Abanyarwanda 60 bahawe buruse zo kwiga mu Bushinwa

Yanditswe na Ishimwe Israel
Kuya 27 Kanama 2016 saa 12:46
Yasuwe :
0 0

Abanyeshuri 60 b’Abanyarwanda bahawe buruse na Leta y’u Bushinwa bazajya kwiga muri kaminuza zitandukanye muri iki gihugu, aho bazatangira amasomo yabo mu mpera z’uku kwezi.

Umubare w’abahabwa izo buruse wariyongereye kandi ukazakomeza kwiyongera mu rwego rwo gushyigikira uburezi bw’Abanyarwanda nk’uko ubuyobozi bw’u Bushinwa bubitangaza.

Mu mwaka ushize abanyeshuri bari hagati ya 35-40, nibo bahawe buruse.

Cao Zhimin wari uhagarariye Ambasaderi w’u Bushinwa mu Rwanda, yakiriye abo banyeshuri ku wa kane tariki ya 25 Kanama 2016, abaha impanuro mbere yo kwerekeza muri ayo masomo.

Ati “Nishimiye aba banyeshuri bagera kuri 60 babonye ayo mahirwe uyu mwaka, mu minsi mike bazafata iy’ikirere berekeze mu Bushinwa, aho bazakomeza icyiciro cya kabiri cya kaminuza, icya gatatu ndetse n’impamyabumenyi y’ikirenga.”

Inkuru ya The New Times ivuga ko Zhimin yababwiye ko yishimiye uburyo bashishikajwe no kunguka ubumenyi bushya burimo ururimi rw’Igishinwa, ikoranabuhanga, umuco ndese no kumenyana n’abaturage baho.

Ati “ Ndabizi neza mukeneye kuzamara igihe kinini mu ishuri mwiga amasomo yanyu y’ingenzi, ariko mbararikiye kwegera abaturage hanze ya kaminuza mukunguka byinshi ku Bushinwa.”

Cao yababwiye ko bahawe izo buruse nk’uko u Bushinwa bwiyemeje kuzamura ubumenyi bw’Abanyarwanda mu bijyanye n’uburezi , kuko bizera ko bufite uruhare rukomeye mu kubaka igihugu no kuzamura iterambere ryacyo.

Abo banyeshuri baziga amasomo abahesha impamyabumenyi yo mu cyiciro cya kabiri cya kaminuza, icya gatatu n’impamyabumenyi ihanitse mu masomo y’ubwubatsi (Civil Engineering), Icungamari, Ikoranabuhanga , Ubuhinzi, Ubuvuzi, Itumanaho, Ububanyi n’amahanga, Ubucuruzi ndetse n’Imenyekanishabikorwa mpuzamahanga byose biterwa inkunga na Guverinoma y’u Bushinwa.

Izo buruze zatanzwe mu rwego rwo gushyira mu bikorwa imigambi y’ingenzi 10, Perezida w’u Bushinwa Xi Jinping yemereye ibihugu by’Afurika mu nama iherutse kubera i Johannesburg muri Afurika y’Epfo.

Umunyamabanga Uhoraho muri Minisiteri y’Uburezi, Dr Célestin Ntivuguruzwa yagiriye inama abo banyeshuri kugenda bakihuza n’Abashinwa, bigira ku muco wabo n’imyitwarire yabo, bakazakurikirana amasomo n’umuhate mwinshi bakagarukana ubumenyi buzateza imbere u Rwanda.

Abanyeshuri 60 bahawe buruse zo kwiga mu Bushinwa
Cao Zhimin, umujyanama wa Ambasaderi w'u Bushinwa mu Rwanda
Umunyamabanga Uhoraho muri Minisiteri y'Uburezi, Dr Célestin Ntivuguruzwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244