Abanditsi basabwe kugira uruhare runini mu gusigasira ibyo igihugu cyagezeho

Yanditswe na Sekamana Mathias
Kuya 27 Nyakanga 2019 saa 07:52
Yasuwe :
0 0

Urugaga rw’abanditsi rwabiwe ko abanyarwanda bakeneye inyandiko zibaremamo icyizere, zibafasha kwishakamo ibisubizo kandi zikababwira bibafitiye akamaro.

Basabwe kandi kwandika ibivuga neza amateka y’igihugu uko ari kuko iyo yanditswe n’abanyamahanga bayagoreka.

Mu nteko rusange y’urugaga rw’abanditsi mu Rwanda yateranye kuri uyu wa Gatanu, abanditsi bahawe inyigisho zitandukanye zabafasha kunoza neza ibyo bakora, bikabafasha kwiteza imbere no kubaka igihugu mu byciro bitandukanye.

Minisiteri y’umuco na siporo yaganirije aba banditsi ku muco nyarwanda n’umumaro bakwiye kugira mu iterambere ry’u Rwanda.

Mu kiganiro bahawe na Col Jules Rutaremara wari uhagarariye minisiteri y’ingabo, yababwiye ko inyandiko zabo zigomba kuba zigendanye n’umurongo abanyarwanda bariho wo kubaka igihugu, ubumwe bw’abanyarwanda no kurinda ibyagezweho.

Ati “Abanditsi bafite uruhare runini mu gutanga umusanzu wo kubaka u Rwanda. By’umwihariko abanyarwanda bakeneye inyandiko zibaremamo icyizere. Abanditsi rero bagomba gukora inyandiko zifasha leta mu gushaka uburyo bwiza ariko bakaduha n’ubumenyi ku mateka y’igihugu cyacu.”

Col Jules Rutaremara yabwiye aba banditsi biganjemo umubare munini w’urubyiruko, amateka y’urugamba rwo kubohora u Rwanda, avuga ko indangagaciro ingabo za RPA Inkotanyi zagenderagaho ku rugamba n’uyu munsi abantu bakwiye kuzigira kuko ari zo zatumye barutsinda kandi bikaba byaranagaragaye ko n’ubu ari zo zifasha mu kubaka igihugu.

Ati “Kwishakamo ibisubizo biradufasha kuko ni ibintu bishingiye mu myumvire yacu, mu muco wacu no ku mateka yacu. Ibyo rero iyo byanditswe bituma n’icyo cyizere kigenda kivuka.”

Yabwiye aba banditsi ko bagomba guhangana n’abashka gusenya iki gihugu, cyane cyane ababigerageza bakoresheje inyandiko.

Ati “Nibura mukwiye no kubwira abantu ko hari abashaka gusenya ibyagezweho. Byaba ibihugu, yaba imitwe mujya mwumva za RNC na FDRL, hari n’abantu ku giti cyabo b’abanditsi.”

Yongeye kubabwira kandi ko inyandiko bandika zigomba kuba zigisha abantu akamaro ko kwigira, kwitanga, kunoza umurimo no gukunda igihugu.

Ku ruhande rw’abanditsi ariko bagaragaje ko bagifite imbogamizi ikomeye yuko abanyarwanda abadakunda gusoma no kwandika, bityo ngo bikaba bitoroshye ko umuntu yaba umwanditsi w’ibitabo ngo bimutunge.

Umwanditsi Malonga Pacifique yabwiye IGIHE ko kwandika igitabo bihenda haba ubwenge uwandika akoresha, amafaranga yishyura abagikosore n’ayo yishyura mu icapiro, ariko ku isoko abantu ntibabigure.

Ati “Igitabo cyiza usanga kigura nka 50,000 FRW, ariko nibyo tugurisha 12,000 FRW usanga abantu bavuga ko gihenze. Si ukuba gihenze mu by’ukuri ahubwo ni uko abantu badafite umuco wo kugura ibitabo. Ahubwo ukumva bose bati wampaye agatabo”.

Umuyobozi w’urugaga rw’abanditsi mu Rwanda, Hategekimana Richard yavuze ko habura ubufatanye bw’abikorera kugira ngo ubwanditsi bubashe gutunga ababukora, ariko ngo hari icyizere kubera ubushake leta iri kubishyiramo.

Ati “Abikorera ntibarumva akamaro ko gushora imari mu bitabo ariko hari icyizere kubera ubushake leta ifite kugira ngo ubwanditsi butunge ba nyira bwo. […] Ibitabo ntabwo bisora ahubwo amacapiro niyo ahenda bigatuma n’ibitabo rimwe na rimwe bihenda.”

Aba banditsi bagaragaje inyota yo kwandika cyane cyane ku buzima bw’u Rwanda n’abanyarwanda mu rwego rwo gufasha igihugu kwihuta m’umurongo kirimo w’iterambere rishingiye ku bumwe bw’abanyarwanda.

Ku mbogamizi y’amaikoro bagaragaje, babwiwe ko bagomba gukorera hamwe nk’uko bahuriye mu rugaga, byajya biba ngombwa bagafatanya n’igitabo ari benshi kugira ngo kibe koko kiri mo ibitekerezo byinshi bihurijwe hamwe kandi no kubafasha byorohe.

Aba banditsi kandi bibukijwe ko RALC ibafasha ku buntu mu gukosora ibitabo byabo byanditse mu Kinyarwanda kugira ngo basohore inyandiko zirimo ururimi ruzira amakemwa.

Ku mbogamizi yo kuba amacapiro ahenda, abanditsi bagiriwe inama yo kwiga cyane gucuruza ibitabo byabo kuri murandasi kuko ikoranabuhanga ari cyo rimaze, gufasha abantu kugabanya ikiguzi cya serivisi zitandukanye.

Colonel Jules Rutaremara yabwiye abanditsi ko bagomba kurinda ibyagezweho bakoresheje inyandiko zabo
Umwanditsi Malonga Pacifique ngo abona abantu badafite umuco wo gusoma
Richard Hategekimana uyobora ururgaga rw'abanditsi mu Rwanda ngo yizeye ko ubwanditsi buzatera imbere kuko leta ibushyigikiye
Abitabiriye inteko rusange y'abanditsi

Amafoto: Gift Munyarugerero


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza