Kwamamaza

Abanyarwanda bongeye guhabwa amahirwe yo kwitabira gahunda ya ‘YALI’

Yanditswe kuya 23-10-2016 saa 14:26' na Marie Ange Mukaneza


Ambasade ya Leta Zunze Ubumwe za Amerika mu Rwanda, iratangaza ko abanyarwanda bongeye guhabwa amahirwe yo kwitabira gahunda igenewe urubyiruko rwa Afurika (Young African Leaders Initiative, YALI) y’umwaka wa 2017.

YALI ni gahunda igamije gufasha urubyiruko rwa Afurika kwishakamo ibisubizo no kongera ubumenyi ku bijyanye no kuba abayobozi beza b’ejo hazaza kandi bahangana n’ibibazo. Yatangijwe na Perezida wa Leta Zunze Ubumwe za Amerika, Barack Obama, mu 2010.

Buri mwaka urubyiruko ruturutse mu bihugu bitandukanye byo muri Afurika rumara ibyumweru bitandatu muri Amerika, aho rusura kaminuza zikomeye rukigishwa amasomo ajyanye n’ubushabitsi, kwihangira imirimo, imiyoborere n’ibindi.

Abitabiriye iyi gahunda izwi nka YALI Mandela Washington Fellowship bazagira amahirwe yo kuganira n’abayobozi bakomeye barimo na Perezida Obama ndetse no kubona inkunga ituma babasha kwagura ibikorwa byabo itangwa n’ikigega citera inkunga imishinga iciriritse.

Abemerewe kwiyandikisha ni abafite hagati y’imyaka 25 na 35 kandi bazi kuvuga no kwandika neza icyongereza. Kwiyandikisha bizarangira ku itariki 26 Ukwakira 2016, ku bindi bisobanuro wasura http://youngafricanleaders.state.gov

Icyo bamwe mu banyarwanda 15 bitabiriye YALI 2016 bungutse

- Muragijimana Albert

Muragijimana Albert afite impamyabumenyi ya Kaminuza mu burezi mu bijyanye no kwihangira imirimo; afite n’uburambe bw’imyaka itanu mu burezi n’ubushabitsi akaba ari nawe wanditse uruhererekane rw’ibitabo byitwa "RWANDA NZIZA” bigamije guteza imbere ubukerarugendo mu Rwanda.

Muri gahunda ya Mandela Washington Fellowship yoherejwe muri Cambridge College aho yongerewe ubumenyi mu bijyanye n’imiyoborere, ubushabitsi no kwihangira imirimo, ibintu yafashe nk’intangiriro yo kwiga kwe.

Nyuma yo kwitabira iyi gahunda, Muragijimina yashinze ikigo Escalator Academy gitanga amahugurwa n’ubufasha ku bantu bose bifuza guhanga udushya, guhindura isi no kuzana impinduka nziza mu byo bakora.

Olivia Kaguliro Mulerwa

Mulerwa wari woherejwe muri Kaminuza ya Virginia, avuga ko byamufashije kumenya amateka y’igihugu cy’igihangange nka Amerika n’inzira cyanyuzwemo ngo bigerweho.

Ahamya ko amasomo ajyanye n’ubuvugizi, imiyoborere, gukurikirana no kugenzura ibikorwa yatumye inzozi ze zo gutanga umusanzu mu kongerera ubumenyi sosiyete sivile mu Rwanda zikura.

Jérôme Ndayambaje

Jérôme Ndayambaje ni umwalimu mu Ishuri ryisumbuye rya Saint Jean Murunda riherereye mu Karere ka Rutsiro, ni n’Umuyobozi Mukuru w’Umuryango udaharanira inyungu witwa Rwanda Family Initiative.

Ndayambaje woherejwe muri Kaminuza ya Minnesota aho yigishijwe amasomo atandukanye arimo imiyoborere, kwihangira imirimo, ubuzima n’ingufu; ahamya ko atakuyemo ubumenyi gusa ahubwo yanabashije gutembera, kubona ibintu bishya no kungurana ibitekerezo n’urubyiruko ruturutse mu bihugu 22 byo muri Afurika.

Lionel Mudandi Simbizi

Lionel Mudandi Simbizi afite uburambe bw’imyaka itandatu mu bijyanye n’isoko ry’imari n’imigabane kuri ubu akaba ari Umuyobozi w’Ikigo Konectors Limited gitanga inama ku bigo by’abanyamahanga byifuza gushora imari no gutangira gukorera mu Rwanda.

Mudandi woherejwe muri Kaminuza ya Rutgers, ahamya ko ibiganiro yagiranye na bagenzi baturutse mu bihugu 19 byatumye bagira igitekerezo cyo kwihuza bagashinga ikigo kizahangana n’ikibazo cy’ingufu z’amashanyarazi muri Afurika; Sosiyete ikomeye muri Amerika yemeye kuzashoramo imari.

Ahamya ko kandi wabaye umwanya mwiza wo kuratira bagenzi be u Rwanda abereka ibyo rwagezeho birimo guteza imbere abagore, urubyiruko n’uburezi bw’abakobwa.

Bahati Satir Omar

Bahati Satir Omar afite uburambe bw’imyaka icyenda mu bijyanye no guharanira uburenganzira bw’abafite ubumuga mu Rwanda no mu karere, yashinze ikigo Uwezo Youth Empowerment.Nawe afite ubumuga bwo kutabona.

Bahati woherejwe muri Portland State University aho yongerewe ubumenyi mu bijyanye n’imiyoberere niwe munyarwanda ufite ubumuga wabashije kwitabira gahunda ya YALI kuva yatangira.

Ashishikariza abandi kwiyandikisha muri iyi gahunda kuko bazakuramo ubumenyingiro buri ku rwego rwo hejuru buzageza u Rwanda na Afurika kure.

Teta Isibo

Teta Isibo washinze ikigo Inzuki Designs gikora ibijyanye n’imirimbo n’imitako nawe ni umwe mu banyarwanda 15 bitabiriye Mandela Washington Fellowship 2016.

Ahamya ko mu byumweru bitandatu yamaze muri Amerika aho yari yoherejwe muri Kaminuza ya Texas we na bagenzi be 24 baturutse mu bihugu 18 babashije kongera ubumenyi mu bijyanye no gukora ubucuruzi n’imiyoborere.

Teta avuga ko kandi wabaye umwanya wo kuganira hagati yabo bungurana ibitekerezo, bagirana inama ndetse babasha no kwigira ku bakora ibisa n’ibyabo muri Amerika.

Uru rubyiruko ruhabwa ibiganiro n'abayobozi barimo na Perezida wa Amerika

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved