Abanyarwanda baba mu Bufaransa bareze Charles Onana ushinjwa guhakana jenoside yakorewe Abatutsi

Yanditswe na Karirima A. Ngarambe, Twarabanye Venuste
Kuya 29 Ugushyingo 2019 saa 08:46
Yasuwe :
0 0

Umunyamategeko w’Umuryango w’Abanyarwanda baba mu Bufaransa (CRF), Me Richard Gisagara yatangaje ko bashyikirije Umushinjacyaha wa Repubulika muri Parike ya Paris, ikirego ku kibazo cy’umwanditsi w’ibitabo, Charles Onana wagaragaye ahakana ndetse apfobya Jenoside yakorewe Abatutsi mu kiganiro cyatambutse kuri televiziyo LCI yo mu Bufaransa.

Ku wa Gatandatu, tariki 26 Ukwakira 2019, nibwo umunyamakuru Vincent Hervouët wa Televiziyo y’Abafaransa LCI y’Ishyirahamwe TF1, yakiriye Charles Onana, mu kiganiro ‘Tout un Monde’ baganira ku gitabo yanditse kuri ‘Operation Turquoise’ yise “Rwanda, la verite sur l’operation Turquoise”.

Icyo kiganiro nicyo Charles Onana ukomoka mu gihugu cya Cameroun akaba afite n’ubwenegihugu bw’u Bufaransa, yavugiyemo ko nta Jenoside yabayeho yakorewe Abatutsi mu Rwanda, yongeraho ko nta n’indi Jenoside yabayeho kuva 1900 kugeza 1994.

Umuryango w’abanyarwanda baba mu Bufaransa wahise utangaza ko utakomeza kwihanganira uwo mugabo wigeze kuvuga ko Jenoside yakorewe Abatutsi ari cyo kinyoma kinini cyakozwe muri Afurika, utangira gutegura ikirego.

Me Gisagara yabwiye IGIHE ko bamaze kumva icyo kiganiro batihutiye gutanga icyo kirego ahubwo ko babyamaganye ndetse bakandikira urwego rw’abanyamakuru n’urwa Televiziyo yaciyeho ikiganiro basaba ko hafatwa ingamba zo guhana.

Ati “Umuryango w’abanyarwanda baba mu Bufaranza wabanje kwandikira urwego rukuru rugenga abanyamakuru mu Bufaransa, usaba ko hafatwa ingamba kugira ngo amagambo nkayo yavugiwe kuri televiziyo ahanwe, unandikira ubuyobozi bwa Televiziyo LCI ubusaba ko bwakwisobanura kuri ibyo bintu byakozwe noneho tukareba icyo twakora bitewe n’ibisubizo izo nzego zombi zatanga.”

Me Gisagara avuga ko nyuma y’iminsi ibiri ikiganiro kibaye yashyikirije izo nzego zombi amabaruwa icyakora ngo urwego rw’abanyamakuru ntabwo rwigeze rusubiza naho Televisiyo LCI yo yasubije mu cyumweru gishize ariko itanga ibisobanuro bitabanyuze.

Ati “Yaradusubije mu cyumweru gishize ariko ibaruwa batwoherereje ntabwo yatunyuze niyo mpamvu CRF yahise ifata icyemezo cyo gutanga ikirego noneho, inkiko akaba arizo zikemura icyo kibazo.”

Avuga ko impamvu ibaruwa itabanyuze ari uko LCI yahunze ikibazo ahubwo ikibanda gusobanura ibyo yakoze ivuga ko kuva kera yakomeje gutanga ibiganiro bivuga uko Jenoside yakorewe Abatutsi yabaye ariko ntibavuga ku kiganiro Onana yaherewemo urubuga.

Ibaruwa CRF yahawe na Parike y’i Paris yerekena ko ikirego yacyakiriye ku wa 27 Ugushyingo 2019 [kuwa Gatatu].

Me Gisagara ati “Uyu munsi rero twashyikirije umushinjacyaha wa Repubulika i Paris ikirego, turega Charles Onana, kubera ayo magambo yavuze ku bwacu tubona ahanwa n’itegeko ryagiyeho, rihana umuntu wese upfobya cyangwa uhakana Jenoside yakorewe abatutsi. Kuva ryajyaho rigomba gukurikizwa, ntabwo abantu bakomeza ujya bitwara uko bitwaraga kuva kera na kare, bicare bapfobya Jenoside cyangwa bayihakana ngo babure gukurikiranwa.”

Mu bijyanye n’amategeko, avuga ko iyo icyaha cyakorewe kuri televiziyo hadahanwa gusa uwavuze, ahubwo n’umuyobozi w’igitangazamakuru iyo atanyomoje cyangwa ngo yitandukanye n’ibyatangajwe ahanwa kimwe n’umunyamakuru wamwakiriye bose barakurikiranwa.

Me Gisagara avuga ko nyuma yo gutanga ikirego mu mezi atatu bahereye umunsi cyatanzweho, umushinjacyaha, natagira icyo akora, cyangwa agasubiza ko atazagishyikiriza inkiko abatanzweho ikirego, umuryango w’abanyarwanda baba mu Bufaransa bazabijyanira mu nkiko.

Guhera mu 2017, mu Bufaransa hashyizweho itegeko rihana umuntu wese uzajya ahakanira Jenoside yakorewe Abatutsi ku butaka bw’icyo gihugu.

Iri tegeko rihanisha icyaha cy’ihakana n’ipfobya rya Jenoside yakorewe Abatutsi igifungo cy’umwaka umwe n’ihazabu y’amayero 45 000 (asaga miliyoni 36 z’amanyarwanda).

Iri tegeko riteganya kandi ingingo iha uburenganzira amashyirahamwe yose arengera abarokotse gukurikirana mu nkiko abantu bose bahakana jenoside cyangwa se bakayipfobya, mu gihe cyose ubushinjacyaha butabikoze cyangwa buzaririye mu kubakurikirana.

Charles Onana uzwiho guhakana no gupfobya Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza