Kwamamaza

‘Abanyarwanda baba mu mahanga tuzabagarura ku gicumbi cy’umuco muri Rwanda Day’

Yanditswe kuya 19-09-2016 saa 20:44' na Rabbi Malo Umucunguzi


Umunyamabanga Nshingwabikorwa wa Komisiyo y’Ururimi n’Umuco, Dr James Viningoma, avuga ko bitewe n’amateka u Rwanda rwanyuzemo, hakenewe ko Abanyarwanda bakomeza gusigasira indangagaciro nyarwanda nk’umurage wa Gihanga, byose bikazagarukwaho muri Rwanda Day izabera i San Francisco kuwa Gatandatu w’iki Cyumweru.

Kuwa 24 Nzeri, Perezida Kagame azahurira n’Abanyarwanda muri Hotel yitwa Marriott Marquis mu Mujyi wa San Francisco muri Leta ya California muri “Rwanda Cultural Day”.

Dr Vuningoma avuga ko kuba ‘Rwanda Day’ yarahujwe n’umuco ari ikintu cyiza cyane, bishimira nko mu Nteko Nyarwanda y’ururimi n’umuco na Minisiteri ya Siporo n’Umuco by’umwihariko.

Ati “Tugiye kugaragariza Abanyarwanda inshingano zikomeye zo kugira umuco, isoko yo kuvomamo ibintu byinshi bigize Abanyarwanda, bigize ubukungu bw’Abanyarwanda, kandi ko biranagaragara ko buriya iterambere turimo nirishingira ku muco w’Abanyarwanda rizaba ari iterambere ritaza nk’inzaduka ahubwo riza rishingiye ku byo Abanyarwanda bemera, bumva, biri mu migenzererze yabo, mu mivugire yabo, mu mibanire yabo n’abandi,’’

“Tugiye kuganira nabo, tubagezeho ibikorerwa mu bushakashatsi mu Nteko Nyarwanda y’Ururimi n’Umuco birimo izi ndangagaciro zimbitse, ari indangagaciro remezo, tuzibagezeho, ari izindi ndangagaciro zizishamikiyeho, nabo bumve ko ibyiza by’iwabo bakwiye kubigiramo uruhare kandi bakwiye kubikunda.’’

Dr Vuningoma yavuze ko bizaba umwanya wo gusogongeza Abanyarwanda baba mu mahanga ku ndangagaciro kuko akenshi batazimenye.

Ikindi ngo abazitabira Rwanda Day bazasangizwa ibitabo bigaruka ku bushakashatsi ku muco n’ururimi harimo nk’ibigaruka ku Bisi bya Huye, Rukara, imyandikire y’ikinyarwanda.

Dr Vuningoma yakomeje agira ati “Umunyarwanda ashobora guta umuco kubera kurarikira [iby’ahandi] ariko iyo tuzi ko mu murage wacu harimo ibintu twiyubakamo bitavamo, hari ibyo twimukana. Ariko twibuke ko amateka yacu yagiye agira ingaruka ku munyarwanda uwo ariwe wese. Mu gihe cy’ubukoloni, turabizi, mu gihe cy’amashuri, igihe cy’amadini. Igihe cy’intwaro ya ba gashakabuhake, ibyo byose byagiye bigira ingaruka ku muco.”

“Niba ushaka kwigira, niba ushaka kugaragara ko uri Umunyarwanda nyakuri, rinda uyu murage wa Gihanga, ibindi byose ni ibyo dukoresha kugira ngo duhahe tubone uko tubaho, tubone uko tubana n’abandi. Imiryango yo mu mahanga bafite abana barera, baba muri iyo miryango, ni ukubakangurira kugaruka ku isoko y’umuco w’u Rwanda, bakamenya ibiwugize, bakamenya iyo myumvire, iyo myifatire, iyo mivugire, yemwe bakavuga Ikinyarwanda.”

Vuningoma avuga ko mu gihe ikoranabuhanga rikomeje gukataza n’iterambere ryihuta, bituma abanyarwanda bo mu mahanga bahura n’imico yo hanze ku buryo batitonze indangagaciro z’ibindi bihugu zibavangira.

Ati “Iyo umuntu rero atitonze agafata byose, ibyo bigira ingaruka kuri wa muco na wa mwimerere w’Umunyarwanda, mu myumvire ye, mu migenzereze ye, mu mivugire, mu mibanire ye n’abandi, mu myambarire, iyo avuga ugasanga aravanga indimi, ibyo byose bituruka ko aba akunze kuruta ikinyarwanda, akakirutisha icyongereza, igifaransa, Igiswayile, ilingara…”

Umunyamabanga Nshingwabikorwa wa Komisiyo y’Ururimi n’Umuco, Dr James Viningoma

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved