Kwamamaza

Abanyamadini beretswe uko ingengabitekerezo ihagaze mu Banyarwanda

Yanditswe kuya 19-09-2016 saa 11:36' na Cyprien Niyomwungeri


Ubushakashatsi bwa Komisiyo y’Igihugu y’Ubumwe n’Ubwiyunge, NURC (National Unity and Reconciliation Commission) bwerekana ko 79.2% by’abaturage bo muri Musanze babona ko abantu bakibonana mu ndorerwamo y’amoko naho abagera kuri 78.9% bavuga ko hari Abanyarwanda bagifite ingengabitekerezo ya jenoside.

Abayobozi b’amadini atandukanye akorera mu Rwanda bamurikiwe ubu bushakashatsi banasabwa umusanzu wo kugira ngo bagire uruhare mu gutuma Abanyarwanda babana neza.

Intego y’ubushakashatsi bwa NURC ni ukumva ibyo Abanyarwanda b’ingeri zose basubiza ku ngingo zijyanye no kureba imibanire yabo, nko kumvikana ku mateka y’ibyabaye, kwemera kugira icyerekezo kimwe,kwiyumvamo isano imwe y’ubunyarwanda kurusha ibindi, kugirira icyizere ubuyobozi, umutekano n’imibereho myiza bya bose,uburenganzira bungana n’ubutabera kuri bose, ndetse no kwiyumvanamo kw’abenegihugu.

Umushumba wa Diyosezi ya Kabgayi,Smaragde Mbonyintege, yavuze ko imibare igaragara muri ubu bushakashatsi itanga icyizere mu mibereho no mu mibanire y’Abanyarwanda ariko ku rundi ruhande hari uturere duteye impungenge.

Akomeza avuga ko nk’Abanyamadini bagiye gukomeza kuganiriza abantu bakamenya amateka mabi bakava mu myumvire y’amoko no mu ngengabitekerezo ya Jenoside.

Yagize ati “Nk’abanyamadini umurimo wacu ni ugufasha abantu kwegerana bakaganira umuntu akimenya, akamenya aho ahagaze mu mitekerereze no mu myumvire y’ikibazo cy’amoko.Ni urugendo rukomeye dukwiye gukomeza gukora cyane cyane mu bantu kugira ngo bamenye amateka mabi.”

Mbonyintege asanga uturere tugaragaramo abaturage bafite ingengabitekerezo ya Jenoside no kwibonanamo mu ndorerwamo y’amoko, bakwiye guhabwa urubuga bakegerana n’abandi bagatinyuka bagashira ubwoba ntibarebe abandi ngo bavuge ko bangiza umutekano wabo ahubwo bakababona nk’abo bafatanya bakagira icyo bageraho.

Uturere turindwi turakibona cyane mu ndorerwamo y’amoko

Uturere twa Musanze,Rubavu, Gasabo, Nyarugenge, Ruhango, Nyanza na Nyagatare nitwo turere abaturage batwo bagaragaje ko babona hari abakibona mu ndorerwamo y’amoko n’abagifite ingengabitekerezo ya Jenoside kuruta utundi.

Musanze iza ku mwanya wa mbere n’abantu 79.2% bavuze ko babona hari abakibona mu ndorerwamo y’amoko na 78.9% bagifite ingengabitekerezo ya Jenoside.

Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge, Fidèle Ndayisaba, avuga ko zimwe mu mpamvu zibitera ari ibisigisigi by’amateka bikiri mu baturage ba turiya turere.

Yagize ati“Muri turiya turere usanga mu mateka y’igihe cy’amacakubiri na politiki mbi harabayemo ibikorwa by’ivangura n’ikandamiza byibasiye abatuye muri ibyo bice cyane cyangwa ugasanga abatuye muri ibyo bice na bo baratojwe igihe kirekire urwango n’ivangura bitewe n’imiyoborere yari iriho, bitewe n’abayobozi bamwe bakomoka muri ibyo bice bagize uruhare mu kubyigisha cyane.”

Yongeraho ko nko mu Majyaruguru n’Uburengerazuba ari ibice byegereye umupaka ahakigaragara imitwe igendera ku ngengabitekerezo ya Jenoside.

Ndayisaba ashimangira ko umuti uzavura turiya turere ari ugukomeza kwigisha abayobejwe igihe kirekire kwimakaza Ndi Umunyarwanda no kwitabwaho cyane mu cyumweru cyahariwe Ubumwe n’ubwiyunge kizatangira kuwa 1-7 Ukwakira 2016.

Zimwe mu ngingo zakozweho ubushakashatsi n’ibyavuyemo

Ku ngingo ibaza niba hakiri Abanyarwanda bibona mu ndorerwamo z’amoko, Akarere ka Nyanza kaza imbere mu Ntara y’Amajyepfo n’ijanisha rya 67.1 mu gihe muri iyi Ntara akarere gatanga icyizere kuri iyi ngingo ari Nyamagabe iri kuri 33.3%.

Kuri iyo ngingo Akarere ka Musanze kaza imbere mu gihugu hose ku ijanisha rya 79.2, mu gihe uturere dutanga icyizere ari Rutsiro iri kuri 26.7% na Gakenke iri kuri 29.9%.

Ku kuba hakiri Abanyarwanda babiba amacakubiri n’ingengabitekerezo ya Jenoside, Akarere ka Nyanza kaza imbere mu Ntara y’Amajyepfo ku ijanisha rya 63.9%, mu gihe Akarere ka Nyamagabe ariko n’ubundi gatanga icyizere na 33.6%.

Kuri iyo ngingo Musanze iza imbere mu gihugu hose na 78.9%, igakurikirwa na Rubavu ifite 77.3%, Gasabo iba iya gatatu na 69.5%, mu gihe Uturere dutanga icyizere ari Rutsiro iri kuri 27.2% na Gakenke iri kuri 29.1%.

Ku ngingo ibaza niba hari icyizere ko Jenoside itakongera kuba mu Rwanda, Nyanza ifite icyizere gike ugereranyije n’utundi twose mu gihugu, kuko 63.4% babona itakongera kuba, bivuze ko 32.8% babona yakongera, mu gihe 3.9% bifashe bakavuga ko ntabyo bazi.

Kuri iyo ngingo Akarere ka Kamonyi niko gatanga icyizere mu Majyepfo na 92.1% bavuga ko Jenoside itakongera kuba, Rubavu ikaza imbere mu gihugu hose na 94.8%.

Ku ngingo ibaza niba abaturage bizera inzego z’Ubuyobozi bukuru bw’Igihugu, Nyanza iza inyuma y’utundi turere twose ku ijanisha rya 89.6%, mu gihe akarere gatanga icyizere mu Majyepfo ari Nyamagabe iri kuri 98.2%, naho Rutsiro ikaza imbere mu gihugu hose na 99.5%.

Ku cyizere gifitiwe inzego z’ibanze, Nyarugenge na Nyanza tuza inyuma ku ijanisha rya 69.8% na 73.3% (uko bikurikirana), mu gihe akarere gatanga icyizere kurusha utundi two mu gihugu hose ari Rubavu na 95.1%.

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved