Umuntu umwe yaguye mu mpanuka y’imodoka yavaga i Kigali yerekeza i Kampala

Yanditswe na Ishimwe Israel
Kuya 3 Nzeri 2016 saa 04:37
Yasuwe : XX
0

Polisi yo muri Uganda yatangaje ko umuntu umwe yapfuye, naho bane bagakomerekera bikomeye mu mpanuka y’imodoka ya Jaguar yavaga i Kigali yerekeza i Kampala muri Uganda.

Iyi mpanuka yabaye mu gitondo cyo kuri uyu wa Gatanu ahagana saa kumi nyuma yaho umushoferi wari utwaye bisi ya Jaguar yananiwe kuyigenzura ubwo yari ageze mu ikoni, ikarenga umuhanda ikinjira mu nzu yari iri hafi aho.

Umupolisi ushinzwe umutekano wo mu muhanda mu gace ka Katonga, Fabian Betubiza, yabwiye ikinyamakuru Daily Monitor ko iyi modoka yavaga i Kigali yerekeza i Kampala.

Betubiza yavuze ko ahanini yatewe n’ipine ryaturitse uretse ko ngo n’iyi modoka yari ifite umuvuduko mwinshi. Uwitabye Imana yari kigingi wayo utamenyekanye imyirondoro ye kuko nta byangombwa yari afite.

Abakomeretse n’uwapfuye bahise bajyanwa mu bitaro bya Mulago naho iyo bisi yo yahise ijyanwa kuri sitasiyo ya polisi ya Buwama mu gihe iperereza rigikomeje.

Nta makuru aramenyekana niba nta Munyarwanda wahuriye n’ikibazo muri iyi mpanuka.

Iyi mpanuka ibaye mu gihe indi yabereye muri aka gace mu gitondo cyo kuwa Gatanu tariki ya 02 Nzeli ahagana saa kumi n’imwe , aho imodoka yirukankaga cyane yagonze umuntu utaramenyekanye agahita apfa.

Uyu we yagongewe i Mitala Maria hafi n’umujyi wa Buwama, umurambo we uhita ujyanywa mu buruhukiro bw’ibitaro bya Gomba.

Bisi ya Jaguar yavaga i Kigali yerekeza i Kampala yakoze impanuka umuntu umwe ahasiga ubuzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza