Kwamamaza

Abanyarwanda baracyari inyuma mu kurya amafi muri EAC: Ibiro bibiri ku mwaka buri wese

Yanditswe kuya 9-09-2016 saa 12:19' na Philbert Hagengimana


Umuryango Mpuzamahanga wita ku buzima [OMS] uteganya ko umuntu akwiye kurya nibura ibiro 25 by’amafi buri mwaka, ariko ubushakashatsi bwakozwe mu Karere ka Afurika y’Iburasirazuba, bwagaragaje ko Umunyarwanda arya nibura 2.3, ari na cyo gipimo cyo hasi cyane mu Karere k’Ibiyaga bigari ndetse no muri Afurika yo munsi y’Ubutayu bwa Sahara.

Umuyobozi Ushinzwe ubworozi bw’amafi n’uburobyi mu Kigo cy’Igihugu gishinzwe ubuhinzi n’ubworozi RAB, Dr.Rutaganira Wilson asobanura ko impamvu ituma Abanyarwanda baza ku mwanya wa nyuma mu kurya amafi, ari uko umusaruro wayo mu Rwanda ukiri muke.

Yagize ati “ Nta mafi dufite, umusaruro uracyari hasi. Ariko ikirebana n’umuco w’Abanyarwanda bataryaga amafi cyo kiri kugenda kivaho, kuko hari abashaka kuyarya batayabona.”

Dr.Rutaganira akomeza avuga ko u Rwanda rugeze ku musaruro w’amafi uyingayinga toni 22.000 habariwemo ubwoko bwose bw’amafi ndetse n’ibindi biba mu mazi bamwe mu banyarwanda batemera ko ari yo.

Mu 2013/2014, u Rwanda rwasaruraga amafi angana na toni zisaga gato 19.000, mu gihe mu 2010, uwo musaruro wari uri kuri toni 17,000.

Mu bushakashatsi bwakozwe mu myaka ibiri hagati ya 2012 kugeza muri 2014, bukorwa inshuro umunani aho bwakorwaga mu mezi atatu, bwagaragaje ko mu kiyaga cya Kivu honyine hashobora kuba harimo amafi hagati ya toni 3600 na 6000, hakaba nta gushidikanya kwabaho ko zaba zariyongereye hagendewe ku ngamba zitandukanye zafashwe zigamije kongera umusaruro w’uburobyi.

Ese birashoboka ko Umunyarwanda yazakwiza igipimo fatizo cya OMS mu kurya amafi?

Dr.Rutaganira ati “Birashoboka, ariko bizafata igihe. Icyakora intego ni uko mu myaka itanu iri imbere twaba twageze nibura ku kigero cy’ibihugu byo muri Afurika yo munsi y’ubutayu bwa Sahara, aho umuntu azaba arya nibura ibiro 6,7. Twumva nituramuka tugeze kuri urwo rwego tuzaba twazamutse.”

Akomeza avuga ko kugera kuri iyo ntego na byo bisaba byinshi, birimo ubufatanye bw’inzego bwite za Leta ndetse n’iz’abikorera, abaturage bo bagasabwa “guhindura imyumvire no kurwanya ba rushimusi.”

RAB ivuga ko bamwe mu baturage batekereza ko ifi ari Tilapia yonyine, ndetse ikabasaba ko bahindura imyumvire bakarya n’andi bajya binefaguza bavuga ko ameze nk’inzoka, nyamara ari na yo akungahaye cyane ku ntungamubiri. Aha banasabwa kandi kwihatira kumenya uburyo ifunguro ririmo amafi ritegurwa.

Ikindi gisabwa abakora umwuga w’uburobyi cyangwa abaturiye ibiyaga ni ukuroba batangiza, kuko biza ku isonga mu gutuma umusaruro w’amafi utiyongera. Abo ni na bo bashishikarizwa kandi kugira uruhare runini mu gukumira ba rushimusi baroba n’amafi mato atarakura.

Ibyo byose bimaze kujya mu murongo wabyo, hazaba hasigaye uruhande rw’abashoramari, na bo bakwiye kwihatira gushora imari yabo mu bworozi bw’amafi bagamije kwagura ubucuruzi.

Ikibazo cyo kudakwiza igipimo fatizo cya OMS mu kurya amafi si umwihariko w’abanyarwanda nubwo ari bo baza ku mwanya wa nyuma, kuko muri Werurwe uyu mwaka wa 2016, Inteko Ishinga Amategeko y’Umuryango wa Afurika y’Iburasirazuba, EALA, yagaragaje ko abatuye ibihugu byose bigize uwo muryango (EAC) bagihuriyeho.

Dore uko abaturage muri EAC bakurikiranye mu kurya amafi buri mwaka:

Uganda: Ibiro 10

Tanzania: Ibiro 8

Burundi: Ibiro 3,6

Kenya: Ibiro 3,45

Rwanda: Ibiro 2,3

Muri ubwo bushakashatsi, EALA yagaragaje ko intandaro y’ikigero gito cy’uburyo amafi aribwa ugereranyije n’igipimo fatizo cya OMS, ari umusaruro muke uterwa n’impamvu nyinshi zitandukanye.

Aha havuzwe ubushobozi budahagije (mu mafaranga) bwo kwita ku mafi yose ari mu biyaga biri muri EAC, ubushobozi buke mu bya tekiniki z’uburobyi, ibikoresho bidahagije, kutabona umurama w’amafi ndetse n’ibyo kuyagaburira bihagije.

Abanyarwanda baracyari ku mwanya wa nyuma mu kurya amafi muri EAC

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved