Abana b’abahungu bakorerwa ihohoterwa ribabaza umubiri kurusha abakobwa - Ubushakashatsi

Yanditswe na Evariste Nsengimana
Kuya 17 Gicurasi 2018 saa 04:58
Yasuwe :
0 0

Ubushakashatsi bushya bwa Minisiteri y’Ubuzima, bwerekanye ko abana b’abakobwa aribo bakorerwa ihohoterwa rishingiye ku gitsina kurusha abahungu, ariko aba naho bo bagakorerwa iribabaza umubiri ryinshi.

Ubushakashatsi bwashyizwe ahagaragara ku wa 17 Gicurasi 2018, bwakorewe ku bana bari hagati y’imyaka 13 na 24 basaga 2214, biganjemo abanyeshuri (97%), barimo abakobwa 1182 n’abahungu 1032 mu 2015/16.

Ihohoterwa rishingiye ku kubabaza umubiri (gukubita no gukomeretsa) riza ku isonga, rigakurikirwa n’irishingiye ku gitsina, hagaheruka irishingiye ku marangamutima nko gutukwa. Ibi na byo bikagenda bihinduka bitewe n’igitsina rikorerwa.

Muri rusange, ½ cy’abakobwa bari hagati y’imyaka 18 na 24 bakorewe ihohoterwa iryo ariryo ryose bari munsi y’imyaka 18; abahungu bo ni 65%.

Ubushakashatsi bwerekanye ko 59,5% by’abahungu bakorewe ihohoterwa ryo gukubitwa no gukomeretswa, abakobwa bo ni 37,2%.

Ihohoterwa rishingiye ku gitsina, abakobwa ni 23,9% naho abahungu ni 9,6% ; irishingiye ku marangamutima, abahungu (17,3%) naho abakobwa ni 11,8%.

Mu bari mu hagati y’imyaka 13 na 17, herekanwe ko 36 % b’abakobwa n’abahungu 48%, bakorewe ihohoterwa iryo ariryo ryose mu myaka yabo ya mbere.

Abakobwa bari muri icyo kigero bavuze ko bakorewe irishingiye ku kubabaza umubiri ni 26%, abahungu bakaba 42%.

Irishingiye ku gitsina, abakobwa (12 %), abahungu (5 %); irishingiye ku marangamutima abahungu (13%), abakobwa (8%).

Ubu bushakashatsi bunagaragaza ko abana b’abakobwa 13% bari hagati y’imyaka 6-11, bagiye basiba kujya ku ishuri inshuro imwe cyangwa nyinshi bitewe n’ibikomere batewe no guhohoterwa mu gihe abahungu ari 23%.

Hanagaragaye ko abakobwa babiri mu icumi (2/10), bageragejwe gukorerwa ihohoterwa rishingiye ku gitsina mbere y’uko bagira imyaka 18 naho abahungu ni umwe mu icumi (1/10).

Abana bari hagati y’imyaka 18 na 24, bagaragaje ko bakorewe ihohoterwa rishingiye ku gitsina bwa mbere bari mu kigero cy’imyaka 16 na 17 ndetse abakobwa (13 %) n’abahungu (28%), bageragejwe gukorerwa ihohoterwa rishingiye ku gitsina bari munsi y’imyaka 13, mu gihe muri rusange abagera ku 10 % bakorewe ihohoterwa rishingiye ku gitsina bwa mbere bari ku ishuri.

Umuyobozi ushinzwe Ishami ry’ubuvuzi bw’indwara zo mu mutwe muri RBC, akaba ari nawe watangaje ibyavuye muri ubwo bushakashatsi, Dr. Yvonne Kayiteshonga, yavuze ko mu Rwanda mubwo ihohotera rikorerwa abana n’urubyiruko ridakabije, hakenewe ingufu mu kurirwanya.

Ati “Twabonye irishingiye ku gitsina rikunda kwibasira abakobwa cyane, gukubita no gukomeretsa biba ku bana b’abahungu, hakabaho n’irishingiye ku marangamutima aho usanga atukwa cyangwa agafatwa bitandukanye n’uko abo bavukana cyangwa babana bafatwa.”

Yakomeje avuga ko hakenewe ubufatanye hagati y’inzego zitandukanye no kwigisha ababyeyi kugira ngo barusheho kumenya uburenganzira bw’abana no kubwubahiriza, kuko ababakorera ihohoterwa ari abagize umuryango cyangwa abaturanyi n’abarimu.

Umuyobozi wungirije w’Ishami ry’umuryango w’Abibumbye ryita ku bana mu Rwanda, Unicef Rwanda, Petrovic Olivier, yagize ati “Ni iby’agaciro kugabanya no gukuraho ibibangamira uburenganzira bw’abana mu Rwanda, ubushashatsi bwerekanye ko u Rwanda ari kimwe no mu bindi bihugu byinshi ku Isi, bigishyira mu kaga uburenganzira bw’abana binyuze mu bikorwa bibubangamira […] Ibyo byose bishyira mu kaga uburenganzira bwabo ariko nanone byose birashoboka ko byakwirindwa.”

Ingaruka ziterwa n’ihohotewe ku mwana harimo gukomereka ku mubiri no ku mutima, ubuzererezi, agahinda gakabije, indwara zo mu mutwe, gushaka kwiyahura, gukoresha ibiyobyabwenge n’ibindi.

Minisiteri y’Ubuzima yatangaje ko abana barenga ibihumbi 17 batewe inda zitateguwe mu 2016.

Polisi ifatanyije n’izindi nzego zishinzwe umutekano n’ubundi buyobozi, ntibahwema gukangurira buri muturarwanda, gukumira no kurwanya ihohoterwa rikorerwa abana.

Polisi yanashyizeho ikoreshwa ry’ubutumwa bugufi bwa telefone n’indi mirongo wahamagara ku buntu, uramutse ukorewe ihohoterwa cyangwa se ubonye uwarikorewe ariyo 3512, kugana ikigo Isange One Stop Center, cyashyizweho ngo cyite ku bibazo by’ihohoterwa kikanagira inama abarikorewe.

Umuyobozi ushinzwe Ishami ry’ubuvuzi bw’indwara zo mu mutwe muri RBC, Dr. Yvonne Kayiteshonga, atangaza ubushakashatsi ku ihohoterwa rikorerwa abana
Abahagarariye imiryango ifite aho ihuriye no kwita ku bana bakurikiranye imurikwa ry'ubushakashatsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza