Abana 1900 bagarutse mu ishuri bigizwemo uruhare n’abagenzi babo

Yanditswe na Tombola Felicie
Kuya 1 Ukuboza 2017 saa 08:49
Yasuwe :
0 0

Abana 1900 bari baracikirije amashuri babashije kuyagarukamo bigizwemo uruhare na bagenzi babo babasuye, bakaganiriza ababyeyi nyuma y’amahugurwa bahawe na SOS Rwanda ku burenganzira n’inshingano by’umwana.

Nyuma yo gusanga hari abana badasobanukiwe uburenganzira n’inshingano zabo bagahohoterwa ariko bikagirwa ibanga bumva ko ariko byakagombye kugenda, SOS Rwanda ku nkunga ya Danemark yakoze umushinga w’imyaka ine wo kwigisha abana uburenganzira n’inshingano zabo ndetse no guhugura abarezi n’ababyeyi bakumva ko abana bakwiye kugira uruhare mu bibakorerwa.

Ubwo hasuzumwaga impinduka uyu mushinga wagize kuva mu mpera za 2014 kugeza ubu, mu turere tune ukoreramo twa Gasabo, Gicumbi Nyamagabe na Kayonza, hagaragajwe ko abana basigaye bagira uruhare mu bibakorerwa ndetse ko nyuma yo gusobanukirwa uburenganzira bwabo bagaruye bagenzi babo mu ishuri.

Umuyobozi ushinzwe porogaramu muri SOS Rwanda, Murangira Gakuba Franklin, yagaragaje ko abarezi nk’imboni z’abana babanje guhugurwa.

Ati “ Twabanje guhugura abarimu bo ku bigo 130 umushinga ukoreramo, nabo ku mashuri hari ubwo babaga badasobanukiwe n’uburenganzira bw’abana n’inshingano zabo bakababangamira."

Yongeyeho ati "Umusaruro twabonye ni uko abana bagaragaza ibibabangamiye kuko bamenye uburenganzira bwabo kandi bakoze n’ubuvugizi ku bandi bana hamaze kugaruka 1900 bari baratakaje amashuri bigizwemo uruhare n’abana bagenzi babo.”

Iyadede Rose, umuhuzabikorwa w’uwo mushinga ugamije gutuma abana bamenya uburenganzira bwabo bakagira n’uruhare mu bibakorerwa, yavuze ko hari n’abana bandikishijwe kubera ubukangurambaga bwakozwe

Ati “ Kuko muri club z’abana bigiramo byinshi abana badufashije kumenya ko hari abana batandikishijwe, maze ku bwo gukorana n’ubuyobozi bw’inzego z’ibanze abana 3300 bo mu miryango 159 babasha kwandikwa mu bitabo by’irangamimerere .”

Ku ruhande rwa Komisiyo y’Igihugu ishinzwe abana, Mukankiriho Immaculee, yatangaje ko nka NCC bishimira umusaruro w’umufatanyabikorwa wabo SOS kuko hari aho bo ubwabo baba batabashije kugera.

Ati “ Nka NCC turashimira umusanzu w’abafatanyabikorwa bacu, SOS Rwanda turakorana cyane, icyo uyu mushinga wagezeho ni uko watumye abana bamenye uburenganzira n’inshingano byabo, bakabimenyesha n’abandi kandi bakaba bahamya ko kugira uruhare mu bibakorerwa byabagiriye umumaro.”

Umurezi ku Rwunge rw’Amashuri rwa Kabuye Catholique, Kubwimana Marcellin, mu Murenge wa Jabana muri Gasabo yemeza ko nk’abarimu hari ibyo batumvaga ko bibangamira abana mu bihano babahaga.

Ati “ Hari ubwo umurezi yahanishaga umwana kumusohora mu ishuri kandi abandi barimo kwiga, twabonye ko tuba tubangamiye uburenganzira bwe kuko ushobora kumuhana amasomo ashoje ariko ntumuvutse kwiga aribyo byamuzanye kandi ari uburenganzira bwe."

Ku ruhande rw’abanyeshuri, Karasira Yves, w’imyaka 17 wiga mu rwunge rw’Amashuri rwa Rebero yatangaje ko icyo yishimiye muri uyu mushinga ari uburyo ibitekerezo by’abana bihabwa agaciro.

Mu turere umushinga ukoreramo bafata ikigo cy’amashuri abanza n’ayisumbuye muri buri murenge, buri club ikaba igizwe n’abanyeshuri 40 hakiyongeraho imboni z’umwana aribo barimu batandatu kuri buri kigo.

Umushinga watangiye muri 2014 , umaze kugera ku bana 5200 uzasozwa mu 2018 ugeze ku bana basaga ibihumbi birindwi.

Inama yitabiriwe n'abantu benshi bafite ibikorwa byo kurengera abana mu nshingano zabo
Mukankiriho Immaculée, umukozi wa NCC ushinzwe kureberera abana barererwa mu bigo ndetse n'abana b'imfubyi
Umuyobozi ushinzwe Porogaramu muri SOS, Murangira Gakuba Flanklin

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza