC-Musanze bavumbuye uburyo bwumisha inyama zikabikwa amezi arindwi zitarangirika

Yanditswe na Evariste Nsengimana
Kuya 26 Ukwakira 2019 saa 01:47
Yasuwe :
0 0

Hirwa Ange Julie Yvette, Nsanzumuhire Daniel na Mutuyimana Espérance basoje amasomo mu ishuri rikuru ry’ubumenyingiro (Rwanda Polytechnic), ishami rya Musanze (IPRC Musanze), bavumbuye uburyo bwihariye bwo kumisha inyama, ifu yazo ikamara amezi arindwi ibitse igifite intungamubiri zisanzwe nk’inyama mbisi.

Umushinga wabo wahembwe ibihumbi 600Frw ubwo abasaga 2300 barangije mu ishuri rikuru ry’imyuga n’ubumenyingiro bahabwaga impamyabumenyi kuri uyu wa 25 Ukwakira 2019 ariko umushinga wabo wagiye utsinda n’andi marushanwa atandukanye mu guhanga udushya.

Aba banyeshuri bize ibijyanye no gutunganya ibiribwa umushinga wo kumisha inyama zikabasha kubikwa igihe kirekire zigifite intungamubiri nk’imbisi bavuga ko bawutekereje bifite icyifuzo cy’uko uzafasha mu kurwanya ikibazo cy’imirire mibi n’igwingira mu banyarwanda.

Igenzura ryakozwe ku rwego rw’ubuzima bw’abaturage mu Rwanda DHS (2014-2015) rigaragaza ko abafite amezi 36-59 babasha gutera imbere mu gusoma, kubara, mu gihagararo no mu myitwarire ari 63%. Bivuze ko umwana umwe muri batatu mu Rwanda yari akeneye kwitabwaho byihariye.

Icyo gihe 38% by’abari munsi y’imyaka itanu bari bagwingiye. Ibyo bituma Isi ihomba abakozi bafite ubumenyi bwayifasha guhangana n’ibibazo biyugarije.

Nsanzumuhire yabwiye IGIHE ko nk’abantu bize ibijyanye no gutunganya ibiribwa, cyane cyane inyama bahise batekereza uburyo bazifashisha mu gukumira ikibazo cy’imirire mibi, bakora ifu mu nyama, yitwa AGAHOZO Beef Powder’ umuntu ateka mu biryo bisanzwe cyangwa agakoramo Potage.

Ati “Twahisemo gufata inyama. Mu by’ukuri twumvaga ari ibintu bigoye kuko nta yindi fu ikomoka ku nyama twari tuzi, dutangira kwibaza ikoranabuhanga tuzifashisha kugira ngo intungamubiri zirimo tuzigumane.”

Ibyo byatumye bazifata bazijyana muri Laboratwari y’Ikigo cy’Igihugu gishinzwe kohereza mu mahanga ibikomoka ku Buhinzi n’Ubworozi mu Rwanda (NAEB, batangira kuzigaho, batahura uburyo bwakwifashishwa mu kuziteka, bakazisya intungamubiri zikaguma mu ifu igihe kirekire.

Avuga ku gashya karimo yagize ati “Urabizi iyo utetse inyama zisanzwe, intungamubiri nyinshi zisigara mu isosi, twashatse ikoranabuhanga ryo kuziteka ariko dukoresheje umwuka kugira ngo za ntungamubiri zazo zitaza kwangirika. Dutekesha umwuka zamara gushya tukazumisha ku buryo nta ntungamubiri n’imwe ishobora gutakara mu gihe cyo guteka.”

Yasobanuye ko atari ngombwa kwirirwa uyishyira mu byuma bikonjesha kuko byongera ubuhehere bikaba byakwangiza umwimerere w’ifu n’intungamubiri isanganywe.

Avuga ku buryo bwo guteka iyo fu yagize ati “Ufata ikiyiko cyangwa bibiri by’iyi fu ugashyira mu biryo byamaze gushya biri gutogota, iminota itanu ziba zihiye ukarya. N’ubundi uba umeze nk’urimo kurya inyama kuko ziba zinahumuramo, zinaganza ibindi biryo zashyizwemo.”

Uru rubyiruko ruvuga ko rugiye gutangira kwagura uyu mushinga kugira ngo ugere ku bantu benshi ndetse ko nibamara guhabwa icyemezo cy’ubuziranenge bazatangira gukorana n’abifuza gushora imari mu bikorwa byo kurwanya imirire mibi mu gihugu.

Ikilo kimwe cy’iyi fu bagitunganya kibatwaye 4000Frw. Ifu y’izi nyama bakora ishobora kugurishwa guhera kuri 500Frw. Iyi fu ngo ishobora gufasha abantu badafite ubushobozi bwo kugura ikilo cy’inyama mbisi kubera gihenze.

Aba banyeshuri ni bamwe mu barangije muri Rwanda Polytechnic kuri uyu wa Gatanu
Ubwo bahabwaga igihembo cy'ibihumbi 600 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza