Umunyarwandakazi agiye gutangiza uruganda rwo kwenga inzoga

Yanditswe na Jean Pierre Tuyisenge
Kuya 20 Nzeri 2016 saa 01:09
Yasuwe :
0 0

Sosiyete Ontario craft brewery Beau’s All Natural yo muri Canada yatangaje ko igiye gutera inkunga rwiyemezamirimo w’Umunyarwandakazi ugiye gutangiza umushinga wo kwenga ibinyobwa bisembuye mu Rwanda.

Mu itangazo rigenewe abanyamakuru ryatanzwe n’iyi Sosiete kuri uyu wa 20 Nzeri 2016, rivuga ko Beau’s izatanga inkunga y’amikoro, ibikoresho ndetse n’ubumenyi ku bakozi bazahabwa amahugurwa azifashishwa mu gushyira mu bikorwa uwo mushinga.

Iryo tangazo rikomeza rivuga ko iyo sosiyete yatangije ubukangurambaga bugamije gukusanya Amadolari ya Amerika ibihumbi 95, azifashishwa nk’inkunga yo gufasha kugura amacupa azakoreshwa muri icyo gikorwa mu mezi abiri abanza.

Uwo mushinga Rwanda Craft Brewery Project ni uwa Josephine Fina Uwineza, Umunyarwandakazi umenyereye kwihangira imirimo cyane ko yanashinze resitora mu Mujyi wa Kigali, akaba yaranahaye akazi abakozi basaga 50.

Umuyobozi Mukuru wa Beau’s Steve Beauchesne n’itsinda yari ayoboye baje mu Rwanda babonana na Uwineza, baganira kuri uwo mushinga ndetse banarebera hamwe n’imbogamizi zirimo. Bahuye kandi n’abayobozi b’Umujyi wa Kigali n’abandi bo mu buyobozi bwite bwa Leta bemererwa kuza gufasha Uwineza gushyira mu bikorwa uwo mushinga.

Umuyobozi Mukuru wa Sosiyete Beau’s yagize ati “Tukimara guhura na Fina tukabona umuhate afite n’icyizere yifitemo, tukabona n’inkunga Leta y’u Rwanda iha abagore bashaka kwihangira imirimo, twahise twumva ko umushinga we dukwiye kuwugiramo uruhare.”

Muri urwo ruganda, Uwineza yateganyije gushinga mu Mujyi wa Kigali yavuze ko azakora inzoga iryoshye kandi ifunze neza. Avuga ko mu byo azajya yifashisha ibyinshi bizajya bituruka mu Rwanda, kandi akazaha akazi abagore batishoboye azajya yishyurira serivisi z’ubuzima ndetse anabafashe kunguka ubumenyi biciye mu mahugurwa atandukanye bazahabwa.

Uwineza yakoze ingendo zitandukanye muri Canada asobanura iby’uwo mushinga, aho yanabonye ubumenyi butandukanye ku bijyanye n’inzoga n’uko zengwa muri sosiyete ya Beau’s ikorera Ontario mu gace kitwa Vankleek Hill. Biteganyijwe ko azitabira ibirori bya Beau’s Oktoberfest muri Canada tariki ya 23 -24 Nzeri 2016, aho azamurika byinshi kuri uwo mushinga we.

Ontario craft brewery Beau’s All Natural ni sosiyete y’abikorera bo muri Canada yenga inzoga. Yashinzwe muri 2006 na Steve Beauchesne n’umuhungu we Tim. Iyo sosiyete imaze guhabwa ibihembo 85 ishimirwa ubuhanga bwayo mu kwenga inzoga.

Umuyobozi Mukuru wa Beau’s, Steve Beauchesne, Fina Uwineza rwiyemezamirimo n'abandi bayobozi muri uru ruganda

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza