Kwamamaza

Abanyeshuri 7469 bahawe inguzanyo za buruse, abasaga 10 000 barazimwa

Yanditswe kuya 28-08-2016 saa 18:55' na Rabbi Malo Umucunguzi


Ikigo cy’Igihugu gishinzwe Uburezi, REB, cyatangaje ko abanyeshuri 7469 bagomba gutangira amasomo muri Kaminuza y’u Rwanda mu mwaka w’amasomo 2016/2017 bemerewe inguzanyo za buruse, mu gihe abandi 10026 bazimwe ku mpamvu zinyuranye.

Mu gutanga izi nguzanyo muri uyu mwaka hitawe ku ijanisha ry’ibintu bitatu, aho amanota umunyeshuri yagize yahawe 40%, icyo umunyeshuri aziga muri kaminuza gihabwa 40% naho icyiciro cy’ubudehe gihabwe 20%.

Ni ukuvuga ngo umunyeshuri wabonye inguzanyo ni uwagize 60% muri siyansi na 46% mu bitari amasiyansi.

Ushinzwe inguzanyo z’abajya kwiga mu mashuri makuru mu kigo cy’igihugu gishinzwe uburezi, REB, Desire Gacinya, yatangaje ko mu myaka ishize ibyiciro by’ubudehe byateje impaka zikomeye, bahitamo kwifashisha uburyo bushya mu mitangire y’inguzanyo.

Ati “Hari aho wasangaga abenshi banagira ikibazo, bakumva ko icyiciro cy’ubudehe aricyo gituma batabona inguzanyo. Ariko mu kugenda tuvugurura ngo turebe uko bikorwa neza, twaje gusanga nacyo twagiha amanota, aho usanga nk’umwana ari mu cyiciro cya mbere, akaba ari umuhanga afite amanota ari hejuru, agiye kwiga ibyo igihugu kibona bigomba kugiteza imbere, ako kanya uwo munyeshuri usanga ariwe ubona inguzanyo ya buruse.”

“Nk’urugero uyu mwaka nk’umwana uri mu cyiciro cya mbere afite 20/20. Wajya nko mu ijanisha ry’amanota yabonye mu mwaka wa gatandatu ugasanga afite nka 40/40. Ako kanya urumva ko uwo mwana aba afite amahirwe yo kubona buruse.”

Umuyobozi Mukuru wa REB, Gasana Janvier, we yatangaje ko ubu buryo bushya bwo gutanga inguzanyo buratuma hitabwa ku bushobozi umunyeshuri yagaragaje mu masomo kurusha icyiciro cy’ubudehe arimo.

Ati “Ni ukuvuga ngo ubuhanga nibwo bushyirwa imbere cyane, bugahabwa n’uburemere burusha ibindi byose. Noneho muri ubwo buhanga tukavuga ngo ese nta wabura amahirwe yo kujya kwiga ngo ni uko ari umukene, noneho tugahita turebera no mu budehe.”

“Icya mbere gihabwa agaciro ni ubushobozi bwo kwiga no gutsinda neza. Ibindi bituma amahirwe yiyongera ngo uwo muntu akomeze nabyo bikarebwa nyuma, ariko sicyo kibanza. Ni nayo mpamvu twagiye tubirutanyisha gutyo, kugira ngo ntihazagire umukene usigara inyuma ngo ni ukubera ko yabuze amafaranga ariko nyamara ari umuhanga.”

Banki Itsura Amajyambere y’u Rwanda, BRD, niyo iheruka guhabwa inshingano zo gutanga inguzanyo ku banyeshuri bajya kwiga mu mashuri makuru na Kaminuza za Leta mu Rwanda, ndetse ikanakurikirana uko abagurizwa bishyura.

Umuyobozi muri BRD, Matata Claudine, yavuze ko kugira ngo bahe inguzanyo umunyeshuri, bahera kuri lisiti iba yatanzwe na REB igaragaza abeyemerewe, hakagenderwa no ku yindi itangwa na kaminuza ku banyeshuri basabye.
Ibyo bivuze ko abanyeshuri bahuye n’ibibazo byo kwibura kuri lisiti biyambaza REB bakamenya impamvu batabonye iyo nguzanyo, bakamenya niba bashobora kuyibona cyangwa niba bitanashoboka.

Uko amanota yatanzwe

Dufatiye urugero nko ku muntu urangije amashuri yisumbuye, watsinze ku manota ya mbere mu kizamini cya leta afite 73, ubu imbonerahamwe ya REB igaragaza ko mu ijanisha yagiye ahabwa 40, naho uwagize 33 kumanura yahawe zeru muri ubu buryo bushya.

Harebewe ku byo umunyeshuri agiye kwiga muri kaminuza, niba aziga mu myuga (TVET) ijyanye na siyansi arahabwa amanota 40 naho niba agiye kwiga amasiyansi asanzwe muri Kaminuza y’u Rwanda ahabwe amanota 35; niba agiye kwiga TVET [amasomo ya tekiniki] arahabwa amanota 10 kimwe n’undi ugiye kwiga ibitari amasiyansi muri kaminuza.

Ku byiciro by’ubudehe, uri mu cya mbere ahabwa amanota 20, uri mu cya kabiri ahabwe 15, uri mu cya gatatu ahabwe amanota 10, mu gihe uri mu cya kane kibarizwamo abakire we imashini ntimwakira.

Ayo manota yose niyo ateranywa, uwagize 60% muri siyansi agahabwa inguzanyo, mu bitari siyansi igahabwa uwagize 46%.

REB ivuga ko abangiwe inguzanyo kuko bari mu cyiciro cy’abakire batarenze 150, abandi batazihawe byatewe n’amanota bagize cyangwa kuba batarujuje ibyangombwa.

Iki kigo kivuga ko kugena umubare w’abahabwa inguzanyo bishingira ku ngengo y’imari ihari, ariko uyu mwaka baragabanutse ugereranyijwe n’abazemerewe mu 2015, kuko ubu ari 7469 mu gihe umwaka ushize bari 12000 nubwo byitezwe ko mu myaka iri imbere bashobora kwiyongera.

Umuyobozi Mukuru wa REB, Gasana Janvier

Kanda hano ubone urutonde rw’abemerewe inguzanyo n’abatazemerewe


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved