Abanyarwanda basabwe kubyaza umusaruro amahirwe abafasha kwizigamira no gutegura ejo hazaza

Yanditswe na Evariste Nsengimana
Kuya 1 Ugushyingo 2019 saa 08:38
Yasuwe :
0 0

Abanyarwanda basabwe kurushaho kubyaza umusaruro amahirwe atandukanye yashyiriweho kubafasha kwizigamira mu bigo by’imari n’ibigo by’ubwishingizi, mu rwego rwo gutegura ejo hazaza habo.

Buri wa 31 Ukwakira u Rwanda rwifatanya n’Isi mu Kwizihiza umunsi mpuzamahanga wahariwe kwizigama. Uyu munsi watangiye kwizihizwa kuri iyo taliki mu 1924 mu nama mpuzamahanga yaberaga i Milan mu Butaliyani, uza kwemezwa n’Umuryango w’Abibumbye mu 1989 nk’uwahariwe guteza imbere gahunda zo kwizigama.

Mu kwizihiza uwo munsi, Minisiteri y’Imari n’Igenamigambi ifatanyije n’abafatanyabikorwa bayo batangije icyumweru cyahariwe ubukangurambaga bwo kwizigama gifite insanganyamatsiko igira iti ‘Zigamira ejo heza’, aho abanyarwanda bibutswa akamaro ko kwizigama n’uburyo barushaho gucunga neza amafaranga bafite, akabasha kubakemurira ibibazo bagira mu buzima.

Ni icyumweru giteganyijwemo ibikorwa bitandukanye birimo ibiganiro kuri Radio aho impuguke mu by’ubukungu, ubwishingizi n’isoko ry’imari n’imigabane bazarushaho kugaragaza neza akamaro ko kwizigama, amahirwe abamo n’uko bikorwa.

Kugera 2009, Guverinoma yashyizeho ingamba zo kumenyekanisha akamaro ko kwizigamira hagamije kuzamura igipimo cy’ubwizigame mu gihugu ku buryo kigomba kwiharira 20% by’ubukungu bw’igihugu mu mwaka wa 2020.

Minisitiri w’Imari n’Igenamigambi, Dr. Uzziel Ndagijimana, avuga ko kwimakaza umuco wo kwizigama aribwo buryo rukumbi bwafasha abanyarwanda kwiteganyiriza ejo heza habo, h’imirango n’igihugu cyabo, no kugera ku bukungu butajegajega igihugu cyifuza.

Ati “Hari intambwe yatewe mu kwizigamira ariko ntabwo biragera ku rwego rwifuzwa. Dukeneye kwizigamira birenze uko bikorwa ubu, dukeneye kumva ko kongera ikigero cy’ubwizigame ari byo byadufasha kongera ishoramari, kugabanya inyungu ku nguzanyo, kugabanya ubukene no kugira uruhare mu budahangarwa n’ukwigira kw’igihugu cyacu.”

Ubushakashatsi bwakozwe ku buryo abanyarwanda bagezwaho serivisi z’imari (2016 FinScope) bwerekanya ko 86% by’abanyarwanda bakuze (basaga miliyoni 5.1) aribo bizigama mu bigo by’imari. Abakoresha uburyo busanzwe bwo kwizigama bageze kuri 49% bavuye kuri 26% mu 2012.

Iyi nyigo igaragaza ko abakorana n’ibigo by’imari bagabanutse bakagera kuri 13% mu 2016 bavuye kuri 14% mu 2012. Icyo gihe abizigamira mu Umurenge Sacco bari 27% mu gihe abifashishaga telefone bari 17%.

Mu gukomeza guteza imbere umuco wo kwizigama, Guverinoma yashyizeho ingamba zitandukanye zirimo ikigega Ejo Heza gifasha abanyarwanda kwizigamira by’igihe kirekire ku bantu bafite umushahara wa buri kwezi n’abatawufite, koperative Umurenge SACCO, ikigega Iterambere Fund no kwinjiza mu nteganyanyigisho z’uburezi amasomo ashishikariza abanyeshuri umuco wo kwizigama.

Si ibyo gusa koko hanafunguwe ibigo by’imari biciriritse, iby’ubwishingizi n’izindi mu rwego rwo gukundisha abanyarwanda umuco wo kwizigama.

Imibare y’ikigo cy’Ibarurishamibare igaragaza ko ubwizigame bubumbatiye munsi ya 15% by’ubukungu bw’igihugu mu gihe intego u Rwanda rwihaye ari ukugera kuri 20% mu 2020.

Ubushakashatsi buheruka gukorwa ku buryo abanyarwanda bagezwaho serivisi z’imari bwanagaragaje ko kuba ibigo by’imari mu Rwanda bikiri bicye nabyo bigira uruhare mu kudindiza umuco wo kwizigamira mu Rwanda.

Bwerekanya ko 35% by’abakuze bakibika amafaranga yabo mu rugo kubera imbogamizi bagira mu kugera ku bigo by’imari byemewe.

Minisitiri Ndagijimana yakomeje ati “Guverinoma ikomeza gukorana n’abafatanyabikorwa, abikorera, sosiyete sivile mu gukundisha abanyarwanda umuco wo kwizigamira. Dukeneye kuva muri ubwo buryo bwo kwizigama buciriritse tukagana ibigo by’imari no kwizera ko tutizigama kugira ngo twishyure ibyo dukenera ahubwo tugashora imari dutegura ibyadufasha kugera ku bukire.”

Icyerekezo 2020 igihugu cyihaye kigamije guhindura u Rwanda igihugu gifite ubukungu buciriritse bitarenze umwaka wa 2020, naho Icyerekezo 2035 kikazasiga rufite ubukungu buri hejuru mu gihe intego ari uko mu 2050 ruzaba rubarwa mu bihugu biteye imbere.

Abanyarwanda basabwe kubyaza umusaruro amahirwe abafasha kwizigamira no gutegura ejo hazaza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza