00:00:00 IGIHE NETWORK KN KINYARWANDA EN ENGLISH FR FRANCAIS

Abana 24 b’ingagi bagiye kwitwa amazina

Yanditswe na Ishimwe Israel
Kuya 27 Kanama 2021 saa 11:23
Yasuwe :
0 0

Urwego rw’Igihugu rw’Iterambere, RDB, rwatangaje ko ku nshuro ya 17 ingagi zigiye kwitwa amazina. Ni umuhango uzaba ku wa 24 Nzeri 2021 hifashishijwe ikoranabuhanga, aho abana b’ingagi 24 bazitwa amazina.

Umuhango wo kwita izina abana b’ingagi ni umwihariko w’u Rwanda, ukaba waratangiye mu 2005, mu rwego rwo kwerekana agaciro ingagi zifitiye igihugu ndetse no gushimira abaturage baturiye Pariki y’Ibirunga, abita ku bayigana n’abaganga bita ku ngagi.

Kuva mu myaka 16 ishize, abana b’ingagi barenga 328 ni bo bamaze kwitwa amazina muri uyu muhango ngarukamwaka.

Umuyobozi w’Agateganyo w’Ishami ry’Ubukerarugendo mu Rwego rw’Igihugu rw’Iterambere (RDB), Kageruka Ariella, yatangaje ko bizeye ko urwego rw’ubukerarugendo rwiteguye guhangana na COVID-19 kuko abenshi mu bakora muri uru rwego bakingiwe.

Ati “Benshi mu bakora mu rwego rw’ubukerarugendo nk’abayobora ba mukerarugendo, abakora muri pariki ubu barakingiwe ndetse bapimwa mu buryo buhoraho harebwa ko batanduye. Bivuze ko ubukerarugendo bwakorwa neza mu gihe kiri imbere.’’

Guverineri w’Intara y’Amajyaruguru, Nyirarugero Dancille, yavuze ko abaturage ayoboye bashimira RDB n’uruhare rw’ubukerarugendo mu iterambere ryabo.

Yagize ati “Mu turere dukora kuri Pariki y’Ibirunga twishimira intambwe imaze kugerwaho mu iterambere rusange. Iterambere ry’Umujyi wa Musanze rifitanye isano n’ibiva mu bukerarugendo bukorerwa mu Birunga. Abaturage bamaze gusobanukirwa neza akamaro ko kubungabunga ibinyabuzima biri muri Pariki.”

Kuva mu 2005, abaturage baturiye Pariki y’Ibirunga basaranganyijwe ibiva mu musaruro w’ubukerarugendo. Kuva icyo gihe hari imishinga myinshi yatewe inkunga, irimo iyubakwa ry’amashuri, inzu zubakiwe abatishoboye, kubaka amavuriro, guteza imbere ubworozi, ubuvumvu n’ubukorikori.

Nyirarugero yavuze ko hari ibindi bikorwa bifitanye isano na Pariki y’Ibirunga, byatanze akazi ku baturage bashobora kwiteza imbere, bazamura imibereho yabo “bajyana abana ku ishuri, barivuza ndetse bitabira gahunda ya Ejo Heza ibafasha kwiteganyiriza mu zabukuru.”

Yongeyeho ati “Ubu abaturage bahora biteguye kubungabunga Pariki y’Ibirunga, aho bakoramo isuku ndetse bagahora biteguye guhangana icyahungabanya iriya pariki, bategura imitego ishobora kugwamo abana b’ingagi. Iyo hari inyamaswa yacitse bahita bayisubiza muri Pariki.”

“Umuhango wo kwita izina abana b’ingagi watumye igihugu cyacu gikomeza kumenyekana. Ni ishema ku baturage b’Amajyaruguru kuko utuma abavuye mu bice bitandukanye by’Isi bahasura, bigatera ishema igihugu cyacu.”

Umuhango wo Kwita Izina uzanyura ku mbuga nkoranyambaga zirimo YouTube no kuri Televiziyo Rwanda.

Biteganyijwe ko mbere yawo hazakorwa ibikorwa bitandukanye birimo ingendo zo kwakira abikorera bo hanze bafasha u Rwanda guteza imbere isura yarwo ku Isi; kwakira abanyamakuru bakora mu rwego rw’ubukerarugendo ndetse n’igikorwa kizahuriza hamwe abantu batandukanye cyateguwe na Kaminuza ya ALU hagamijwe kuganira ku ruhare rwa buri wese mu kubungabunga urusobe rw’ibinyabuzima.

Urwego rw’Ubukerarugendo ni rumwe mu zahungabanyijwe n’icyorezo cya Covid-19 ku buryo bukomeye bituma n’amafaranga u Rwanda rwinjizaga aturutse muri iyi ngeri agabanuka.

Umwaka ushize, u Rwanda rwinjiye miliyoni 121$ aturutse mu bukerarugendo make ugereranyije na miliyoni 498$ yari yabonetse mu 2019. Iyo hatabaho Covid-19, igihugu cyari cyarihaye intego yo kwinjiza miliyoni 600$ mu 2021.

Abasura igihugu na bo baragabanutse kubera iki cyorezo kuva uyu mwaka watangira, abamaze gusura u Rwanda ari ibihumbi 246 mu gihe nko mu 2019 bari 1.059.612.

Muri uyu mwaka kandi u Rwanda rwakiriye inama n’ibindi bikorwa bihuza abantu 20 byahurije hamwe abantu bagera ku 2500. Ibyo birimo ibikorwa by’imikino birimo iya Basketball ya BAL yinjirije igihugu amafaranga arenga miliyoni 5.3$.

Muri uyu mwaka, abana 24 b'ingagi nibo bazitwa amazina
Umuyobozi w’Agateganyo w’Ishami ry’Ubukerarugendo mu Rwego rw’Igihugu rw’Iterambere (RDB), Kageruka Ariella, yavuze ko hari ibikorwa byinshi byatekerejweho bizafasha urubyiruko kwisanga mu muhango wo Kwita Izina/Ifoto: Niyonzima Moïse
Umunyamabanga Uhoraho muri Minisiteri ya Siporo, Shema Maboko Didier, yavuze ko kuba u Rwanda rushyira amafaranga mu makipe yo hanze narwo rubyungukiramo kuko rubona ba mukerarugendo barusura bakarusigira amadevise
Umuyobozi w’Ishyirahamwe ry’Abatwara n’Abatembereza ba Mukerarugendo mu Rwanda (RTTA) Mutoni Bonita, yavuze ko bahanze amaso ubukerarugendo bwo mu Karere
Umukozi ushinzwe Itumanaho muri Kaminuza ya ALU, Mutoni Mimi, yavuze ko buri mwaka hategurwa ibikorwa bigamije kubungabunga urusobe rw’ibinyabuzima
Guverineri w’Intara y’Amajyaruguru, Nyirarugero Dancille, yavuze ko abaturage ayoboye bashimira RDB n’uruhare rw’ubukerarugendo mu iterambere ryabo
Abayobozi batandukanye ni bo bitabiriye iki kiganiro n'itangazamakuru
Iki kiganiro cyabereye muri Kigali Convention Centre
Nyuma y'ikiganiro n'itangazamakuru, abagitanze bafashe ifoto y'urwibutso

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .