Abanya-Uganda 958 bizihije amabonekerwa y’i Kibeho: Ese umupaka uracyari urwitwazo?

Yanditswe na Musangwa Arthur
Kuya 1 Ukuboza 2019 saa 04:05
Yasuwe :
0 0

Kuwa 28 Ugushyingo 2019, abemeramana basaga ibihumbi 50 bateraniye ku butaka butagatifu bwa Kibeho ahizihirijwe ku nshuro ya 38 amabonekerwa ya Bikira Mariya yahabereye mu 1981.

Mu bitabiriye iyi sabukuru abagera kuri 958 ni abaturage ba Uganda bageze mu Rwanda banyuze ku mupaka wa Cyanika.

Ni urugendo bakoreye mu Rwanda mu gihe iwabo kuva mu 2017 Umunyarwanda adahabwa agahenge, ahutazwa ndetse uburenganzira bwe bugahonyorwa uko bwije n’uko bukeye.

U Rwanda rushinja Uganda ko abaturage barwo bahohoterwa iyo bagezeyo ndetse ko n’imitwe igamije guhungabanya umutekano warwo yahawe intebe.

Ku rundi ruhande, Uganda yo ivuga ko u Rwanda ko rwafunze imipaka ihuza ibihugu byombi, gusa ushingiye kuri uru rugendo rw’aba bakirisitu kimwe n’ibindi ibimenyetso bigaragaza ko ibyo Uganda ishinja u Rwanda ari amatakirangoyi.

Ubwo ibirori byo kwizihiza Isabukuru y’imyaka 38 y’Amabonekerwa y’i Kibeho byahumuzaga, abakoresha imbuga nkoranyambaga by’umwihariko Twitter bagaragaje ibyiyumviro byabo ku modoka zavuye muri Uganda zari zitwaye abakirisitu Gatolika bari bagiye mu Karere ka Nyaruguru.

Mu butumwa yanyujije kuri Twitter, Guverineri w’Intara y’Amajyaruguru, Gatabazi Jean Marie Vianney, yagaragaje ko Abanya-Uganda banyuzwe n’igihe bamaze mu Rwanda.

Yagize ati “Ibihumbi by’Abanya-Uganda basoje uruzinduko rwabo i Kibeho, bari gusubira muri Uganda banyuze ku Mupaka wa Cyanika. Bishimiye uko bakiriwe mu gihe bamaze mu Rwanda.’’

Yabuherekesheje amafoto agaragaza umurongo wa bisi nini zigenda mu muhanda zirimo iyanditseho St Paul’s S.S Bukinda, yavaga ku Butaka Butagatifu bwa Kibeho yerekeza muri Uganda. Amajyaruguru ahana imbibi na Uganda ndetse iyi ntara ikora ku mipaka ya Gatuna na Cyanika.

Uru ruhererekane rw’imodoka zitwaye Abanya-Uganda ni ikimenyetso cy’uburyo ibyo Uganda ishinja u Rwanda ntaho bihuriye. Kuba abaturage ba Uganda baza mu Rwanda, bagataha amahoro bigaragaza uburyo rushishikajwe n’imibanire myiza ndetse kwinjira mu gihugu ubwabyo binyomoza ibivugwa n’abayobozi ba Uganda ko imipaka ifunzwe.

Ubutumwa bwa Guverineri Gatabazi bwaherekejwe n’ibitekerezo bitandukanye bigaragaza ko u Rwanda ruri mu murongo mwiza wo kuzahura umubano warwo na Uganda ariko umuturanyi warwo we yarinangiye.

Umuyobozi w’Akarere ka Nyaruguru, Habitegeko François, yavuze ko “Abanya-Uganda 958 bari i Kibeho kwizihiza Isabukuru y’Imyaka 38 y’Amabonekerwa y’i Kibeho mu Karere ka Nyaruguru. Twabafashe neza ubwo bari barwaye, twarabagaburiye, tubaha ibyo kunywa no kurya. Mureke basubire iwabo bavuge ibyo babonye n’ibyo bumvise. Ubudasa bw’ u Rwanda.’’

Mu bibazo by’u Rwanda na Uganda, abayobozi ba Uganda n’itangazamakuru ryo muri iki gihugu batwerereye ikibazo cy’ifungwa ry’umupaka nk’izingiro ry’umwuka mubi uri hagati y’impande zombi ariko bakirengagiza ukuri nkana.

Bakomeza kugaragaza ko aricyo kibazo nyamara bazi ko atari ko bimeze. Niba aribyo koko umuntu yakwibaza ati abakoze urugendo nyobokamana i Kibeho banyuze he?

Ukuri mpamo ni uko umupaka ufunguye n’abinjira mu gihugu batari mu ngendo zijyanye n’iyobokamana badahejwe kuko bakiranwa urugwiro.

Mu mpera za Ugushyingo 2019, Inzego z’umutekano muri Uganda zataye muri yombi abanyarwanda bari hagati ya 150 na 200 zibafatiye mu Majyepfo ashyira Uburengerazuba bw’iki gihugu ahitwa Kisoro.

Impamvu z’itabwa muri yombi ntiziramenyekana gusa bibaye mu gihe hashize imyaka igera kuri itatu abanyarwanda bafatwa bagafungwa bashinjwa kuba intasi cyangwa se kwinjira muri iki gihugu mu buryo bunyuranyije n’amategeko.

Abatabwa muri yombi bashinjwa kuba ‘intasi’ z’u Rwanda, bafungirwa muri kasho aho bakorerwa iyicarubozo ribaviramo n’ubumuga, bagakoreshwa imirimo ivunanye nko guhinga, kubumba amatafari n’ibindi.

Muri Werurwe 2019, Guverinoma y’u Rwanda yasabye abaturage bayo guhagarika kujya muri Uganda kubera impungenge z’umutekano wabo, nyuma y’ubuhamya bw’abarenga 900 bari bamaze iminsi birukanwa ku butaka bw’icyo gihugu nyuma yo guhohoterwa n’iyicarubozo bakorewe.

Ibi bikorwa byakajije umurego kuva ubwo u Rwanda rugejeje kuri Uganda ikibazo kijyanye n’uko Umutwe w’Iterabwoba wa RNC uri gukoresha ubutaka bw’iki gihugu cy’igituranyi mu bikorwa ushyigikiwemo n’Urwego rw’Ubutasi mu gisirikare cya Uganda, CMI, hagamijwe gushaka abantu bawiyungaho ngo bahungabanye umutekano w’u Rwanda.

Perezida Paul Kagame na Museveni ku wa 21 Kanama, basinyiye i Luanda muri Angola amasezerano agamije guhosha ubwumvikane buke hagati y’ibihugu byombi.

Ibyo impande zombi zigomba gushyira mu bikorwa birumvikana ndetse nta cyakabaye kigorana nyamara amasezerano ntaratanga umusaruro kuko Uganda isa n’iyakomeje kwinangira, ikaza umurego mu bikorwa byayo byo gushimuta Abanyarwanda no gufasha abashaka guhungabanya ubusugire bw’u Rwanda.

Buri mwaka i Kibeho hasurwa n’abarenga ibihumbi 600. Mu 2019, Isabukuru y’Amabonekerwa yitabiriwe n’abasaga ibihumbi 50 baturutse mu bihugu bitandukanye ku Isi barimo n’abo muri Uganda ikunze kuba ihafite umubare munini.

Tariki 28 Ugushyingo 1981, ni bwo Bikira Mariya yabonekeye umukobwa wa mbere witwa Mumureke Alphonsine wigaga mu Rwunge rw’Amashuri rwa Mère du Verbe i Kibeho. Mu 1982 yongeye kubonekera Mukamazimpaka Anathalie na Mukangango Marie Claire abaha ubutumwa bazageza ku batuye Isi.

-  Izindi nkuru wasoma:

-  Ibyifuzo n’imbamutima z’abizihije Isabukuru ya 38 y’Amabonekerwa y’i Kibeho (Amafoto)

-  Museveni n’abambari be barenze ku masezerano ya Luanda bashaka urwitwazo ku Rwanda

-  Ukwikunda n’ukwiriza kwa Uganda mu mutima w’ibibazo byayo n’u Rwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza