Kwamamaza

Abanyarwanda 28 bagaruriwe ku mupaka w’u Burundi bagiye gucuruzwa muri Australia

Yanditswe kuya 19-09-2016 saa 17:44' na Niyonsenga Schadrack


Polisi y’u Rwanda yerekanye Abanyarwanda bagera kuri 28 bo mu ngeri zose babeshywe ko bagiye gushakirwa ubuzima bwiza muri Australia.

Aba bagaruwe bikekwa ko bari abakirisitu bo mu Itorero Restoration Church bakaba baragiye bashukwa n’abashakaga ku bacuruza babasangaga mu busitani busengerwamo i Masoro aho babaga bari gusengera.

Aba batwawe bashatse ibyangombwa byo kujya i Burundi mu buryo bwemewe mu biro bishinzwe abinjira n’abasohoka mu Rwanda bagenda ku buryo buzwi.

Umuvugizi wa Polisi y’u Rwanda,ACP Twahirwa Celestin, yagize ati“Ikidasanzwe cyagaragaye ni uko mu kubumvisha banyuze mu gusenga ariko nyuma barababwira bati tuzahurire i Burundi ni ho tuzabashakira ibyangombwa bibajyana muri Australia, bagiye ku buryo butandukanye, harimo n’abajyanye n’imiryango yabo n’abana n’abagore.”

ACP Twahirwa avuga ko aba batwawe babonye bakomeje gutinzwa i Burundi batangira kubona ko babeshywe, nyuma bagarurwa ku mupaka w’u Rwanda n’u Burundi, aho abagera kuri 13 bagaruwe ku mupaka wa Ruhwa na ho abandi 15 babacisha ku mupaka w’Akanyaru.

Umuvugizi wa Polisi y’u Rwanda,ACP Twahirwa Celestin

Polisi ivuga ko ubwo bari ku mupaka batabashaga gusobanura uko bagiye n’uko bagarutse ibi bikaba ari byo byatumye habaho gukurikirana iki kibazo biza kugaragara ko bari bajyanywe gucuruzwa.

Aba bagaruwe basobanura ko mbere y’uko bajyanwa bari bijejwe ibitangaza ariko nyuma bakaza kubona ko bibeshye cyane.

Aba bari batwawe ni benshi ku basanzwe bajyanwa, ibintu Umuvugizi wa Polisi avuga ko byatewe n’uko banyuze mu itorero bakabasha kumvisha abantu benshi, ikindi ngo ni uko uwabwirwaga yahitaga abwira na mugenzi we.

Umwe mu bari batwawe yagize ati “Batubwiye ko bashaka kudushakira akazi muri Australia, ariko ko bisaba amafaranga, umuntu mukuru yagombaga gutanga miliyoni, kuko rero twari bakuru turi babiri njye na madamu, twatanze miliyoni ebyiri, abana bo ntabwo batangaga amafaranga. Uko yari yabinyigishije yambwiraga ko nitugerayo bazaduha inzu, mbese ibintu byiza bibaho.”

Icyakora bashimiye Polisi y’u Rwanda ku kuba yabashije kubagarura ntibajye gucuruzwa.

Polisi y’u Rwanda yasabye abanyamadini kwibuka kwita ku mutekano w’abayoboke babo ndetse banamenya abantu bose baba bari mu idini.

Yagize ati “Umukirisitu aba azi ko umukozi w’Imana atabeshya, ibyo amubwiye abyemera byose, abanyamadini rero tubasaba kugira uruhare mu gutahura umugambi mubisha wakwihisha mu nsengero zabo. Aba bikekwa ko basengeraga muri Restoration Church, bagiye bashishikarizwa kugenda babasanze mu busitani bw’amasengesho i Masoro.”

Abantu n’ubwo bagarutse ariko bigaragara ko bagiye gutangirira mu buzima butoroshye bitewe n’uko bari baragurishije imitungo yabo yose mbere yo kugenda.

Umuvugizi wa Polisi y’u Rwanda yatangaje ko aba bose bagiye kurekurwa basubire mu miryango yabo kuko ngo byagaragaye ko nta mugambi mubi bose bari bafite.

Abari bashutswe basanzwe aho basengeraga mu busitani i Masoro
Bari bapakiye ibikapu

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved