Abanyeshuri ba Ines bashimiwe umusanzu wabo mu iterambere rya Made in Rwanda

Yanditswe na N.Kubwimana Janvière
Kuya 29 Ugushyingo 2019 saa 10:17
Yasuwe :
0 0

Abanyeshuri biga mu Ishuri Rikuru ry’Ubumenyingiro rya Ines Ruhengeri bashimiwe kuba urugero rwiza rw’ibishoboka ku guteza imbere gahunda y’ibikorerwa mu Rwanda.

Ubu butumwa babuhawe kuri uyu wa 29 Ukwakira 2019, mu muhango wo guha urubuga abanyeshuri biga muri iri shuri, aho bamurikiraga ababyeyi babo, ba rwiyemezamirimo n’abaterankunga, ibyo bagezeho.

Ni igikorwa cyanahujwe no gutangiza ku mugaragaro umwaka mushya w’amashuri 2019/2020 no kwakira indahiro z’abanyeshuri bahagarariye abandi.

Karinda Raymond wiga iby’Ubwubatsi uri mu bamuritse ibyo yagezeho binyuze mu gukora amatafari yo kubaka mu bikoresho bya pulasitiki abivanze n’umucanga, yavuze ko byose abikesha amasomo yaherewe muri Ines.

Yagize ati “ Njye na mugenzi wanjye twabonye ukuntu ibikoresho bya pulasitiki iyo bimaze gukoreshwa biteza umwanda kuko byo ntibibora. Twahisemo kujya tubitwika dukoresheje ifuru yabugenewe, ubundi tukabivanga n’umucanga tukabumbamo amatafari meza cyane. Aya matafari ashobora kubakishwa ahantu hari amazi inzu ntisenyuke kuko ntajya yinjirwa nayo.’’

Ngarukiye Jean Paul wakoze imashini yo mu bwoko bw’imodoka ivomerera imyaka yavuze ko ibikorwa byabo byibanda ku bikorerwa mu Rwanda no gukemura bimwe mu bibazo bibangamiye umuryango Nyarwanda.

Ati “Iyi mashini nayikoze nshaka gukemura ikibazo cy’abahinzi bageraga mu mpeshyi imyaka yabo ikuma kubera izuba; izakemura icyo kibazo na bimwe mu biribwa byajyaga bizamura ibiciro kubera ko tutejeje ibihagije kizakemuka.”

Umuyobozi mukuru wa Ines Ruhengeri, Padiri Hagenimana Fabien, yavuze ko uyu munsi ari umwanya mwiza wo kugaragaza ibyo abanyeshuri bagezeho babikesha ubumenyi bahawe.

Yabasabye kwita ku byo bakora kuko aribyo bizabatunga mu minsi iri imbere.

Padiri Hagenimana yabahaye inama yo kwibanda ku buhinzi bukozwe mu buryo bw’ikoranabuhanga kuko ari igice kinini gitunze Abanyarwanda bose.

Guverineri w’Intara y’Amajyaruguru, Gatabazi Jean Marie Vianney, yashimye uruhare rw’abanyeshuri mu guteza imbere ibikorerwa mu Rwanda.

Ati “Ubundi amashuri y’ubumenyingiro kera ntayo twagiraga, byatumaga duhora dutumiza ibintu mu mahanga kandi biduhenze ariko aho aziye iki kibazo kirimo gukemuka. Ibyo twabonye byakozwe n’aba banyeshuri ni urugero rwiza rw’ibigaragaza ko Made in Rwanda ishoboka. Turashima cyane uburyo Ines ibigiramo uruhare.”

Imyaka isaga itatu irashize Guverinoma y’u Rwanda itangije gahunda Made in Rwanda nk’uburyo buzafasha kugabanya umubare mwinshi w’ibitumizwa mu mahanga watumaga ubukungu bw’igihugu budindira.

Mu mezi atandatu abanza ya 2019, muri rusange ibicuruzwa byoherezwa mu mahanga byiyongereye ku gipimo cya 58.1%. Umusaruro uturutse ku byoherezwa mu mahanga wazamutse ku kigero cya 7.5% ugera kuri miliyoni $577.8, uvuye kuri miliyoni $537.3.

Ines Ruhengeri ifite abanyeshuri bagera ku 3150 barimo abasaga 130 baturutse mu bihugu bitandukanye bya Afurika, biteganyijwe ko mu mwaka utaha baziyongera bose hamwe abiga iby’ubwubatsi bakagera ku 3500.

Abanyeshuri berekanye imashini yakozwe yifashishwa mu kuvomerera imyaka
Mu rwego rwo kurwanya imyanda ya pulasitiki, abanyeshuri bihangiye umushinga wo kubumba amatafari akozwe mu mucanga na pulasitiki zashongeshejwe
Hagaragajwe imbanzirizamushinga y'imashini zikoreshwa mu guterura ibiremereye
Abanyeshuri ba Ines Ruhengeri bashimiwe umusanzu wabo mu iterambere rya Made in Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza