Abantu 34 barapfuye: Ishusho y’ibimaze kwangizwa n’ibiza mu 2021

Yanditswe na Tuyishimire Raymond
Kuya 18 Gashyantare 2021 saa 11:23
Yasuwe :
0 0

Minisiteri ishinzwe ibikorwa by’Ubutabazi Minema, yatangaje ko mu mezi abiri gusa y’umwaka wa 2021 abagera kuri 34 bamaze kwitaba Imana abandi 76 bagakomereka kubera ibiza.

Ibi iyi Minisiteri ibitangaje mu gihe hirya no hino mu gihugu hakomeje kugwa imvura nyinshi idasanzwe itwara ubuzima bw’abantu ndetse ikanangiza ibikorwaremezo.

Usibye abantu bitabye Imana, Minema itangaza ko inzu zigera kuri 498 zasenyutse, muri zo izigera kuri 431 zasenywe n’imvura nyinshi, 50 zisenywa n’urubura mu gihe 11 zazize inkongi.

Uretse abantu n’inzu, ibi biza kandi byibasiye ubutaka n’amatungo. Imibare ya Minema igaragaza ko ubutaka bugera kuri hegitari 793 bwarengewe n’amazi, mu gihe 38 zapfuye zikubiswe n’inkuba.

Uretse inka habarurwa andi matungo 1200 nayo yapfuye azize imvura nyinshi.
Minema kandi igaragaza ko ibyumba by’amashuri 19 , imihanda 17 ,ibiraro 14 nabyo byasenyutse bitewe n’imvura nyinshi .

Umunyamabanga Uhoraho muri Minema,Kayumba Olivier yabwiye RBA ko abantu bakwiye kuba maso muri iki gihe cy’imvura, birinda ibishoboka byose byabasenyera cyangwa bikabatwara ubuzima.

Ati” Ni ugusaba abantu gukomeza gukurikiza amabwiriza yo kwirinda inkuba, ntibajye kugama munsi y’ibiti, ntibajye mu muhanda ,ntibajye ahantu hari amapoto y’amashanyarazi kugira ngo inkuba zitabakubita.”

Kayumba Olivier yasabye abantu bagituye ahantu hashyira ubuzima bwabo mu kaga kuhimuka.

Ati” Hari n’ikintu kandi Leta yakomeje gusaba, kwimuka mu manegeka cyangwa mu bishanga kugira ngo iyo amazi aje ari menshi atabasenyera, cyane cyane ko bitemewe no gutura aho hantu. “

Mu rwego rwo gukomeza kwirinda ibyago bizanwa n’imvura, Minema yasabye abantu kujya bazirika ibisenge by’inzu mu gihe bari kubaka ndetse ko bagomba kujya bafata amazi y’imvura birinda ko amazu yacengerwamo n’amazi.

Mu bice bitandukanye by'igihugu hakomeje kugaragara ibiza ahanini biterwa n'imvura nyinshi bigahitana ubuzima bw'abantu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .