Abakozi b’Ikigo Lin&Gao Ltd bunamiye abashyinguye mu Rwibutso rwa Jenoside rwa Kigali

Yanditswe na Tombola Felicie
Kuya 12 Mata 2018 saa 03:49
Yasuwe :
0 0

Abakozi 75 b’Ikigo cy’imikino y’amahirwe izwi nka Casino, Lin&Gao Ltd, basuye Urwibutso rwa Jenoside rwa Kigali ruri ku Gisozi, kuri uyu wa Kane, banunamira inzirakarengane zisaga ibihumbi 250 zirushyinguyemo.

Ni umuhango wabanjirijwe n’urugendo rwo kwibuka rwatangiriye ku Kinamba rugasorezwa ku Rwibutso rwa Jenoside rwa Kigali. Abakozi ba Lin&Gao Ltd batambagijwe ibice bigize urwibutso, basobanurirwa amateka y’ivangura yaranze ubuyobozi bubi yatumye u Rwanda rwibasirwa na Jenoside yakorewe Abatutsi.

Mu butumwa yatanze, Umuyobozi w’Ikigo Lin&Gao Ltd kimaze imyaka ibiri gikorera mu Rwanda, Akankwasa Sam, yavuze ko nubwo ari Ikigo cy’Abashinwa gikorera mu Rwanda bashatse kwifatanya n’Abanyarwanda kugira ngo babakomeze nk’abantu bahuriye mu kazi banasangire amateka y’ibyo igihugu cyanyuzemo.

Ati “Kuza hano tukareba ibyabaye bitanga imbaraga ku Banyarwanda n’abandi bose kurushaho kunga ubumwe no kugira imbaraga. Mu buzima iyo wibagiwe amateka yawe ukora amakosa, niyo mpamvu muri Mata buri Munyarwanda wese yibuka kugira ngo habeho icyizere ko bitazongera.”

Yongeyeho ati “Abagera kuri 99% by’abakozi bacu ni Abanyarwanda, kuza kwifatanya nabo kwibuka bibaha icyizere ko twifatanyije nabo mu bihe bikomeye barimo.”

Umukozi wa Lin&Gao Ltd, Mushumba Jean Phillippe, warokotse Jenoside yakorewe Abatutsi afite imyaka icyenda, yatangaje ko urubyiruko rukwiye kwigira ku mateka.

Yagize ati “Urubyiruko rurezwe nabi rutanga umusaruro mubi nk’uko twabibonye, niyo mpamvu rukwiye kwigira ku mateka, rukitabira ibiganiro kuko nibwo rwatanga umusaruro mwiza.”

Dushimimana Eric na we yagize ati “Dukorana n’abanyamahanga, iyo tubabwiye amateka y’igihugu cyacu bashobora kutabyumva, kuza rero tugasura urwibutso byadufashije gusangira nabo amateka yacu.”

Ni inshuro ya kabiri abakozi b’Ikigo Lin&Gao Ltd basuye Urwibutso rwa Jenoside wa Kigali ruri ku Gisozi, ruherereye mu Mujyi bakoreramo ndetse no kugira ngo abashya batari bahari icyo gihe nabo bamenye byinshi.

Iki kigo cyatanze inkunga ya miliyoni y’amafaranga y’u Rwanda yo gushyigikira urwibutso rwa Jenoside rwa Kigali ruri ku Gisozi ngo amateka atazasibangana.

Ikigo Lin&Gao Ltd gikora ibijyanye n’imikino y’amahirwe aho bakora imikino ya Casino nka Black Jack, Poker, Oasis Table, American Roulette, Slot machines (zizwi nk’ibiryabarezi) n’indi itandukanye.

Beretswe filime ivuga ku mateka ya Jenoside yakorewe Abatutsi n'ubuzima abayirokotse banyuzemo
Abakozi b’Ikigo Lin&Gao Ltd basobanuriwe amateka y'uburyo Jenoside yateguwe, ikanashyirwa mu bikorwa
Beretswe uko Jenoside yakoranywe ubunyamaswa
Abakozi b’Ikigo Lin&Gao Ltd batanze inkunga ya miliyoni y'amafaranga y'u Rwanda ku Rwibutso rwa Kigali ruri ku Gisozi
Umuyobozi w’Ikigo Lin&Gao Ltd, Akankwasa Sam, yavuze ko bifatanyije n’Abanyarwanda kugira ngo basangire amateka y’ibyo igihugu cyanyuzemo
Bafashe umunota wo kwibuka abazize Jenoside yakorewe Abatutsi
Abakozi b’Ikigo Lin&Gao Ltd bunamiye abashyinguye mu Rwibutso rwa Jenoside rwa Kigali
Dushimimana Eric yasobanuye ko gusura Urwibutso rwa Jenoside rwa Kigali bitanga isura ku banyamahanga yo kumenya aho igihugu cyavuye
Mushumba Jean Phillippe warokotse Jenoside yakorewe Abatutsi yavuze ko urubyiruko rukwiye kwigira ku mateka ya Jenoside
Bahakuye isomo ry'ubumwe n'ubwiyunge by'Abanyarwanda

Amafoto: Muhizi Serge

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza