Abanyarwanda bashyiriweho uburyo bushya bw’ikoranabuhanga bwo kumenya amakuru y’ibibakorerwa

Yanditswe na Iradukunda Desire
Kuya 7 Kamena 2018 saa 09:37
Yasuwe :
0 0

Ikigo gishinzwe Iterambere ry’Uturere (LODA) cyatangije uburyo bushya bw’ikoranabuhanga buzafasha Abanyarwanda kumenya ibibakorerwa no kunganira Leta mu igenamigambi.

LODA ku bufatanye n’Ikigo cy’Abadage gishinzwe Ubufatanye mu Iterambere (KFW) ku wa 6 Kamena 2018, cyamuritse uburyo bwiswe MEIS (Monitoring Evaluation Information System), bwifashishwa mu kubika amakuru kuri gahunda zose zigenewe abaturage.

MEIS yorohereza abaturage kubona no gutanga amakuru no kumenya ayerekeye ibibakorerwa n’aberekeyeho.

Umuyobozi ushinzwe Igenamigambi ry’Inzego z’Ibanze muri LODA, Sibomana Saidi, yasobanuye uko ubu buryo bukoreshwa muri gahunda zitandukanye zirimo kwishyura ubwishingizi mu buvuzi no kumenya amakuru yerekeye abaturage n’ibindi.

Yagize ati “[MEIS]Ishobora gukoreshwa n’abaturage cyane mu kwishura ubwisungane mu kwivuza kuko twahuje uburyo bwacu n’ubwa RSSB; abaturage bashobora kubona amakuru yabo y’ibanze kugira ngo babashe kwishyura mituweli.”

Umuturage ashobora gukoresha MEIS atanga amakuru ku bikorwa remezo cyangwa ku kindi kintu cyose abona gifite ikibazo cyangwa akayikoresha ashaka amakuru y’imishinga itandukanye ndetse n’ay’iyiciro cy’ubudehe arimo yifashishije telefoni.

Abateguye ubu buryo bifuza ko amakuru yose azajya abikwa mu ikoranabuhanga aho kuba mu mpapuro hagamijwe kwihutisha akazi no gutanga amakuru mu buryo bwihuse kandi bunoze.

Umuyobozi ushinzwe Igenamigambi mu Karere ka Ngororero, Birorimana Jean Paul, yagaragaje ko ubu buryo buzabafasha cyane.

Yagize ati “MEIS idufasha gutegura imishinga cyangwa kuyicunga, gukusanya ibitekerezo by’abaturage kuva mu tugari no mu mirenge ari nabyo duheraho dukora igenamigambi. Bishatse kuvuga ko MEIS idufasha mu igenamigambi no mu ishyirwa mu bikorwa ry’imishinga ndetse no kuyisuzuma.”

Uburyo bwa MEIS bwifashishwa n’uturere mu kubika amakuru yose yatanzwe n’abaturage, maze bikoroshya igenamigambi bityo ibikorwa bitabonewe ingingo y’imari nabyo bikagaragarizwa abaturage.

MEIS yahujwe n’ubundi buryo bukoreshwa n’inzego zitandukanye zirimo iz’uburezi, ubwishingizi n’ibindi. Umuturage ashobora kubwifashisha agira uruhare mu bimukorerwa, akanamenya amakuru akanze *901#, akaba yatanga igitekerezo n’amakuru cyangwa akayashaka. Umuntu ashobora gukanda *909# akaba yamenya amakuru y’umuryango we kugira ngo yishyure ubwisungane mu kwivuza.

Abantu batandukanye bari bafite inyota yo kumenya icyo MEIS ihishiye Abanyarwanda
Abayobozi batandukanye bitabiriye amahugurwa ku ikoreshwa rya MEIS mu gutanga amakuru
Umuyobozi ushinzwe Igenamigambi ry’Inzego z’Ibanze muri LODA, Sibomana Saidi
Umuyobozi ushinzwe Igenamigambi mu Karere ka Ngororero, Birorimana Jean Paul, aganira n'itangazamakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza