Abakorera mu gakiriro ka Gakenke batakiye Minisitiri Kanimba abemerera ubufasha

Yanditswe na Ishimwe Israel
Kuya 15 Ukwakira 2016 saa 02:01
Yasuwe : XX
0

Abakorera imirimo itandukanye mu Gakiriro ka kijyambere ka Gakenke bavuga ko bahura n’ibibazo bitandukanye mu kazi kabo ka buri munsi, birimo kutagira imashini zikora ibikoresho bigezweho ndetse n’ibyo bakoze ntibibone abaguzi bahagije.

Aka gakiriro kubatswe mu Murenge wa Gakenke, mu Karere ka Gakenke kashyizweho mu rwego rwo guhuriza hamwe urubyiruko rwize imyuga ndetse n’abakora ubukorikori hagamijwe kubateza imbere.

Izi ntitizi bahura na zo mu kazi kabo ka buri munsi bazigaragarije Minisitiri w’Ubucuruzi n’Inganda n’Umuryango w’Ibihugu bya Afurika y’Iburasirazuba, Kanimba François mu ruzinduko yagiriye muri aka Karere kuri uyu wa Gatanu, tariki ya 14 Ukwakira 2016, asura ibikorwa bitandukanye birimo n’inyubako y’Ikigega cy’Ingwate(BDF) ndetse anaganira n’abayobozi b’inzego z’ibanze n’abaturage bo muri Gakenke.

Bamwe mu bamaze igihe bakorera imirimo y’ububaji, ubudozi no gusudira mu Gakiriro ka Gakenke bavuga ko kuba abaguzi b’ibyo bakora ari bake ndetse n’imashini bakoresha ziciriritse ku buryo bagorwa no gukora ibikoresho bigezweho, bibabangamira mu kazi kabo.

Ntihemuka Daniel ni umwe mu bahakorera ububaji yagize ati “Nta bikoresho bifatika dufite, turacyakora mu buryo bumeze nk’ubwa gakondo kuko imashini dufite zitwicira imbaho kandi n’izo dukoresha zirameneka, kuko ziba zitumye bigatuma tutabona abaguzi. Dufite ubumenyi ariko haracyabura imashini zo kudufasha gukora akazi kacu neza.”

Mukamutesi, ukora akazi ko kudoda we yatangaje ko bibagora kubona abakiriya babagana.

Yagize ati “Nta muntu byakura mu rugo ngo aje kudodesha imyenda hano, badusanga muri santere ya Gakenke tukaza kubidodera hano, byashoboka ko hano hababera kure.”

Minisitiri Kanimba François yijeje abakorera muri aka gakiriro ko ikibazo cy’imashini zidahagije kigiye gukemurwa ku bufatanye na BDF.

Yagize ati “Twubaka ibikorwaremezo byiza nk’ibi ariko ugasanga bidatanga umusaruro ukwiye kuko hari igihe abahakorera basaba ibikoresho bigezweho ariko wabibabaza ugasanga batabizi ubwabo, kugana BDF bizabafasha kubona ibyo bakeneye no kuborohereza kubona inguzanyo.

Yakomeje avuga ko hariho gahunda yo gushyiraho uruganda ruciriritse muri buri karere kandi ko hagiye gutangira amahugurwa ku bufatanye n’Abashinwa bakora imyenda, bafite uruganda C&H Garments Ltd Rwanda, bakabongerera ubumenyi mbere y’uko hashyirwa uruganda ruzafasha muri gahunda yo guca caguwa no gushyigikira ibikorerwa mu Rwanda.

Agakiriro ka Gakenke gakorerwamo n’abadozi 95 babarizwa mu makoperative abiri ndetse n’ababaji bagera kuri 45.

Ntihemuka Daniel umwe mu bakorera ububaji mu Gakiriro ka Gakenke avuga ko bakibangamiwe no gukoresha imashini zishaje
Abakora ububaji bavuga ko badafite imashini zigezweho zibafasha mu kazi kabo
Minisitiri w’Ubucuruzi n’Inganda n’Umuryango w’Ibihugu bya Afurika y’Iburasirazuba, Kanimba François yatangaje ko ikibazo cy'imashini kigiye gushakirwa umuti urambye ku bufatanye na BDF

bazatsinda@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza