Abakuru b’ibihugu na za guverinoma barenga 30 basuye u Rwanda mu mezi icyenda

Yanditswe na David Eugène Marshall
Kuya 5 Ukwakira 2018 saa 10:17
Yasuwe :
0 0

Mu gihe u Rwanda rukomeza gutera imbere ni nako ruzamura ibikorwa remezo, abanyamahanga barusura haba mu bukerarugendo cyangwa ibikorwa by’ubucuruzi bagakomeza kwiyongera ubutitsa.

Imbaragaza zashyizwe mu bikorwa byo gutegura inama zatumye muri uyu mwaka u Rwanda rwakira bayobozi benshi, barimo abakuru b’ibihugu na za guverinoma.

Ni ibintu bimenyerewe mu bihugu bifite ibyicaro by’imiryango mpuzamahanga, ariko bigaragaza igihagararo n’imbaraga igihugu cyashize muri dipolomasi, politiki n’ubukungu butajegajega.

Ni n’ikimenyetso cy’icyizere u Rwanda rufitiwe haba mu rwego rw’umutekano mu gihe rwanyuze mu mateka ababaje ya Jenoside yakorewe Abatutsi mu 1994, yagize ingaruka ku bantu n’ibintu.

Mu mezi icyenda ya 2018, igikorwa nyamunini cyakoranyirije abaperezida i Kigali, ni isinywa ry’amasezerano ashyiraho isoko rusange muri Afurika, AfCFTA, ku wa 21 Werurwe 2018.

Iyi nama idasanzwe y’Umuryango wa Afurika yunze Ubumwe, AU, yatumye abaperezida 18, ba Visi Perezida babiri na ba Minisitiri w’Intebe batandatu, bakoranira i Kigali.

Abo baperezida 18 bakiriwe na Perezida Paul Kagame mu Rwanda muri Werurwe, barimo Macky Sall wa Sénégal wahise arugarukamo yitabiriye inama y’ihuriro ‘Next Einstein Forum’, NEF2018, nyuma y’iminsi itanu gusa.

Mbere yaho, muri Gashyantare u Rwanda rwagenderewe na Perezida Edgar Lungu wa Zambia wamaze iminsi ibiri.

Uruzinduko ruheruka ni urwa Perezida Xi Jiping w’u Bushinwa, muri uyu mwaka wa 2018 washyizwe ku mwanya wa mbere ku rutonde rw’abantu bavuga rikijyana ku Isi.

Uru ruzinduko rw’iminsi ibiri ku wa 22 – 23 Nakanga 2018, ntawabura kurwita urw’amateka cyane ko iki gihugu kiri mu bya mbere by’ibihangange ku Isi.

Ni uruzinduko rwaje rusanga imishinga 21 u Bushinwa busanganywe mu gihugu ifite agaciro ka miliyari 362.5Frw.

Ni uruzinduko rwakurikiranye n’urwa Perezida Nyusi wa Mozambique, aho yatambagijwe Ingoro y’Umwami iherereye i Nyanza mu Rukali.

Perezida Nyusi yanasuye inyubako itangirwamo serivisi zihuriweho ku mupaka w’u Rwanda na Repubulika Iharanira Demokarasi ya Congo mu Karere ka Rubavu watashywe mu 2017.

Ntawavuga kandi iby’abakuru b’ibihugu na za Guverinoma basuye u Rwanda ngo yibagirwe Narendra Modi, Minisitiri w’Intebe w’u Buhinde wageze mu Rwanda ku wa 23 Nyakanga 2018, akabisikana na Jinping.

Modi yasuye abaturage bo mu mudugudu ntangarugero wa Rweru mu Karere ka Bugesera, asiga abagabiye inka 200 z’umukamo muri gahunda ya Girinka.

U Buhinde kandi bwahaye u Rwanda inguzanyo ya miliyoni 100 z’amadolari azakoreshwa mu gutunganya icyanya cy’ahagenewe inganda i Masoro mu Karere ka Gasabo, mu gihe izindi 100 z’amadolari zizashyirwa muri gahunda y’ubuhinzi no kuhira imyaka.

Minisitiri w’Intebe wa Somalia, Ali Khayre, nawe yamaze umunsi umwe mu Rwanda mu ruzinduko rw’akazi.

Ku wa 8 Nzeri 2018 kandi, Perezida wa Ghana, Nana Akufo-Addo na Visi Perezida wa Kenya, William Ruto na Minisitiri w’Intebe wa Gabon, Emmanuel Issoze Ngondet, bari mu Rwanda mu nama yigaga ku buhinzi muri Afurika, AGRF 2018.

Mu bashyitsi u Rwanda rwakiriye muri uyu mwaka harimo na Minisitiri w’Ububanyi n’Amahanga w’u Burusiya Sergey Lavrov wagendereye u Rwanda muri Kamena 2018.

Icyo gihe yatangaje ko u Rwanda n’u Burusiya biri mu bufatanye bwa gisirikare bugamije kongera ubushobozi n’ibikoresho, impande zombi zikaba ziri kuganira ku buryo rwahabwa ubwirinzi bw’u Burusiya ku bitero byaturuka mu kirere, Air Defense System.

Muri Werurwe uyu mwaka abakuru b'ibihugu bya Afurika bakoraniye i Kigali mu nama yasinyiwemo amasezerano y'isoko rusange
Perezida Kagame muri Nyakanga uyu mwaka yakiriye mugenzi we w’u Bushinwa, Xi Jinping, wagiriye uruzinduko rw'amateka mu Rwanda
Minisitiri w'Intebe wa Somalia, Ali Khyre, nawe yasuye u Rwanda muri Kamena yakirwa na Perezida Kagame
Perezida Edgar Lungu wa Zambia yari mu Rwanda kuwa 21-22 Gashyantare 2018, aho yagiranye ibiganiro na Perezida Kagame ndetse asura ibikorwa bitandukanye birimo n'icyanya cyahariwe inganda cya Kigali
Muri Nyakanga uyu mwaka Perezida wa Mozambique, Filipe Jacinto Nyusi yagiriye uruzinduko rw’iminsi itatu mu Rwanda, rwasinyiwemo amasezerano atanu y’ubufatanye hagati y'ibihugu byombi
Minisitiri w'Intebe w'u Buhinde Narendra Modi yasuye u Rwanda hasinywa amasezerano y'ubufatanye mu nzego zitandukanye ndetse anatanga inka ku baturage bo mu Karere ka Bugesera
Uruzinduko rwa Modi rwasigiye u Rwanda inguzanyo ya miliyoni 200 z’amadolari azashyirwa mu bikorwa byo guteza imbere ibyanya byahariwe inganda no kuhira
Perezida wa Ghana, Nana Akufo-Addo (wa kabiri ibumoso) Visi Perezida wa Kenya, William Ruto (wa kabiri iburyo) na Minisitiri w’Intebe wa Gabon, Emmanuel Issoze Ngondet, bari mu Rwanda mu nama yigaga ku buhinzi muri Afurika, AGRF 2018

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza