Kwamamaza

Abanyarwanda batatu basoje amasomo mu ishuri rya gisirikare mu Bubiligi

Yanditswe kuya 2-09-2016 saa 10:30' na Cyprien Niyomwungeri na Karirima A.Ngarambe


Abasirikare batatu b’u Rwanda barimo Sous-Lieutenant Chris Kayitaba, Sous-Lieutenant Steve Ingabe Karekezi na Sous-Lieutenant Christian Kamanzi, basoje amasomo yabo mu ishuri rya gisirikare mu Bubiligi ‘École Royale Militaire Belge’.

Ejo kuwa Kane tariki 1 Nzeri 2016, nibwo Abanyarwanda batatu bari bamaze imyaka itanu biga muri ishuri rya gisirikare mu Bubiligi, bahawe ipeti rya Sous-Lieutenant, banahabwa impamyabumenyi y’icyiciro cya gatatu cya Kaminuza [Masters].

Ba Sous-Lieutenant Steve Ingabe na Chris Kayitaba bahawe impamyabumenyi y’icyiciro cya gatatu mu bumenyi muri Politiki ‘Sciences politiques’ naho Christian Kamanzi ayihabwa mu bijyanye n’imikorere y’intwaro [management et systèmes d’armes].

Umuvugizi w’Igisirikare cy’u Rwanda, Lt.Col René Ngendahimana, yabwiye IGIHE ko iri shuri rifitanye ubufatanye n’u Rwanda ku buryo rwoherezayo abitegura kuba abofisiye bato.

Yagize ati "Ni ishuri dufitanye ubufatanye, hari abandi Banyarwanda bizeyo n’abakigayo. Ritanga amahugurwa y’abitegura kuba abofisiye bato [Cadet]."

Ritanga amasomo asanzwe, aya gisirikare n’imyitozo yo ku rwego rwa ofisiye.

Ambasaderi w’u Rwanda mu Bubiligi, Olivier Nduhungirehe wari witabiriye uwo muhango n’itsinda ry’abadiplomate, ari kumwe n’abakozi n’imiryango n’inshuri z’abofisiye bishimiye icyo gikorwa bagezeho bagirana ubusabane muri « Rwanda House » inzu iherereyemo ibiro by’Ambasade y’u Rwanda mu Bubiligi.

Yagize ati "Ndabashimira byimazeyo, nshimira n’imiryango n’inshuti zanyu baje kwifatanya namwe muri iki gikorwa cy’agaciro kuri twe nk’abanyarwanda no ku ngabo z’u Rwanda.Ndagira ngo mbabwire ko mwinjiye mu ngabo kandi ingabo zitari iz’igihugu icyo ari cyo cyose ahubwo mugiye gukorera ingabo z’uRwanda, bizwi ko rufite ingabo zikora byinshi bitangaje, zahagaritse Jenoside yakorewe Abatutsi, nkaba nishimiye ibihe byiza twagiranye muri gahunda zose mwabayemo zategurwaga hano mu Bubiligi;mwatubereye beza, muzagire akazi keza."

Umwe mu basoje aya masomo yavuze ko yishimiye kuba arangije muri Kaminuza ya gisrikare agira ati "Ikintu cyanshimishije ni uko batwigishije uburyo bwo kumenya uko uca cyangwa wakwivana mu bibazo cyangwa se wakwihanganira byinshi wacamo (capacité d’adaptation), ikindi mpavanye kandi nkunda cyane ni ukumenya gukora cyane kandi ukorera kuri gahunda."

Kugeza ubu hari abandi banyarwanda batatu biga muri École Royale Militaire Belge barimo babiri bazasoza amasomo umwaka utaha. Iri shuri hari n’ubwo rijya ritanga imyanya ku bandi ba ofisiye bakuru bo mu Rwanda bagahabwa imyitozo n’amasomo bya gisirikare.

Kuva iri shuri ryafungura imiryango icyiciro cyasoje amasomo ni icya 151.Kuri iyi nshuro harangije abanyeshuri 106 baturuka mu bihugu bitandukanye ku Isi. Abanyafurika batangiye ari 12 , ariko ababashije gusoza ni 6 barimo Abanyarwanda batatu.

Abanyarwanda barangije muri iri shuri hamwe na Ambasaderi w'u Rwanda mu Bubiligi, Olivier Nduhungirehe
Abasoje amasomo muri iri shuri ku karasisi
Sous-Lieutenant Steve Ingabe Karekezi
Sous-Lieutenant Christian Kamanzi
Sous-Lieutenant Chris Kayitaba
Bamwe mu bitabiriye ibirori by'abasoje amasomo yabo mu ishuri rya gisirikare mu Bubiligi
Ambasaderi Nduhungirehe yifurije akazi keza abarangije amasomo yabo

Amafoto:Jessica Rutayisire


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved