Abanyamuryango ba RFTC basobanuriwe amoko y’abanyarwanda nyakuri muri gahunda ya ‘Ndi umunyarwanda’

Yanditswe na David Eugène Marshall
Kuya 9 Nyakanga 2018 saa 08:58
Yasuwe :
0 0

Abanyamuryango b’ishyirahamwe ry’amakoperative atwara abagenzi, RFTC basobanuriwe gahunda ya Ndi Umunyarwanda ndetse n’icyatumye abanyarwanda bacikamo ibice kugeza habaye Jenoside yakorewe Abatutsi muri Mata 1994.

Ibi biganiro byabaye kuri uyu wa 06 Nyakanga 2018 i Remera. Amacakubiri mu banyarwanda yatangiye ubwo abakoloni bageraga mu gihugu mu mpera z’ikinyejana cya 19. Nibwo amoko y’abahutu, abatutsi n’abatwa yashimangiwe ndetse abakoloni bemeza ko buri bwoko bufite inkomoko yabwo itandukanye n’ubundi.

Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge, Fidѐle Ndayisaba, yavuze ko iby’ubuhutu n’ubututsi byahoze ari ibyiciro by’imibereho n’ubutunzi by’abanyarwanda, ko uwagiraga ubutunzi n’amashyo yitwaga umututsi, utunze ibiringaniye ari umuhinzi akitwa umuhutu. Iyo umuhutu yakoraga akagira amashyo yavaga mu buhutu akitwa umututsi naho uwari umutunzi yanyangwa cyangwa agakena akitwa umuhutu.

Yavuze ko amoko nyayo y’abanyarwanda ari Abega, abasindi, abazigaba, abacyaba, abagesera n’andi uko ari 19.

Ndayisaba yagize ati “Nimurebane, dore muri abavandimwe kandi muri umuryango umwe, mwitegereze ntawureshya n’undi, nta n’uwavuga ko afite izuru risa n’iryundi ijana ku ijana”.

Yaboneyeho kwibutsa abari aho ko ibanga ry’abakoloni ryo gucamo abanyarwanda ibice no kubemeza ko inkomoko yabo ari ahandi, bwari uburyo bwo kugira ngo buri wese yiyumve ko ntaho ahuriye n’igihugu cye, ibyo kugikunda no kubumbatira ubumwe bwacyo birangirire aho.

Mu buhamya bwatangiwe aho, uwitwa Mujyarugamba Pierre Claver wahoze ari mu basirikare barindaga Habyarimana Juvènal, yavuze ko nta kintu cyasimbura ubunyarwanda.

Yagize ati “Nahoze ndi umujepe narapakiwemo ingengabiterezo mbi ku buryo bukomeye. Narwanye n’Inkotanyi intambara zitandukanye, mpungira muri Congo ariko ngarutse ndigishwa, menyeshwa bundi bushya ko Ndi Umunyarwanda mbere y’ibindi byose, none ubu turi umwe twubaka igihugu cyacu nk’abanyarwanda”.

Abari aho bishimiye ibi biganiro kuri gahunda ya “Ndi Umunyarwanda”, ndetse banasaba ko n’abatarabihabwa byabageraho.

Iyi gahunda izakomereza no mu bindi bice by’igihugu aho RFTC ifite abanyamuryango.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza