Abakozi barindwi b’Ikigo cy’Umutungo kamere bafungiye guhimba ibyangombwa by’ubutaka

Yanditswe na Uwishyaka Jean Louis
Kuya 8 Nzeri 2016 saa 01:04
Yasuwe :
0 0

Abakozi barindwi b’Ikigo cy’Igihugu gishinzwe Umutungo Kamere, bafunzwe bakurikiranyweho ibyaha byo guhimba ibyangombwa by’ubutaka.

Mu kiganiro IGIHE yagiranye n’umuvugizi w’Ubushinjacyaha Faustin Nkusi, yavuze ko dosiye zabo batangiye kuzisuzuma ejo bityo ngo bakaba bategereje gufata umwanzuro.

Ati “Turacyababaza ntiturarangiza, bakekwaho gukora ibyaha byo guhimbira abantu ibyangombwa by’ubutaka, no guhindura amazina ya ba nyirabyo.”

Nkusi yavuze ko bakiri kubisuzuma nyuma bakazafata umwanzuro.

Ati “ Turacyabisesengura, turacyababaza ntabwo turafata ibyemezo twebwe nk’ubushinjacyaha muri make ni ibyo, nidufata umwanzuro muraza kubimenya.”

Amakuru avuga ko abo bakozi bafashwe na polisi mu ntagiriro z’uku kwezi tariki ya 2 Nzeri 2016. Ayo makuru akomeza avuga ko bakurikiranywe ku cyaha cyo gufata icyangombwa cy’umuntu bakagihimbira undi akajya kugisabisha inguzanyo muri banki.

Nyuma ngo havutse ikibazo cy’uvuga ko ari nyir’ubutaka na we wagiye gusaba icyangombwa cyabwo agasanga cyaratanzwe ndetse hari n’ideni ry’inguzanyo ubwo butaka bwatangiweho ingwate, iyo nguzanyo imubarwaho.

Guhera icyo gihe ni bwo icyo kibazo cyatangiye gukurikiranwa, ubu hakaba hitezwe itangazwa ry’ukuri ku byo abo bakozi bakekwaho.

Abakekwaho ibyaha runaka iyo bafashwe n’ubushinjacyaha bubanza kubamenyesha ibyo bakurikiranyweho,bakamenyeshwa uburenganzira bwabo, bakabibazwaho, Ubushinjacyaha bukabisesengura nyuma bukabifatira imyanzuro.

Mu byemezo ubushinjacyaha bufata birimo kwemeza ko abakekwa barekurwa by’agateganyo mu gihe basanze nta mpamvu zikwiye gutuma bakomeza gufungwa, cyangwa gukomeza gufungwa by’agateganyo mu gihe hari impamvu bubonye zituma ukekwa ajyanwa imbere y’ubutabera[inkiko] agasabirwa gukurikiranwa afunzwe by’agateganyo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza