Abanyeshuri ba Green Hills Academy bakozwe ku mutima n’ibikorwa bya Peace and Hope Initiative

Yanditswe na Cyprien Niyomwungeri
Kuya 18 Werurwe 2017 saa 04:44
Yasuwe :
0 0

Ibikorwa by’umuryango Peace and Hope Initiative birimo gufasha abana bose kwiga, byakoze ku mutima abanyeshuri ba Green Hills Academy, biyemeza kugira uruhare mu burezi bw’abana barumuna babo barererwa mu ishuri ry’incuke ‘Kuraneza’ ryashinzwe n’uyu muryango.

Ubusanzwe abanyeshuri biga mu mwaka wa Gatanu w’amashuri yisumbuye muri Green Hills Academy, buri wa Gatanu w’icyumweru bajya kwigisha aba bana kuvugira mu ruhame n’ibindi, gusa kuri uyu wa Gatandatu tariki 18 Werurwe 2017, basize amarangi ibyumba bibiri by’amashuri byujujwe na Peace and Hope Initiative muri uyu mwaka.

Bamwe muri aba banyeshuri babwiye IGIHE ko bakozwe ku mutima n’ibikorwa by’uyu muryango byo guharanira ko abana bose cyane cyane abatishoboye bahabwa uburezi bufite ireme, na bo bakifuza kubugiramo uruhare.

Umutoni Dolice wiga mu mwaka wa Gatanu w’amashuri yisumbuye avuga ko bagize amahirwe yo kugira ubushobozi bityo na bo bagomba gufasha abatabufite kugira ngo na bo bagire amahirwe yo kwiga neza.

Yagize ati “Twaje gufasha aba banyeshuri kuko ntabwo bafite amahirwe nk’ayo dufite, twaje kubafasha kugira ngo na bo bigire mu mashuri asa neza nk’ayo natwe twigiramo, bigire ahantu hasa neza bagire ubumenyi bukwiriye abana b’u Rwanda.”

Uwitwa Umulisa Liza, yongeyeho ko amarangi basize ari bo bateranyije amafaranga bakayagura ngo bafashe barumuna babo kwiga no gukunda ishuri.

Yagize ati “Twasize amarangi kandi nitwe twayiguriye, twateranyije amafaranga ku munsi w’abakundana, tugurisha ibintu ku ishuri amafaranga tubonye tuyaguramo amarangi twaje gusiga uyu munsi.”

Bamwe mu babyeyi bafite abana bafashwa kwiga na Peace and Hope Initiative bakoze umuganda wo gutera ubusitani kugira ngo abana bazigire ahantu hafite umwuka mwiza, banakinire ahantu hasa neza.

Umubyeyi witwa Mukamana Marie Josee, urerera abana babiri muri iri shuri, yavuze ko kuba abana be biga muri iri shuri ari iby’agaciro. Yashimiye abanyeshuri ba Green Hills Academy n’Umuryango Peace and Hope Initiative bakomeje gufasha abana kwiga neza.

Umuyobozi wa Peace and Hope Initiative, Albert Musabyimana, yasobanuye ko iri shuri ryashinzwe ngo rifashe abana birirwaga bacukura imicanga, bazerera, gukura neza biga kugira ngo na bo bazagirire igihugu akamaro.

Yavuze ko igikorwa cy’abanyeshuri ba Green Hills Academy ari ikimenyetso cy’uko abantu bafite imbaraga bagomba kuzamura n’abatazifite. Yashimangiye ko bizafasha abana kwiga neza bagahabwa ireme ry’uburezi uko bikwiye.

Yagize ati “Ni igikorwa cy’agaciro kuko igihugu turimo twese tugomba gutangamo umusanzu mu mbaraga n’ubushobozi bwacu. Iyo umwana yigira ahantu heza bimushyiramo icyizere kandi kugira isuku ni isoko y’ubuzima, mu bushobozi bwacu buke twakoze iby’ibanze ariko aba bana baduteye inkunga yo kuhagira heza.”

Umuryango Peace and Hope Initiative wihaye intego yo gufasha abana bose kwiga, gutera inkunga abakuze mu mibereho yabo bamwe bakigishwa imyuga abandi bagahabwa ibikorwa binyuranye by’iterambere birimo no kubakirwa inzu.

Afite inzozi z’uburezi kuri bose

Ishuri Peace and Hope Initiative rifite abanyeshuri bagera ku 140, gusa Musabyimana avuga ko hari abandi benshi basaba kwiga ariko ntibemerwe kubera ibyumba by’amashuri, ariyo mpamvu afite umushinga wo kwagura ishuri kugira ngo ababyeyi badafite ubushobozi buhambaye bwo kujyana abana mu mashuri akomeye, babafashe.

Atangaza ko amaze kuzuza ibyumba bibiri kandi afite icyizere cy’uko n’ibindi bitanu bizaba byuzuye bitarenze mu 2018. Ibi ngo bizatuma habaho gahunda y’ubwisungane izatuma abadafite ubushobozi biga kandi umwana akazajya ahatangirira amashuri y’incuke kugeza arangije ay’abanza.

Yagize ati “Dufite umushinga wo kwigisha abana 400 barimo 200 bishyura imisanzu y’agahimbazamusyi k’abarimu n’abandi 200 batishyura kugira ngo bose bazamukane kandi bahabwa uburezi bufite ireme.Tuzakora ibintu bimeze nk’ubwisungane, aho ufite ubushobozi azagendana n’utabufite mbese tugafatanya.”

Gusa izi nzozi kuzigeraho ntabwo byoroshye nubwo bishoboka kubw’inkunga z’abantu n’imiryango itandukanye yifuza gushyigikira uburezi bw’umwana w’Umunyarwanda, barimo Abanyarwanda baba i Montreal muri Canada basuye iri shuri bakiyemeza gukusanya ubushobozi kugirango bafashe iri shuri. Iki gikorwa cyo gukusanya ubushobozi kiraba kuri uyu wa Gatandatu.

Ababyeyi bateye ubusitani abana bazajya bakiniramo
Abanyeshuri ba Green Hills Academy basize amarangi amashuri abiri
Albert Musabyimana, Umuyobozi wa Peace and Hope Initiative

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza