Kwamamaza

Abanyarwanda 11 barekuwe na ICTR bari mu cyeragati

Yanditswe kuya 14-09-2016 saa 09:20' na Cyprien Niyomwungeri


Bamwe mu barangije ibihano n’abagizwe abere n’Urukiko Mpuzamahanga Mpanabyaha rwashyiriweho u Rwanda (ICTR), bagera kuri 11 baheze mu cyeragati nyuma yo kubura ibihugu bibakira.

Abo barimo umunani bagizwe abere n’abandi batatu bahawe ibihano barabirangiza bakomeza kuba i Arusha ngo bashakirwe ibihugu bibaha ubuhungiro kuko bahakanye ko batasubira mu Rwanda ngo batagirirwa nabi.

Ikinyamakuru The Citizen gitangaza ko hari amakuru yizewe cyakuye mu bantu b’imbere mu rwego MICT rwashyizweho ngo rusimbure ICTR, avuga ko hari ibihugu byinshi byaganirijwe ngo byakire abo barangije ibihano byabo n’abarekuwe ariko ntihagira na kimwe kibyemera.

Kuva rwatangira guca imanza mu 1997 kugeza mu Ukuboza umwaka ushize, Urukiko rwa ICTR rwahamije ibyaha abagera kuri 61, rugira abere abagera kuri 14 muri bo batandatu gusa nibo bamaze kubona ibihugu bibakira.

Harimo Bagilishema Ignace na Mpambara Jean, bakiriwe n’u Bufaransa, Bagambiki Emmanuel na Gen. Augustin Ndindiliyimana bakiriwe n’u Bubiligi; Rwamakuba André wasanze umuryango we mu Busuwisi na Padiri Nsengimana Hormisdas wakiriwe muri diyoseze yo mu Majyaruguru y’u Butaliyani, aho yasubiye mu mirimo ye y’Ubupadiri.

Abatarabona ibihugu bibakira harimo André Ntagerura wahoze ari Minisitiri w’Ubwikorezi, Jerome Bicamumpaka wari Minisitiri w’Ububanyi n’Amahanga, Justin Mugenzi wari Minisitiri w’Ubucuruzi, Casimir Bizimungu wari Minisitiri w’Ubuzima, Prosper Mugiraneza, n’abandi bahoze ari abasirikare bakuru n’abacuruzi.

Nubwo abo barekuwe batarabona ibihugu bibakira, ntabwo bemerewe kuva Arusha kuko nta mpapuro zibemerera kugenda bafite. Izi mpapuro zigomba guturuka mu gihugu bakomokamo aricyo u Rwanda.

Icyakora mu 2014, Leta ya Tanzania yemeje ko ifite ubushobozi bwo kwakira no gutuza Abanyarwanda babuze ibihugu bibakira nyuma yo kurekurwa n’Urukiko Mpuzamahanga Mpanabyaha rwashyiriweho u Rwanda (ICTR).

ICTR yafunze imiryango ariko haracyahigwa abakekwaho uruhare muri Jenoside bagera kuri batandatu, abo ni Felicien Kabuga, wanashyiriweho miliyoni eshanu z’amadolari ku uzatanga amakuru yatuma atabwa muri yombi.

Hari kandi Pheneas Munyarugarama, Fulgence Kayishema, Charles Sikuwabo, Ryandikayo na Aloys Ndimbati. Aba nibafatwa bazoherezwa kuburanira i Kigali.

Ababuranishijwe na ICTR barimo abari abasirikare bakuru, abayobozi muri Guverinoma, abanyapolitiki, abacuruzi, abanyamadini, abanyamakuru n’interahamwe.

Urukiko Mpuzamahanga Mpanabyaha rwashyiriweho u Rwanda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved