Abanyarwanda bo muri Sénégal, Mali, Cap-Vert, Gambie na Guinea Bissau bizihirije hamwe Umunsi w’Intwari

Yanditswe na Uwimana Abraham
Kuya 7 Gashyantare 2021 saa 09:08
Yasuwe :
0 0

Abanyarwanda baba mu bihugu bihagarariwe na Ambasade y’u Rwanda muri Sénégal, ari byo Sénégal, Mali, Cap-Vert, Gambia na Guinée-Bissau, kuri uyu wa 6 Gashyantare 2021 bizihije Umunsi w’Intwari, basabwa kwimakaza indangagaciro nyarwanda, by’umwihariko gukunda igihugu kuko ari ryo zingiro ry’ubutwari.

Ibirori byo kwizihiza umunsi w’intwari kuri aba Banyarwanda baba muri ibi bihugu, byabaye hifashishijwe ikoranabuhanga ndetse binanyura kuri Televiziyo Rwanda.

Ibi birori byari byatumiwemo abantu batandukanye bahaye aba Banyarwanda baba mu mahanga ibiganiro bigaruka ku butwari.

Ambasaderi w’u Rwanda muri Sénégal, Jean Pierre Karabaranga, yavuze ko bahisemo kwizihiza Umunsi w’Intwari z’Igihugu kuri uyu wa 6 Gashyantare, kuko ku wa 1 Gashyantare ubwo wizihizwaga ku rwego rw’igihugu benshi bari mu mirimo isanzwe mu bihugu babamo ntibabasha kuwizihiza.

Karabaranga yavuze ko kwizihiza Umunsi w’Intwari ari inshingano za buri Munyarwanda aho ava akagera.

Ati “Umunsi w’Intwari ni umunsi udasanzwe mu buzima bw’igihugu cyacu, kwizihiza intwari zacu ni inshingano zacu, tugomba rero guhora tuzirikana igitambo intwari zatanze kugira ngo tube turi aho turi uyu munsi, tukaba turi u Rwanda rutekanye, u Rwanda rwunze ubumwe, u Rwanda rutera imbere umunsi ku wundi, kandi rwihaye agaciro ku ruhando mpuzamahanga.”

Umunyamabanga wa Leta muri Minisiteri y’Urubyiruko n’Umuco, Bamporiki Edouard, yagarutse cyane ku ndangagaciro ziranga Abanyarwanda ari nazo zituma umuntu abasha kuba intwari, avuga ko umuntu ukunda igihugu bitamunanira kuba intwari.

Ati “Indagagaciro ikomeye dufite ni iyo gukunda u Rwanda, gukunda igihugu, tukagira indi ndangagaciro y’ubumwe, tukagira indangagaciro y’umurimo, n’iyo twahera kuri izo ngizo kuko nizo ndangagaciro remezo.”

“Indangagaciro y’ubumwe igira umumaro mu bumwe n’ubwiyunge ariko ikagira n’umumaro mu kubaka u Rwanda, kuko buriya kuva kera ubumwe bwumvikanaga nk’ubukungu.”

Yakomeje avuga ko byose bihera mu gukunda igihugu. Ati “Buriya ukunda u Rwanda nta n’ubwo byamunanira kuba intwari, kuko ukunda u Rwanda ararurwanira, ukunda u Rwanda yarupfira, ukunda u Rwanda ararwubaka, kandi urwubatse aba ari muri wa murimo nawo dukangurirwa mu ndangagaciro zacu.”

Umugaba Mukuru w’Ingabo zirwanira mu kirere, Gen. Maj. Emmanuel Bayingana na we wari witabiriye uyu muhango, yavuze ko ubutwari butagaragazwa no gufata intwaro gusa, ko ahubwo bugaragazwa n’umutima wo gukunda igihugu ndetse n’intego afite muri rusange.

Yagize ati “Ntabwo gufata imbunda, gufata intwaro ari bwo butwari, kuko hari abazifata ari abacancuro babihemberwa, hari abafata intwaro ari abajura; ntabwo rero intwaro aribwo butwari, ubutwari ni wa mutima mbere na mbere, uvuga uti u Rwanda ndarwitangira ntizigamye, ese ubundi naba mbereyeho iki u Rwanda rubayeho nabi?”

Umuyobozi Mukuru w’Inama y’Igihugu y’Inararibonye, Tito Rutaremara, we yagarutse cyane ku mateka avuga ko umuco w’ubutwari ukomoka ku bakurambere, ari bo bagennye imibereho y’Abanyarwanda n’ubwo ngo byaje kwangizwa n’abakoloni.

Ati “Nibo babiduhaye, batwubakira intekerezo zacu z’Abanyarwanda, kuba buri muntu wese yisanga ariko cyane cyane kwagura Ubunyarwanda, nicyo gituma waba uri muri Senegal, waba uri muri Mali ugenda wagura Ubunyarwanda aho uri hose. Hanyuma batwubakira umurongo w’ubuyobozi, batwubakira n’indangagaciro.”

Yagarutse ku ngaruka zatewe n’ubukoloni avuga ko “Abakurambere bari barubatse umuco w’ubutwari, abakoloni baraza banyaga Abanyarwanda indangagaciro, baratumaze kuko batwambuye Ubunyarwanda, batwambura ubumuntu, twari dusigaye turi ibishushungwe.”

Rutaremara yavuze ko kuba kuri ubu Abanyarwanda bahora baharanira kwisubiza agaciro, ari uko bagahoranye na mbere, ariko bakakanyagwa muri ibyo bihe, yavuze ko ubu ibintu byagiye bigenda bisubira mu buryo, ari nayo mpamvu hashimirwa intwari zabirwaniye.

Kwizera Christelle, nk’umwe mu rubyiruko rwakoze ibikorwa by’indashyikirwa wari witabiriye ibi biganiro, na we yakanguriye urundi rubyiruko rugenzi rwe gukanguka rukareba igikenewe rushobora gukora mu bushobozi bwarwo cyafasha igihugu rukagikora, nk’uko na we yabonye ko mu gihugu henshi hari ikibazo cy’amazi akiyemeza kugeza amazi meza hirya no hino mu byaro binyuze muri Water Access Rwanda.

Umunsi w’Intwari z’Igihugu wizihijwe mu gihugu ku wa 1 Gashyantare 2021, ariko bikorwa mu buryo bw’ikoranabuhanga kubera icyorezo cya COVID-19

Uyu muhango wabaye hifashishijwe ikoranabuhanga,Umuyobozi Mukuru w’Inama y’Igihugu y’Inararibonye,Tit o Rutaremara ni umwe mu baganirije aba Banyarwanda baba mu mahanga
Tito Rutaremara yibukije aba Banyarwanda ko umuco w'ubutwari ukomoka ku bakurambere
Ambasaderi w’u Rwanda muri Sénégal, Jean Pierre Karabaranga, yavuze ko bahisemo kwizihiza Umunsi w'Intwari ku wa 6 Gashyantare kuko umunsi wa nyawo wasanze abenshi bari mu kazi
Umunyamabanga wa Leta muri Minisiteri y’Urubyiruko n’Umuco, Bamporiki Edouard yasangije abitabiriye iki kiganiro indangagaciro zarangaga Abanyarwanda
Umugaba Mukuru w’Ingabo zirwanira mu kirere, Gen. Maj. Emmanuel Bayingana yavuze ko ubutwari butagaragazwa no gufata intwaro
Aba Banyarwanda baba mu mahanga bagize umwanya wo kubaza no kungurana ibitekerezo n'ababagejejeho ikiganiro cyibanze cyane ku butwari bwaranze Abanyarwanda
Iki kiganiro cyatumiwemo abatumirwa batandukanye bose bagarutse ku butwari bwaranze Abanyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .