Abanyamadini basabwe kutigira ntibindeba ku bugizi bwa nabi bukorwa muri Afurika

Yanditswe na Evariste Nsengimana
Kuya 15 Nzeri 2018 saa 03:05
Yasuwe :
0 0

Abayobozi b’amadini muri Afurika, babwiwe ko badakwiye gusaba umudendezo n’uburenganzira bw’ibyo bakora bijyanye n’ukwemera mu gihe hari abarebera uburenganzira bw’abandi buhutazwa bakaryumaho.

Hirya no hino muri Afurika, havugwa ubugizi bwa nabi bukorerwa abaturage. Urugero ni nko muri Sudani y’Epfo, Centrafrique n’ahandi, ariko ni gake usanga amadini yabwamaganye.

Ubutumwa busaba kutarebera ibikorwa nk’ibyo butumwa bwatangiwe i Kigali kuri uyu wa 14 Nzeri 2018, mu nama ya Gatatu y’iminsi itatu ku mudendezo w’idini muri Afurika.

Yateguwe n’Itorero ry’Abadiventisiti b’umunsi wa Karindwi mu izina ry’ishyirahamwe mpuzamahanga ryita ku mudendezo w’idini, rihuza imirango yita ku mudendezo waryo muri Afurika.

Zirimwabagabo Gerard wigeze kuba umunyamabanga wa Leta muri Minisiteri y’ubuhinzi n’umuyobozi wa Banki Nyafurika itsura amajyambere yabahaye ikiganiro, cyibanze ku nshingano z’abanyamadini.

Yababwiye ko bitumvikana ko bakwiye gusaba uburenganzira bwo gukora ibijyanye n’ukwemera kwabo nyamara hari uburenganzira bw’abandi buhungabanywa barebera.

Ati “Dukwiriye kuba aba mbere mu gukora no kuvuga abadusebereza izina, bifuza kwangiza umudendezo wacu, baba biteguye kujya mu bikorwa bihungabanya uburengenzira bw’abandi.”

Yakomeje agira ati “Isi yahuye n’ibigeragezo bihagije ariko si ukubera urugomo rw’abayituye, ahubwo ni ukubera abarurebera bakinumira.”

Yatanze urugero kuri Jenoside yakorewe abatutsi mu Rwanda, yakozwe bamwe mu banyamadini n’abihayimana barebera ntibagire icyo bakora abandi bakayijandikamo.

Yasobanuye ko byoroshye kumva impamvu ubutegetsi buhutaza abaturage kurusha kumva ituma abanyamadini barebera ubugizi bwa nabi.

Ati “Nshobora kumva impamvu ubutegetsi runaka buhutaza abaturage ariko sinakumva impamvu idini n’abihayimana baryumaho.”

Bimwe mu byo abo banyamadini bavuze ko bisobanura umudendezo w’idini harimo kuriha uburengenzira bwo kwitwara bijyanye n’ukwemera, uburenganzira bwo gusenga, bw’aho gusengera no gusenga ku munsi bifuza.

Abitabiriye iyi nama bashimiye Leta y’u Rwanda ku burenganzira n’umudendezo iha idini, by’umwihariko abadiventisiti b’umunsi wa Karindwi.

Urugero ni nko kuba bemererwa guhitamo umunsi wo gukora Umuganda utababangamira kwizihiza isabato.

Iyi nama yatangiye ku wa 13 Nzeri 2018 ihuza abasaga 500 barimo 350 bo mu bihugu bya Afurika n’ahandi ku Isi n’abanyarwanda bagera ku 150.

Kuri uyu wa Gatanu, banasuye urwibutso rwa Jenoside yakorewe abatutsi rwa Kigali.

Izasozwa n’igiterane cyo gushima kugira neza kw’Imana yabahaye umudendezo, kizahuza abantu basaga ibihumbi 30 kuri Sitade Amahoro ku wa 15 Nzeri.

Abagera kuri 350 baturutse mu bihugu bya Afurika, 150 ni abanyarwanda
Abanyamadini basabwe kutigira ntibindeba mu gihe hari abarengana
Abanyamadini basaga 500 muri Afurika hamwe n'abandi batumirwa mu nama igamije gushaka umudendezo w'idini
Bahawe urugero rw'uko mu Rwanda Jenoside yakorewe abatutsi hari abanyamadini bareberaga abandi bakayijandikamo
Ni inama ya Gatatu Mpuzamahanga ihuza abanyamadini
Zirimwabagabo Gerald, wigeze kuba umunyamabanga wa Leta muri Minisiteri y’ubuhinzi n’umuyobozi wa Banki Nyafurika itsura amajyambere yabahaye ikiganiro, kibanze ku nshingano z’abanyamadin

Amafoto: Moise Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza