Kwamamaza

Abanyeshuri ba IPRC East bibukijwe kwizigamira no guhanga umurimo hakiri kare

Yanditswe kuya 18-09-2016 saa 20:05' na IGIHE


Mu cyumweru cy’intore mu zindi kibanziriza itangira ry’umwaka w’amashuri wa 2016-2017 mu ishuri rikuru ryigisha imyuga n’ubumenyingiro mu Ntara y’Iburasirazuba (IPRC East), abanyeshuri batojwe umuco wo gutekereza kwihangira umurimo hakiri kare ndetse no gutangira kwizigamira muri duke bafite bakiri ku ntebe y’ishuri.

Icyari kigamijwe muri iki cyumweru cy’intore mu zindi (induction week) cyasojwe kuwa 16 Nzeri 2016, ni ukugira ngo abanyeshuri bagire umuco wo kwiga bafite icyerecyezo kuko iyo bidakozwe kare umunyeshuri arangiza amasomo atazi aho yerekeza kuko aba atarizigamye, kandi ataramenye ibyo kwihangira imirimo bigatuma igihe atabonye umuha akazi amara igihe kinini mu bushomeri kandi hari uko yakagombye kwirwanaho.

Umuyobozi wa IPRC East, Ing. Ephrem Musonera, avuga ko iki gikorwa kizakemura ikibazo gikomeye cy’abanyeshuri barangiza kaminuza bakajya hanze batazi icyo bagiye kuhakora , ubuzima bukabagora, bakamara igihe bashakisha akazi bakomanga hirya no hino, bamwe bakakabona abandi bakakabura.

Abajijwe niba kwizigamira ku banyeshuri bishoboka, Musonera yagize ati ’’ Kwizigamira ku munyeshuri birashoboka....kuzigama ni umuco, ntibigombera menshi, iyo utabashije kwizigama muri duke, n’iyo ubonye menshi ntubasha kuyazigama.’’

Mu cyumweru cy’intore mu zindi, intore z’Intagamburuzwa zo mu mutwe w’Imparirwabumenyi za IPRC East, zatojwe byinshi binyuze mu biganiro bitandukanye ndetse n’ibindi bikorwa by’itorero. Muri icyo cyumweru, intore z’abanyeshuri bashya zinjijwe mu zindi ntore z’abanyeshuri basanzwe .

Bamwe mu batanze ibiganiro barimo abahagarariye amabanki ndetse n’ikigo cya BDF gitera inkunga imishinga ibyara inyungu, basobanuriye aba banyeshuri uburyo kwizigamira no guhanga imirimo bitari inzozi ahubwo ari ibintu bishoboka kandi bifatika.

Abandi batanze ibiganiro ni urubyiruko rwabashije kwihangira imirimo binyuze mu mishinga mito none ubu bakaba bageze ku rwego rushimishije ndetse banakoresha abandi.

Ubusanzwe IPRC East igizwe n’ibyiciro bitatu birimo icya kaminuza, icy’amashuri yisumbuye n’icy’amasomo y’igihe gito. Icyumweru cy’intore mu zindi kitabiriwe n’abanyeshuri biga muri kaminuza.

Marcel Rugemishongore uhagarariye abanyeshuri akaba n’intore yo ku mukondo mu ntore z’intagamburuzwa mu mutwe w’imparirwabumenyi za IPRC East, avuga ko mu gihe abanyeshuri baba badatekereje guhanga umurimo kare bituma iyo bageze hanze bibagora kuko bahugira mu gushakisha akazi bakabura bakugarizwa n’ibibazo by’ubushomeri.

Rugemishongore yemeza ko kwizigamira ku munyeshuri bishoboka kuko byose bihera ku tuntu duto.

Umwe mu binjijwe mu ntore (umunyeshuri mushya) Jolie Umutoniwase avuga ko akurikije ibiganiro bahawe ndetse n’ubuhamya bwa bamwe mu rubyiruko bihangiye imirmo bahereye ku tuntu duto, ngo na we yumva azabishobora.

Umushyitsi mukuru mu muhango wo gusoza icyumweru cy’intore mu zindi, Col Bertin Cyubahiro Mukasa uyobora ingabo mu turere twa Ngoma, Kirehe na Bugesera, yabwiye intore za IPRC East ko mu gihe bafite indangagaciro, ubushake n’icyizere nta kabuza icyerecyezo cy’iterambere ryabo bwite n’iry’igihugu muri rusange bazakigeraho.

Col Cyubahiro yavuze ko Leta yatanze amahirwe yo kwiga kuri bose, gusa ariko ngo si ko bose babona akazi muri Leta, bityo ngo bagomba guharanira kwihangira imirimo kuko bafite igihugu cyiza kiborohereza muri byose.

Uyu muyobozi w’ingabo kandi yabwiye abanyeshuri ko nubwo abanyeshuri biga mu bigo by’imyuga n’ubumenyingiro usanga bagifite amahirwe yo kubona akazi kuruta abiga ibindi, ngo ni ngombwa gutekereza kwihangira imirmo hakiri kare kuko na byo babifitiye amahirwe.

Minisiteri y’abakozi ba Leta n’umurimo mu Rwanda igaragaza ko Leta itanga akazi ku kigero cya 2% mu gihe akandi 98% gatangwa n’abikorera cyangwa kagahangwa n’abantu ku giti cyabo.

Intore zari ziteze amatwi impanuro zahabwaga n'abayobozi banyuranye
Umuyobozi wa IPRC East Dipl.Ing. Ephrem Musonera
Col Bertin Cyubahiro Mukasa yasabye aba banyeshuri kudategereza akazi ka Leta
Bacinye akadiho mu mbyino nyarwanda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved