Abanyarwanda batanu barekuwe na Uganda basobanuye ubucakara n’iyicarubozo bakorewe

Yanditswe na Evariste Nsengimana
Kuya 6 Kanama 2019 saa 08:28
Yasuwe :
0 0

Abanyarwanda batanu bakomoka mu Turere twa Rutsiro, Musanze na Burera, baheruka kurekurwa n’inzego z’umutekano za Uganda nyuma y’umwaka n’amezi ane bafunzwe, bavuze ko bakoreshwaga imirimo ivunanye abatabishoboye bagakubitwa.

Uko ari batanu batawe muri yombi muri Werurwe 2018 ubwo bari bagiye gushakisha imibereho banyuze mu nzira zemewe n’amategeko, batungurwa n’uko Polisi n’igisirikare bya Uganda bibashinje kwinjirayo nta byangombwa.

Aba banyarwanda barimo Nizeyimana Jean d’Amour w’imyaka 33, Ngaruwenimana Innocent w’imyaka 19, Nizeyimana Jean Damascène w’imyaka 27, Dusabimana Jean Paul w’imyaka 24 na Barihorewe Philippe w’imyaka 44.

Bose barekuwe ku wa 3 Kanama 2019, nyuma y’amezi 16 bafunzwe.

Nizeyimana Jean d’Amour ukomoka mu Murenge wa Mushonyi mu Karere ka Rutsiro. Yavuze ko yavuye mu rugo ajya Uganda ku wa 13 Werurwe 2018, anyuze ku mupaka wa Cyanika mu Karere ka Burera, yemererwa kwambuka kuko yari afite indangamuntu.

Uyu mugabo wari usanzwe ukorera uburobyi mu Kiyaga cya Victoria, yavuze ko ku mupaka bamusinyiye, ahageze asanga umwuka utari mwiza, ahitamo kugaruka ku wa 22 Werurwe 2018 ageze mu Karere ka Kisoro asanga abapolisi n’abasirikare bari mu mukwabu wo gushakisha abanyarwanda.

Yasobanuye ko bamwatse ibyangombwa abaha indangamuntu n’icyangombwa bari bamuhaye kimwemerera kubayo, bahita bamwambika amapingu, bamwinjiza mu cyumba yasanzemo abandi banyarwanda basaga 100, na bagenzi be bahita baburiza imodoka ibajyana kuri sitasiyo ya Polisi.

Baraye bafungiye muri Kasho, mu gitondo bazana imodoka bababeshya ko bagiye kubasubiza mu Rwanda, ariko siko byagenze kuko basanze zibajyanye mu rukiko.

Nizeyimana ati “Twari abantu 40 baduhagurukiriza rimwe, ni nabwo bwa mbere twari tugeze mu rukiko, badukatira twese imyaka ibiri ariko badukuriraho amezi, basanga tugomba gufungwa 16.”

Nyuma basabwe gutanga miliyoni ebyiri z’amashilingi zisimbura icyo gifungo.

Nizeyimana yahamagaye umugore we amushyira ibihumbi 400Frw barayanga ngo haburaho macye, bahita bamwimurira muri gereza iri i Kabale.

Ayo mezi bayamaze muri gereza bafungiye icyaha cyo kwinjira muri Uganda nta byangombwa nyamara baranyuze ku mupaka babifite, icyo bahawe kibemerera kubayo bacyambuwe na Polisi.

Muri Gereza i Kabale Nizeyimana ntiyongeye kubona uburyo avugana n’umuryango we. Aho naho baje kuhakurwa bajyanwa ahitwa i Banda, aho bakoreshwaga imirimo y’uburetwa irimo guhingira Leta ya Uganda umunsi wose, ikababarira amashilingi 100 (25 Frw).

Ati “Twasanze ibintu bitoroshye ari ugutema amashyamva y’ibihwa, dukubitwa, wajya kwivuza bakaguhereza utunini nka dutatu nta kuguhindurira ariko batubwira ko tugomba gukora, udakoze ari ugupfa, turakubitwa.”

Aba banyarwanda basobanura ko amashyamba bahingishwagamo yabaga yuzuyemo amahwa, usigaye inyuma bikamubana ibibazo kuko yakubitwaga bikomeye.

Ati “Kwari uguhinga, gutema amashyamba adahingwa arimo ibihwa. Hagati y’umuntu n’undi habaga harimo sentimetero 5o, mujyamo muri nk’ijana cyangwa 200 buri wese agahinga ukwe, habaga harimo abafungwa b’Abagande bagakubita usigaye inyuma.”

Nizeyimana yasobanuye ko aho bari bafungiye harimo abarenga 200 biganjemo abanyarwanda n’abanyekongo ndetse ko icyamubabaje ari umunyarwanda bari bafunganywe wapfuye arozwe n’imfungwa z’abagande.

Kubera ko aho bahingaga habaga harimo amahwa, iyo yakujombaga ngo wategerezaga ku Cyumweru kugira ngo uzabone umwanya wo kuyahandura.

Igifungo kirangiye ku wa 3 Kanama 2019 nibwo bahawe itike ihwanye n’ikiguzi cy’imirimo bakoze bafunzwe ku munsi ngo bagikoremo itike ibageza ku mupaka.

Uretse guhinga mu mashyamba, abo banyarwanda basobanuye ko banikorezwaga imifuka y’ibigori byeze mu mirima bahinze, bakabigeza ku modoka zaje kubisarura.

Aba banyarwanda si aba mbere barekuwe na Uganda bavuga ko bafashwe bazira ubusa, bagafungwa ndetse bagakorerwa ibikorwa bibabaza umubiri bamwe bakanahapfira.

Ibi bikorwa byo gufatwa no gufungwa bya hato na hato, biheruka gutuma u Rwanda rusaba abaturage barwo guhagarika kujya muri Uganda, kugeza igihe ikibazo cy’umutekano wabo kizakemukira.

Abanyarwanda batanu barekuwe na Uganda bagarutse batanga ubuhamya ku bucakara n’iyicarubozo bakorewe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza