Abakozi batatu b’ibitaro bya Ngarama batawe muri yombi bakekwaho kunyereza umutungo

Yanditswe na IGIHE
Kuya 30 Ugushyingo 2019 saa 02:17
Yasuwe :
0 0

Urwego rw’Igihugu rw’Ubugenzacyaha RIB, rwatangaje ko rwataye muri yombi abakozi batatu b’ibitaro bya Ngarama biherereye mu Karere ka Gatsibo, mu Ntara y’Iburasirazuba, bose bakaba bakekwaho gukoresha nyandiko mpimbano no kunyereza umutungo w’ibitaro.

RIB yanditse kuri Twitter ko ‘Hashingiwe kuri raporo y’Umugenzuzi mukuru w’Imali ya Leta ya 2016-2017, RIB yafashe Harelimana Oreste ushinzwe ubutegetsi; Uwanziga Lydia ushinzwe abakozi na Irankunda Joseph umukozi w’ibitaro bakekwaho gukoresha nyandiko mpimbano no kunyereza umutungo mu bitaro bya Ngarama’.

RIB itangaza ko ’Harakorwa dosiye ngo bashyikirizwe ubushinjacyaha’.

Ingingo ya 610 y’itegeko riteganya ibyaha n’ibihano, ivuga ko umuntu wese uzi ko inyandiko ari impimbano, akayikoresha ku buryo ubwo ari bwo bwose, ahanishwa ibihano bimwe n’iby’uwayihimbye.

Ingingo ya 609 ivuga ko umuntu wese uhimba cyangwa uhindura mu buryo ubwo ari bwo bwose inyandiko, ashyiraho umukono cyangwa igikumwe bitari byo, yonona inyandiko cyangwa imikono, asimbuza abantu abandi, ahimba amasezerano, imiterere y‟ingingo zayo, igitegetswe gukorwa cyangwa icyarangije kwemeranywa, ahanishwa igifungo kirenze imyaka itanu (5) kugeza ku myaka irindwi (7) n’ihazabu y’amafaranga y’u Rwanda kuva ku bihumbi magana atatu (300.000) kugeza kuri miliyoni eshatu (3.000.000).


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza