Abanyarwanda 36 bari guhugurwa byihariye ibizabafasha gushakira ibisubizo ibibazo by’amazi, isuku n’isukura

Yanditswe na Evariste Nsengimana
Kuya 2 Nyakanga 2019 saa 09:43
Yasuwe :
0 0

Abanyarwnda 36 bari guhabwa amahugurwa yo ku rwego mpuzamahanga azabafasha kunoza igenamigambi no guhuza ibikorwa bigamije gusubiza ibibazo by’amazi, isuku n’isukura mu Rwanda.

Aya mahugurwa agamije kunoza igenamigambi ry’amazi, isuku n’isukura mu mijyi ITP SUWAS (International Training Programme on Sustainable Urban Water and Sanitation).

Bayahabwa n’Umuryango WaterAid ufatanyije n’ikigo cya Suède gishinzwe iterambere(Sida) n’ikigo gitanga ubujyanama ku mishinga igamije impinduka mu muryango, Niras.

Niras ihugura abashinzwe ibikorwa by’amazi, isuku n’isukura bakora mu bigo bya Leta, ibyigenga na sosiyete sivile bo mu bihugu birimo Kenya, u Rwanda, Tanzania, Uganda na Zambia.

Ni amahugurwa agamije n0 kubongerera ubumenyi mu buryo bwo gukurikirana no gucunga ibikorwa by’amazi, isuku n’isukura, kunoza imikoranire no gusangira ubumenyi hagati y’abashinzwe ibyo bikorwa kugira ngo barusheho guhanga udushya n’imishinga ifasha gukemura ibibazo byugarije abaturage.

Impuguke mu kigo cyo muri Suède gishinzwe ibidukikije (Stockholm Environment Institute), ushinzwe gukurikirana abahabwa aya muhugurwa muri icyo gihugu, Dr Nelson Ekane, yavuze ko bayahabwa mu byiciro bitanu mu gihe cy’amezi 15.

Icyiciro cya mbere kimara amezi ane, basesengura ku rwego rw’ibigo bakorera imbogamizi zituma gahunda y’amazi, isuku n’isukura bitagerwaho uko bikwiye.

Icya kabiri kimara ibyumweru bitatu, bahurira muri Suède na bagenzi babo baturutse mu bindi bihugu bakaganira ku mbogamizi urwego rw’amazi, isuku n’isukura mu bihugu byabo rufite, bagasesengura ikibitera n’uko byakemuka babinyujije mu mishinga itanga ibisubizo.

Icyiciro cya gatatu kimari amezi ane, basubira mu bihugu byabo bagashyira mu bikorwa imishinga yabo itanga ibisubizo by’ibibazo urwego rw’amazi, isuku n’isukura rufite, bakagira n’umwanya wo guhura bakaganira ku byo bagezeho.

Icyiciro cya Kane kimara ibyumweru bibiri, bahurira muri kimwe mu bihugu iyi gahunda ikorerwamo bagasangira ubunararibonye bw’uko imishinga bakora iri gutanga ibisubizo babifashijwemo n’ushinzwe kubakurikirana ku rwego rw’igihugu.

Dr Nelson ati “Ku cyiciro cya kane, bakora raporo y’aho bageze bashyira mu bikorwa imishinga itanga ibisubizo bakoze bakayiha ushinzwe kubakurikirana no kubafasha ku rwego rw’igihugu akareba irimo ishirwa mu bikorwa. Iyo bahuye n’imbogamizi, nazo barazivuga akabagira inama.”

Icyiciro cya nyuma kimara amezi atanu, basubira mu bihugu byabo, bagakomeza gushyira mu bikorwa imishinga yabo bagamije gushakira ibisubizo ibibazo bihari bafatanyije n’abo bakorana n’abashinzwe kubakurikira.

Ati “Icyo tubitezeho ni uko bashobora gushishikariza abakoresha babo, bagenzi babo bakorana impamvu ari ngomba gushyira mu igenamigambi ryabo no gukurikirana ibikorwa by’amazi, isuku n’isukura.”

Umuyobozi ushinzwe ibikorwa muri WaterAid, unashinzwe gukurikirana abahugurwa muri uwo mushinga mu Rwanda, Dr. Sebareze Jean Lambert, yavuze ko ’Icyo WaterAid ifasha ari ugushyira mu bikorwa uyu mushinga, dushaka abashinzwe amazi, isuku n’ isukura mu bigo, bashyirwa muri iyi gahunda’.

WaterAid inabafasha kubona ibyo basabwa mu guhabwa aya mahugurwa no gukurikirana uko bashyira mu bikorwa imishinga bahitamo ikemura ibibazo biba byaragaragajwe n’ubushakashatsi.

Ati “Ibyo bibazo byose baba baragaragaje, bakora imishinga ibikemura, tukabafasha gukurikirana ishyirwa mu bikorwa ry’iyo mishinga no kongera kubafasha kugira ngo ibyo bagenda bageraho babisangize n’abandi.”

Uyu mushinga mu Rwanda watangiye 2017. Dr Sebareze yavuze ko abantu 137 basabye kujya muri iyi gahunda ariko 36 nibo bari kuyikurikirana, 12 bahawe impamyabumenyi z’uko bayarangije.

Ku wa 27 Kamena ubwo abahahugurwa muri iyo gahunda bahuriraga mu nama igamije kureba uko bashyira mu bikorwa imishinga yabo, babiri bayisoje bahawe impamyabumenyi.

Eng. Turikumwe Emmanuel, usanzwe akorera umuryango ukora ibijyanye no kugeza amazi meza ku baturage COFORWA, yavuze ko yakoze umushinga wo kwita ku mavomero rusange no kugabanya amazi ameneka.

Abinyujije muri uwo mushinga, amaze guhugura abashinzwe amavomero rusange 10 uburyo bagabanya amazi ameneka bigatera igihombo.

Umukozi muri Ambasade ya Suède ushinzwe gahunda y’ibidukikije n’ihindagurika ry’ibihe, Mashinga Théobald, yavuze ko impamvu guverinoma ya Suède yahisemo kubaha aya mahugurwa ari ukubongerera ubumenyi muri gahunda y’igenamigambi no guhuza ibikorwa by’amazi, isuku n’isukura bashinzwe.

Ati “Dukeneye kumenya ni gute aya mahugurwa agiye kugufasha impinduka mu mikorere y’ibyo ushinzwe. Ni gute ibyo uyakuyemo bigiye kugufasha mu igenamigambi no guhuza ibikorwa by’amazi, isuku n’isukura mu kigo ukorera kuko ibyo ukuye hano ntabwo uzabyikubira, uzabisangiza abo mukorana.”

Yabasabye guharanira kwereka abayobozi babo ibyiza byo kwita ku igenamigambi ry’amazi, isuku n’isukura mu bigo bakorera.

Nyuma y’iyi nama bemeranyijwe gushyiraho ihuriro rigamije kubafasha kungurana ibitekerezo bibafasha mu mishinga yabo no ku bibazo by’isuku n’isukura muri rusange.

Bamwe mu bari muri gahunda yo guhugurwa
Dr Nelson Ekane, yavuze ko bayahabwa mu byiciro bitanu mu gihe cy'amezi 15
Dr Sebareze yavuze ko abantu 137 basabye kujya muri iyi gahunda ariko 36 nibo bari kuyikurikirana, 12 bahawe impamyabumenyi z'uko bayarangije
Mashinga Théobald, yavuze ko impamvu guverinoma ya Suède yahisemo kubaha aya mahugurwa ari ukubongerera ubumenyi muri gahunda y’igenamigambi no guhuza ibikorwa by’amazi, isuku n’isukura bashinzwe
Nyuma y'amahugurwa bafashe ifoto rusange
Turikumwe Emmanuel ashyikirizwa impamyabumenyi nyuma yo kurangia amahugurwa
Dr Nelson Ekane, yavuze ko bayahabwa mu byiciro bitanu mu gihe cy'amezi 15

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza