Abanyeshuri b’abanyarwanda bahawe amahirwe yo kwiga muri Chypre ku buntu

Yanditswe na Muvunyi Arsène
Kuya 10 Kanama 2019 saa 04:43
Yasuwe :
0 0

Abanyeshuri b’abanyarwanda bakeneye kwiga icyiciro cya mbere cya Kaminuza batsinze neza ibizamini bya leta, bahawe amahirwe yo kwiga mu gihugu cya Chypre ku buntu.

Aya mahirwe bayazaniwe n’Ikigo cya Best World Link gisanzwe gitanga serivisi zo gufasha abanyeshuri kujya kwiga mu bihugu bitandukanye byateye imbere mu burezi.

Izi kaminuza ziri mu mujyi wa Nicosia ari nawo murwa mukuru wa Chypre zikaba ziri mu za mbere zifite ireme ry’uburezi muri iki gihugu.

Umuyobozi wa Best World Link, Rukundo Charles Jyenani, yabwiye IGIHE ko hari amahirwe yo mu byiciro bitandukanye, aho aruta ayandi yose ari ku banyeshuri bagize amanota 73 mu kizamini cya Leta gisoza ayisumbuye, bemerewe kwishyurirwa amafaranga y’ishuri yose bo bakishakira ayo kubatunga.

Abafite kuva ku manota 72 kugera kuri 65 nabo bemerewe kwishyurirwa 75% by’amafaranga y’ishuri ubundi biyishyurire 25% ndetse n’ibyo kubatunga.

Abafite 64 kugera kuri 55 bishyurirwa 50% nabo bakiyishyurira andi nabo bongeyeho ibibatunga mu gihe cyose bari mu masomo.

Icyiciro cya kane ni icy’abanyeshuri babonye kuva ku manota 54 kugera kuri 50 bishyurirwa 25% bakiyishyurira 75% n’ibijyanye n’imibereho yabo.

Ababonye amanota ari munsi 50 bemerewe kwiyishyurira amafaranga yose y’ishuri ndetse n’ibibatunga.

Abashaka kwiyandikisha basabwa icyangombwa cy’inzira gisigaje nibura imyaka itatu, indangamanota z’imyaka itatu y’icyiciro cya kabiri cy’amashuri yisumbuye, umwishingizi wemeza ko azabasha kubona amafaranga atunga umunyeshuri, ubundi akajya ku biro bya Best Worl Link bakamufasha kwiyandikisha.

Muri uyu mwaka nta kizamini kindi kizatangwa hazafatwa abanyeshuri 50 bujuje ibyangombwa kandi babisabye mbere.

Umuyobozi wa Best World Link avuga ko aya mahirwe afitiye akamaro kanini abanyarwanda kuko amasomo atangirwa muri izi kaminuza akenewe ku isoko ry’umurimo.

Ati “Amashami yatanzwe arakenewe nk’urugero Aerospace Engineering, Mechanical Engineering, Electrical and Electonics Engineering, igihugu cy’ u Rwanda gikeneye abanjeniyeri beza bafite ubumenyi buvuye muri Chypre.”

Kwiyandikisha byaratangiye bikaba bizarangira tariki 08 Nzeri 2019 naho amasomo akazatangira mu ntangiriro z’Ukwakira.

Best World Link ikomeza gukurikirana abanyeshuri yafashije kujya kwiga mu mahanga binyuze mu bo bakorana baba mu bihugu bitandukanye ku buryo nta mubyeyi ukwiye kugira impungenge z’umwana we.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza