00:00:00 IGIHE NETWORK KN KINYARWANDA EN ENGLISH FR FRANCAIS

Abantu 400 mu bakingiwe Covid-19 mu Rwanda barayanduye

Yanditswe na Mukahirwa Diane
Kuya 16 Kamena 2021 saa 11:23
Yasuwe :
0 0

Umuyobozi Mukuru w’Ikigo cy’ Igihugu cy’Ubuzima, RBC, Dr. Nsanzimana Sabin, yatangaje ko abantu 400 bari barakingiwe icyorezo cya Covid-19, bagaragayeho icyo cyorezo.

Nsanzimana yavuze ko kuba hari abahawe inkingo ariko bakandura Covid-19, bikwiye kuba isomo.

Yagize ati “Kuba dufite abantu 400 banduye Covid-19 ariko barigeze gufata ku rukingo, biratanga ubutumwa bubiri, ubwa mbere ni uko gukingirwa bitakubuza kwandura. Ikindi ni uko iyo wamaze gufata urukingo uba ufite inshingano zo kwirinda kuba ikiraro kugira ngo Covid-19 ikuveho ijye ku wundi. Uwakingiwe rero ashobora kwanduza, ibyo turabibona mu mibare dufite.”

Mu mpera z’icyumweru gishize, Minisitiri w’Ubuzima, Dr. Ngamije Daniel, yari yavuze ko mu Rwanda hari abantu bahawe urukingo ariko bakaza kwandura Covid-19, gusa avuga ko batarembye.

Yaragize ati "Icyagaragaye ni uko abenshi bakingiwe batarwara kuko hari [inkingo] zifite 95% by’ubushobozi bwo kurinda umuntu wakingiwe n’uwanduye mu bakingiwe kuko birashoboka."

Yarakomeje ati "Haboneka bake cyane, icyiza ni uko iyo babonetse ntabwo baremba, nta bimenyetso mu by’ukuri baba bafite, uramupima ukabona ko yanduye, afite Covid-19, ariko nta bimenyetso bijyanye no kurwara aba afite ku buryo byamuviramo no gupfa. Ibyo rwose nta bihari ku bantu bakingiwe, ni imwe mu ngaruka nziza zo gukingirwa."

Amakuru atangwa n’Ikigo cy’Abanyamerika Gishinzwe Kurwanya no Gukumira Indwara z’Ibyorezo (American CDC), agaragaza ko muri Leta Illinois na Chicago, abantu 243 muri miliyoni 5,2 bahawe urukingo rwa Covid-19, barwaye bakaremba ndetse bakajya mu bitaro, abagera kuri 81 irabahitana bitewe n’ibindi bibazo by’ubuzima bari basanganywe.

Kugeza ubu mu Rwanda hamaze gukingirwa abantu bagera 389 832.

Abantu 400 bakingiwe Covid-19 mu Rwanda barayanduye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .