Kwamamaza

Abanyarwanda bane bafungiwe i Burundi

Yanditswe kuya 14-09-2016 saa 08:32' na Rabbi Malo Umucunguzi


Umwe mu Banyarwanda bakoreraga ubucuruzi mu Ntara ya Ngozi mu Burundi avuga ko bagenzi be bane bakoranaga baheruka gutwarwa n’inzego zishinzwe umutekano mu Burundi, kuva muri Nyakanga kugeza ubu imiryango yabo ikaba nta gakuru kabo iheruka.

Samuel Ndabigengesereye utuye mu Karere ka Rusizi mu Ntara y’u Burengerazuba, avuga ko abagabo bane bakoranaga muri resitora n’iduka ry’imigati ryitwa Goshen mu Ntara ya Ngozi, bafashwe na Polisi y’u Burundi kuwa 26 Nyakanga 2016, ku mugoroba ubwo bari batashye ahitwa ku Rubuye bavuye ku kazi.

Mu kiganiro na IGIHE, Samuel yavuze ko mbere y’uko batwara abo bagabo barimo babiri bo kwa Se wabo, babanje kubabaza niba ari Abanyarwanda.

Ati “Babafashe turi kumwe, njye nkizwa n’uko nabonye abapolisi badukurikiye, hari ahantu hari akabutike njya kugura amafaranga yo muri telefoni, uko nasohotse nahise mbona babajyanye. Twabonye badukurikiye niho umutima wandiye ‘nti reka njye kugura amayinite, nibiba ngombwa dutabaze’.

“Haje ikimodoka cyirabura cy’abapolisi, barababaza ngo ‘muri Abanyarwanda’, bati ‘turi Abanyarwanda’, bati ‘nimwinjire mu modoka, muryame mwubitse inda’. Nahise mbwira abo bantu aho naguraga ikarita ya telefoni nti nimumperekeze, nanjye mbonye umperekeje ari kugenda gahoro, mfata iy’ikirenge ndirukanka.”

Abo bagabo uko ari bane barimo Hitimana Joseph, Mbarushimana Mathias na Ndagijimana Protais batuye mu Karere Rusizi, Umurenge wa Nzahaha mu Kagali ka Butambamo na Nzamwitakuze Joseph bita Yakim ukomoka mu Karere ka Rubavu.

Samuel yakomeje avuga ko icyo kibazo cyamenyeshejwe muri Ambasade y’u Rwanda i Bujumbura, babasaba imyirondoro y’ababuze ariko kugeza ubu ntacyo irabasubiza, ndetse ahandi byamenyeshejwe ni inzego z’abinjira n’abasohoka ku mupaka w’Akanyaru, n’inzego z’ubuyobozi, Polisi n’Ingabo mu Karere ka Rusizi.

Ati “Turi mu gihirahiro, turifuza kumenya niba bakiriho cyangwa ngo tubashyingure, tumenye iherezo ryabo.”

Mukahirwa Esther, Umugore wa Hitimana Joseph w’imyaka 43 bafitanye abana barindwi, uri muri abo baburiye i Burundi, yabwiye IGIHE ko ikibazo cyabo cyageze mu nzego zinyuranye, nubwo kugeza ubu atazi agakuru k’umugabo we.

Ati “Batubwiye gusa ko babafashe kuwa 26 Nyakanaga, baduhamagaye mu gitondo batubwira ko bafashwe nimugoroba bagiye kuryama, bose babajyanye. Ikibazo cyageze mu buyobozi, uwo bari kumwe niwe wabikurikiranye hamwe n’uwabakoreshaga.’’

Aba bakozi babuze bari aba Kwizera Pierre, uvuga ko nyuma y’ibyabaye bafashwe n’ubwoba ku buryo ubucuruzi yakoreraga mu Burundi yahise abuhagarika akagaruka mu Rwanda nyuma y’ifungwa ry’abakozi be.

Ndabigengesereye Samuel nawe avuga ko yagumye mu Burundi agahe gato, ikibazo akigeza ku buyobozi mu Burundi ariko aza gutinya ko nawe yatabwa muri yombi, nyuma y’iminsi itatu agaruka mu Rwanda, kuwa 29 Nyakanga.

Turacyagerageza kuvugana n’inzego z’ubuyobozi no muri Ambasade y’u Rwanda mu Burundi ngo hamenyekane amakuru mashya kuri iki kibazo, gusa bibaye mu gihe umwuka hagati y’u Rwanda n’u Burundi utifashe neza.

Mu mpera za 2015 Jacques Bihozagara wahoze ari Minisitiri, ndetse agahagararira u Rwanda mu Bubiligi no mu Bufaransa, yatawe muri yombi n’urwego rw’ubutasi rw’u Burundi, afungirwa muri Gereza ya Mpimba ndetse anapfiramo, hakaba hari n’abandi Banyarwanda benshi bagifungiyeyo.

Muri Kanama Abasirikare b’u Rwanda bari ku burinzi mu Murenge Bugarama mu Karere ka Rusizi barashe abaturage babiri b’u Burundi nyuma y’aho ahagana saa cyenda z’ijoro bambutse umupaka bababaza abo ari bo ntibasubize bakagira amakenga. Ni igikorwa cyakurikiye ikindi cy’abajura bavuye i Burundi bagera muri ako gace bakaharasira umuturage w’u Rwanda ukuguru.

U Rwanda rucumbikiye impunzi nyinshi z’Abarundi zahahungiye nyuma y’uko Perezida Nkurunziza yari amaze gufata umwanzuro wo kwiyamamariza manda bamwe bafashe nk’iya gatatu bagatangira kwigaragambya.

N’ubu u Burundi bushinja u Rwanda kuruhungabanyiriza umutekano, ariko rwo rukabyamaganira kure.

Polisi y'u Burundi ikomeje guta muri yombi abantu benshi baba Abanyarwanda cyangwa Abarundi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved