Abanyeshuri 150 bahurira mu cyumba kimwe cy’ubwiherero muri GS Bwira

Yanditswe na Evariste Nsengimana
Kuya 6 Gashyantare 2018 saa 07:27
Yasuwe :
3 3

Ubuyobozi bw’Urwunge rw’Amashuri rwa Bwira mu Murenge wa Bwira, Akarere ka Ngororero, butangaza ko bubangamirwa no kuba budafite ibyumba by’ubwiherero bw’abanyeshuri buhagije kuko hari ibyumba icumi gusa bikoreshwa n’abanyeshuri barenga 1500.

Byatangajwe n’Umuyobozi wa GS Bwira, Nkunzebose Jean Marie Vianney, ku wa 5 Gashyantare 2018, ubwo abakozi ba Minisiteri y’Uburezi n’ibigo biyishamikiyeho bagisuraga mu bukangurambaga bugamije guteza imbere ireme ry’uburezi.

Bimwe mu bintu bagenzura bishobora kubangamira ireme ry’uburezi mu Rwanda birimo guta amashuri, gukoresha ibiyobyabwenge, gucunga nabi imitungo y’ibigo by’amashuri, kongerera ubushobozi abarezi, gutwara inda zitateguwe n’ibindi.

Iyo uganiriye n’abiga muri iki kigo, bakubwira ko ku kigereranyo ari uko abanyeshuri 150 basangira ubwiherero bumwe ku buryo hari aho usanga umurongo muremure w’ababukeneye.

Umunyeshuri uharariye abandi kuri GS Bwira, wiga mu mwaka wa Gatatu w’icyiciro rusanga, Hakizimana Sauveur, yabwiye IGIHE ko ikibazo cy’ubwiherero kibangamira abanyeshuri kuko nta n’aho kwihagarika bagira, ugasanga babyiganira muri buke buhari.

Ati “Ikibazo gihari muri iyi minsi nacyo batubwiye ko bazagikemura vuba, ni icy’aho kwihagarika, twakoreshaga turiya (yerekena hake duhari) ariko batubwiye ko bazubaka utundi twiza, n’ubwiherero batubwiye ko bagiye kubukora muri uku kwezi bukaba bumeze neza.”

Umwarimu wigisha ubugenge n’ikoranabuhanga muri GS Bwira, Bambanze John Peter, yabwiye IGIHE ko nubwo abarezi bagera ku 10 bashobora kuba basangira icyumba kimwe cy’ubwiherero, ikigoye ari abanyeshuri bakibuhuriramo ari benshi.

Asobanura ikibazo cy’ubwiherero buke, Nkunzebose uyobora iki kigo yagize ati “Dufite ikibazo gikomeye hano cy’ubwiherero buke cyane kuko mu gihe cyo kubaka aya mashuri y’uburezi bw’ibanze bw’imyaka icyenda, hari ubwo tutubakiwe. Duhereye mu 2009, hari ibyumba by’ubwiherero 12 tutubakiwe ariko muri rwa rwego rwo kwishakamo ibisubizo, twafatanije n’ababyeyi tubasha kubaka utwumba 10.”

Yakomeje asobanura ko bazakomeza gufatanya n’ababyeyi bakubaka ubundi bwiherero 12 no gusaba ubuvugizi mu Karere no mu bafatanyabikorwa bakareba ko bakubakirwa.

Umukozi w’Akarere ka Ngororero ushinzwe uburezi bw’amashuri abanza n’ay’incuke, Niyonsenga Protogène, yavuze ko ibibazo bigaragara muri GS Bwira birimo ibikorwa remezo nk’amazi, ubwiherero n’ibindi bidahagije, ari rusange mu mashuri hose ariko ko hari icyifuzo ko bizakemurwa.

Ati “Dufite umurongo mwiza n’icyerekezo ko bizakorwa nkuko umuyobozi w’ishuri yabivuze ko uko hazajya haboneka amafaranga agenerwa ikigo, azajya yongera umubare w’ubwiherero, tuzi ko no mu mwaka utaha, muri uyu murenge ahazashyirwa ingufu ni muri iki kigo [...] turizera ko tuzubaka ibyumba 12.”

Yakomeje asobanura ko ibindi bijyanye no kuvugurura amashuri ashaje bizagenda bikorwa uko ubushobozi buzaboneka.

Ubu bukangurambaga ni ubw’ibyumweru bibiri, buri gukorwa mu bigo by’amashuri bisaga 600 byo mu turere twose tw’igihugu, bufite insanganyamatsiko igira iti “imyigire myiza n’indangagaciro, ni ishingiro ry’uburezi bufite ireme.”

Umunyeshuri uharariye abandi kuri GS Bwira, wiga mu mwaka wa Gatatu w’icyiciro rusanga, Hakizimana Sauveur, yavuze ko kubona aho kwihagarika kuri iri shuri ari ikibazo
Umwarimu wigisha ubugenge n’ikoranabuhanga muri GS Bwira, Bambanze John Peter, aganira n'abanyamakuru
Abakozi ba Mineduc banenze ko GS Bwira itagira ubwiherero
Iri shuri ryigamo abanyeshuri barenga 1500
Umukozi w’Akarere ka Ngororero ushinzwe uburezi bw’amashuri abanza n’ay’incuke, Niyonsenga Protogène, aganira n'abanyamakuru
Umuyobozi wa Groupe Scolaire Bwira, Nkunzebose Jean Marie Vianney, yatangaje ko rifite abasaga 180 bataye ishuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza