Kwamamaza

Abakoresha nabi imirongo ya telefoni itishyurwa bashobora kujya bahanwa

Yanditswe kuya 24-11-2016 saa 16:28' na Philbert Hagengimana


Nyuma y’uko bigaragaye ko hari abantu bakoresha nabi imirongo mpuruza ya telefoni itishyurwa yashyizweho n’ibigo bitandukanye ngo abagenerwabikorwa babyo babashe kubona serivisi bifuza, Polisi y’igihugu yavuze ko hagiye gukorwa ubukangurambaga bwo kwigisha abaturage kubicikaho, bushobora gukurikirwa n’ibihano.

Bamwe mu baturage bavuga ko imirongo ya telefoni itishyurwa ya bimwe mu bigo bya Leta ntacyo ibamariye, kuko akenshi bayihamagara bakabura ababitaba, abandi ngo ugasanga bari kuyivugiraho, bityo abifuza serivisi ntibayibone.

Gusa ngo hari n’abandi bakoresha iyi mirongo mu buryo butari bwo, bayivugiraho ibitajyanye. Aha ngo usanga akenshi abakora ibyo baba ari abana bahamagara bikinira, abandi ugasanga ni urubyiruko ruba ruvuga ibiterekeranye n’ibyo uhamagara akwiye kuba abaza mu kigo runaka.

Aha hatanzwe urugero nko muri Minisiteri y’Ubuzima n’Ikigo cy’Igihugu gishinzwe Ubuzima (RBC), aho usanga hari abahamagara ku 114 ku mpamvu z’ibibazo runaka birebana n’ubuzima, ariko hakaba n’abandi ngo batawuzi neza bawuhamagara ugasanga babajije ibitajyanye n’icyo washyiriweho.

Habarurema Gaspard ushinzwe Itumanaho muri Minisante no muri RBC, yagize ati “Ibibazo dukunda guhura na byo muri rusange, imirongo itishyurwa hari igihe usanga abaturage bayita iya Shitani, bamwe bajya baterefona bashaka amafaranga, ibyo duhura na byo cyane. Ikindi usanga haba ibitutsi byinshi ku bantu bawukoreramo.”

Habarurema yakomeje agaragaza ko hari n’abifashisha uwo murongo bashaka gutesha umutwe ababitabye, rimwe na rimwe ugasanga bababwira ngo “Cherie” n’ibindi biterekeranye na gato, bitwaje ko hari amabwiriza y’uko bagomba kwakira buri wese no kutagira telefoni bakupa.

Mu gihe u Rwanda rwari rwarashyizeho ingamba zikaze zo kwirinda icyorezo cya Ebola, ngo hari abifashishaga uwo murongo utishyurwa bakabeshya ibimenyetso, abaganga bagahururana ibikoresho, bagerayo bagasanga atari byo cyangwa se uwahamagaye akabura ndetse rimwe bagasanga yanakuyeho telefoni.

CSP Mberabagabo Elie, Komiseri ushinzwe Itumanaho muri Polisi y’u Rwanda, yatangaje ko na bo bahura n’ikibazo cy’abakoresha nabi iyo mirongo, ndetse ngo mu Ukwakira gusa, impuzandengo y’abahamagaye ku 112 bageraga ku 22.300 ku munsi, ariko ngo nibura 40% byabo ni bo bakiriwe bakeneye serivisi.

Abana n’urubyiruko batungwa agatoki, ababyeyi bagasabwa kuba maso

SP Ndushabandi Jean Marie Vianney, ushinzwe Itangazamakuru mu Ishami rishinzwe Ubuvugizi muri polisi y’u Rwanda, yatangaje ko akenshi iyo bikurikiranywe basanga abakoresha nabi imirongo mpuruza ya telefoni itishyurwa ari abana baba bakinisha telefoni z’ababyeyi babo.

Akomeza avuga ko Polisi y’u Rwanda izakomeza gushishikariza ababyeyi kwitwararika ku bana bakoresha telefoni zabo bagahamagara bikinira, kuko ngo ari bo bazajya babiryozwa, dore ko nyuma y’ubukangurambaga butandukanye, hashobora kuzaziramo n’ibihano birimo no kuba iyo mirongo ishobora gufungwa.

Ati“Icya mbere giteganywa ni ubukangurambaga, tugahamagara Itangazamakuru ku ryo rigera ku bantu benshi, kugira ngo ridufashe gukangurira ababyeyi kumva uruhare rwabo. Duteganya ko byazaganirwaho no mu muganda rusange. Mu minsi izakurikiraho bizanyuzwa muri za kiliziya no mu materaniro, kugira ngo ababyeyi barusheho kumva ko iyi mirongo ifitiye akamaro kanini abanyarwanda[…] Ni byiza ko umwana akurana uwo muco wo kumenya ko ikintu kigenewe ikindi runaka ari cyo gikoreshwa aho kuba igikinisho.”

“Bitavuze ko nyuma hashobora kubaho ibihano, bababwiye ko nomero ihamagaye turayibona […] iyo duhamagaye ya nomero yitabwa n’umubyeyi akatubwira ati ‘ni umwana ntabwo ari jye’, ntabwo rero bizaba kabiri gatatu ngo iyo nomero ireke gufatirwa ibyemezo, hari igihe bizaba ngombwa ko dusaba bya bigo bishinzwe Itumanaho ko byafatira icyemezo cyangwa ibihano, harimo no kuba uwo murongo bawuhagarika wenda nyirawo akazawufungurirwa nyuma.”

Ku kibazo cy’abaturage binubira ko bahamagara ku mirongo mpuruza bakabura ubitaba cyangwa serivisi bari bakeneye ntibayihabwe uko bikwiye, ubuyobozi bw’Ikigo cy’Igihugu cy’Imirimo imwe n’imwe ifitiye Igihugu akamaro, RURA, bwasabye ko ayo makuru yajya agezwa mu nzego bireba, kuko iyo ayigezeho habaho gukurikirana hakarebwa ukwiye kuryozwa imitangire mibi ya serivisi.

ACP Anthony Kuramba, Umuvugizi wa RURA
CSP Mberabagabo Elie, Komiseri ushinzwe Itumanaho muri Polisi y’u Rwanda
Habarurema Gaspard ushinzwe Itumanaho muri Minisante no muri RBC

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved