Kwamamaza

Mozambique:Abanyarwanda batatu barashinjwa umugambi w’ubwicanyi

Yanditswe kuya 7-09-2016 saa 18:50' na Rabbi Malo Umucunguzi


Abagabo batatu b’abacuruzi bakorera i Maputo muri Mozambique barimo babiri bahoze mu gisirikare, bagejejwe mu rukiko bashinjwa gucura umugambi wo kwica Louis Baziga, Umuyobozi wa Diaspora Nyarwanda muri Mozambique.

Abanyarwanda barimo benshi bamaze gushinga ibikorwa by’ubucuruzi i Maputo bamaze igihe mu bwoba bukomeye bikanga ubwicanyi bw’abantu bataramenyekana, kugeza ubwo bitabaje inzego z’umutekano zirimo igipolisi ngo zibashe kubacungira umutekano.

Kuwa 22 Nyakanga, nibwo Umushinjacyaha Octávio Zilo yatanze ikirego gishyira muri uwo mugambi w’ubwicanyi, Diomede Tuganeyezu, usanzwe ari umupasiteri akaba n’umucuruzi wahoze mu gisirikare, Benjamin Ndagijimana w’umucuruzi na Revocat Karemangingo, umucuruzi nawe wahoze mu gisirikare. Bose ni Abanyarwanda bakorera muri Mozambique.

Ibyo bikorwa byose by’ubugizi bwa nabi, abaregwa ngo bagiye babyitirira inzego z’ubutasi za Guverinoma y’u Rwanda bavuga ko ishaka guca intege abashyigikiye ubutegetsi bwo hambere batavuga rumwe n’uburi mu gihugu uyu munsi.

Gusa Umushinjacyaha Zilo avuga ko abashatse kwivugana Baziga bamuzizaga amakimbirane bafitanye aho bashaka kwiharira itorero rya Pantekote bafite muri Mozambique ahitwa Machava, ryitwa Pentecostal Church in Revival Mozambique, bose bafatanyije gushinga.

Ikinyamakuru Folha de Maputo gitangaza ko mu gushaka kwivugana Baziga, Diomede ngo yitabaje umupolisi ukorera mu ntara ya Maputo ngo amumwicire kuko bumvaga ko amakimbirane bafitanye azahita ashirira aho.

Umushinjacyaha avuga ko Pasiteri Diomede yijeje uwo mupolisi ko naramuka yishe Baziga azamuha 600,000 by’ama meticais akoreshwa muri Mozambique. Yamuhaye avanse ya 150,000, anamuha andi ibihumbi birindwi yo kumufasha kunoza uwo mugambi, yifashishije ikoranabuhanga rya "Mpesa".

Gusa ngo uwo mupolisi wari waguriwe byarangiye adashyize mu bikorwa uwo mugambi, ahubwo ajya kuburira Baziga amumenyesha uko umugambi wose uteye.

Mu kiganiro IGIHE iheruka kugirana na Ambasaderi w’u Rwanda mu bihugu byo muri Afurika y’Amajyepfo birimo na Mozambique, Vincent Karega, yavuze ko hari imitwe nka RNC na FDLR ikomeza kwihisha inyuma y’ubwicanyi bwibasira Abanyarwanda baba muri ibyo bihugu, ababifitemo inyungu bakihutira kubyitirira Leta y’u Rwanda.

Ati “Bashaka ko abantu bajya muri RNC/FDLR ku ngufu. Bakora icengezamatwara ku bimukira bafite ubutunzi ndetse basura u Rwanda bakanahashora imari, bakabita za maneko n’abicanyi ba RPF bari gushakisha abarwanashyaka ba FDLR/RNC muri Afurika y’Amajyepfo, bakanahuza iterambere ry’abo n’inkunga RPF ibaha mu Rwanda.”

Umwe mu baheruka kwicwa ni Turatsinze Theogene wari umucuruzi ukomeye akanasura u Rwanda cyane akanahagira imitungo, akaba no mu nama y’ubuyobozi ya BRD. Amb. Karega avuga ko nyuma y’ubwicanyi bw’amayobera yakorewe akanajugunywa mu nyanja, RNC yavuze ko ari u Rwanda rwamwishe kuko yameneye amabanga IMF.

Nyuma y’ibyabaye kuri Baziga ariko uwagombaga kumwica akamuburira, Amb. Karega yagize ati “Imigambi yerekana ko nyuma yo kwica Louis Baziga bagombaga kuvuga ko ari leta y’u Rwanda yamwishe ngo inyage imitungo ye iri mu Rwanda.”

Urukiko muri Mozambique

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved