Kwamamaza

Abanyeshuri 10 birihira bahawe inkunga yo kubafasha mu myigire

Yanditswe kuya 5-09-2016 saa 21:32' na Tombola Felicie


Abanyeshuri 10 batsinda neza kandi birihira buri kimwe cyose muri kaminuza y’u Rwanda ishami ry’Ubuvuzi, bahawe inkunga y’amadorali 1000 asaga ibihumbi magana inani mu mafaranga y’u Rwanda yo kubafasha kwiga no kuborohereza kubona ibyo bakeneye.

Iyi nkunga yatanzwe ku nshuro ya gatatu, itangwa n’umuryango w’Abanyakoreya y’Epfo witwa Chong Kun Dang Foundation utanga inkunga yo kwiga ku banyeshuri 10 badafashwa na wo kandi na bo bakifasha badafite ubushobozi buhambaye, inkunga itangwa hashingiwe ku kuba batsinda neza kurusha abandi.

Mu muhango wo kubashyikiriza iyo nkunga, Ambasaderi wa Koreya y’Epfo mu Rwanda, Dr Yong Min Park yasabye abahawe iyo nkunga gukora neza bakaba ibirangirire kuko ikompanyi yishingiye kubafasha kugeza barangije kaminuza ari nayo y’ikirangire mu gukora imiti.

Ati”Chong Kun Dang , ni kompanyi ya kabiri muri Korea y’Epfo y’ikirangirire mu gukora imiti, umuryango wacu wita ku burezi kandi natwe turi abahamya babyo kuko uburezi ni yo ntangiriro ry’ibyo tugeraho byose”.

Dr Jeanne Kagwiza, Umuyobozi w’Agateganyo w’Ishami ry’ubuvuzi muri kaminuza y’u Rwanda yatangaje ko aya ari amahirwe abanyeshuri baba babonye bagomba kubyaza umusaruro, bagakomeza gukora neza bakabera abandi intangarugero.

Ati” Ni ibintu byiza kubona umuntu wishingira kukurihirira utamukekaga wishakiraga buri kintu cyose, twiteze ko abahawe iyi nkunga mu kwiga bazayibyaza umusaruro kuko ibyo baburaga bazajya babibona bakarushaho kwiga neza badahangayitse.”

Abajijwe ku bikurikizwa kugira ngo umunyeshuri abe mu banyeshuri 10 bahabwa amadorali 1000 yo kubafasha kwiga buri mwaka, Dr Jeanne yagize ati”Icya mbere ni uko uba uri mu badafashwa na Leta kandi ikindi ni uko ugomba kuba uri uwa mbere mu bo mwigana waragiye utsinda buri somo ku mabwiriza aba yatanzwe n’uyu muryango.”

Ku mpamvu uyu muryango uhitamo gufasha abiga iby’ubuvuzi, Dr Young Soo Woo, Umunyamabanga Nshingwabikorwa wawo yatangaje ko ari uburyo bwo gufasha guteza imbere abiga iby’ubuvuzi kuko ari byo sosiyete yabo ikora.

Kaminuza y’u Rwanda ngo yifuza ko umubano mwiza na Chong Kun Daang Foundation wakomeza ku buryo hanaboneka abarimu bazajya baza kwigisha muri kaminuza y’u Rwanda ndetse n’abo mu Rwanda bakagirira ingendoshuri mu nganda zikora imiti kandi zateye imbere ku Isi.

Umuryango Chong Kun Dang washinzwe na Chong-Kun Kochon Lee mu 1973 aho yifuzaga ko yatera inkunga igihugu kikagira umubare utubutse w’abakozi. Ugendera ku ntego igira iti "Dushobora guha ubushobozi byibura abanyeshuri bake mu kwiga tukarihira abadafite amahirwe yo kwiga, ikirenzeho tugafasha binyuze mu guteza imbere abafite impano zibarimo.”

Aba banyeshuri bahawe inkunga barimo 6 biga ubuvuzi rusange (Medecine General) n'abandi 4 biga ibya Farumasi
Ambasaderi wa Koreya y'Epfo mu Rwanda yasabye aba banyeshuri gukora cyane baharanira kuzaba ibirangirire

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved