Abakozi ba REG bari mu itorero bacaniye ingo nshya 131 banasimbuza amapoto ashaje

Yanditswe na N.Kubwimana Janvière
Kuya 31 Ukwakira 2019 saa 05:16
Yasuwe :
0 0

Intore za Sosiyete y’Igihugu ishinzwe ingufu (REG) ziri mu Itorero ry’iyi sosiyete mu cyiciro cya gatatu zacaniye ingo nshya 131 zo mu Murenge wa Kinoni mu Karere ka Burera ndetse zisimbuza n’amapoto 40 y’umuyoboro ushaje muri uwo murenge.

Iki gikorwa cyakozwe mu mukoro wa ‘Kora ndebe’ wakozwe n’abakozi ba REG, bari mu kigo cy’ubutore cya Nkumba kiri mu Karere ka Burera.

Ni igikorwa cyakozwe kuwa Gatatu, aho bashimangiraga umukoro bigishirijwe mu itorero bamazemo iminsi 10 wo kugaragaza ubudasa muri serivise z’amashanyarazi basanzwe baha abanyarwanda no kwihutisha imihigo bihaye y’uko mu 2024 umunyarwanda wese azaba afite amashanyarazi mu rugo rwe.

Bamwe mu baturage bahawe amashanyarazi bavuga ko ari wo mwanya babonye wo kubyaza umusaruro imishinga bari bamaze igihe kinini barahejeje ku mpapuro.

Umwe muri bo Nkinzehiki Aloys avuga ko bari bamaze imyaka itari mike babona abo hakurya yabo bafite amashanyarazi bakumva bibababaje ariko ubu nabo bagezweho bakaba bagiye kuyabyaza umusaruro.

Ati “Nari mfite umushinga wo gusudira wari waraheze mu bitabo, ariko ubwo izi nyangamugayo za REG ziduhaye umuriro, uyu niwo mwanya wo gushyira mu bikorwa imishinga yanjye. Ubu inkoko niyo ngoma”.

Mugenzi we Karimunda Adidas yongeyeho ko kuba bari baturiye urugomero rw’amashanyarazi batayagira byari byarabababaje cyane ariko ubu bayabonye kandi bagiye kuyabyaza umusaruro.

Ati “Ubu ubwigunge twari twarahezemo duciye ukubiri na bwo, ntituzongera kujya kwiyogoshesha ari uko duteze igare ngo ritugeze kuri salo nk’uko byagendaga, ubu ibikorwa by’amajyambere tugiye kugurukana nabyo natwe dususuruke”.

Intore z’abakozi ba REG nazo ziyemeje gukomeza gukora gitore, kurangwa n’ubupfura ndetse no gusiga isura nziza aho bakora hose, baharanira kugera ku muhigo bahawe na Perezida wa Repubulika Paul Kagame, w’uko mu 2024 umunyarwanda wese azaba afite umuriro.

Umukozi ushinzwe ubucuruzi mu muri REG, Wilson Karegeya, avuga ko umukoro wa Kora Ndebe, batanga mu itorero ari urugero rwiza mu kwihutisha imihigo bihaye.

Ati “Uyu mukoro wa kora ndebe mubona bakoze ni ishingiro mu byo bize birimo gukora gitore, bizabafasha kwihutisha akazi bari basanganywe tugamije kugabanya imibare y’abaturage bataragerwaho n’amashanyarazi, bityo mu 2024 umuhigo twihaye wo gucanira umunyarwanda wese ugerweho”.

Avuga ko iki ari icyiciro cya gatatu gitojwe, bakaba bamaze gucanira abaturage barenga 300, kandi bizakomeza no ku bandi bazatozwa.

Mu karere ka Burera abaturage bagera ku 23 000 nibo bacana amashanyarazi bafatiye ku murongo mugari, naho 5465 bo bacana umuriro ukomoka ku mirasire y’ izuba aho 33% ari bo bamaze kubona umuriro mu ngo.

Mu gihugu hose abafite umuriro mu ngo bagera kuri 53%, REG ikaba yarihaye intego ko mu 2024 abaturage bose bazaba bacanye mu ngo zabo.

Ingo 131 zahawe umuriro mu mwitozo wa Kora Ndebe w'Intore za REG
Hasimbujwe n’amapoto 40 y’umuyoboro ushaje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza