Abakora ubushakashatsi mu Rwanda baracyari mbarwa

Yanditswe na Ishimwe Israel
Kuya 8 Ugushyingo 2016 saa 04:49
Yasuwe : XX
91 55

Imibare yakusanyijwe n’inzego zitandukanye igaragaza ko abakora ubushakashatsi mu Rwanda bakiri bake, ndetse n’abagerageza kubukora bibanda ku buzima rusange, batinya gukora ku bijyanye na siyansi.

Umwarimu muri Kaminuza y’u Rwanda mu Ishami ry’Ubumenyi n’Ikoranabuhanga, Ndagije Charles, akaba n’umwe mu bakoze inyigo igaragaza uko ubushakashatsi buhagaze mu nzego zitandukanye mu Rwanda, avuga ko basanze abakora ubushakashatsi badahagije.

Yagize ati “Mu burezi twasanze abakora ubushakashatsi ku mwaka ari 89, mu nzego z’ubuyobozi dusanga ari 40, mu nzego z’abikorera twasanze bagera kuri 50.”

Ibi yabitangarije kuri uyu wa 8 Ugushyingo 2016, mu nama yahuje Minisiteri y’Uburezi, amashuri makuru n’ibigo bya Leta, abikorera ku giti cyabo n’abashakashatsi mu nzego zitandukanye.

Ndagije yavuze ko kugira ngo ubushakashatsi bukorwe neza hakenewe ubushobozi ndetse n’abakozi babifitemo ubumenyi.

Ati “Dusanga amafaranga atangwa mu bushakashatsi yakwiyongera n’abashakashatsi bakabishyiramo ingufu [...] Ikindi cyagaragaye ni uko ubushakashatsi mu Rwanda bukorwa mu bijyanye n’ubumenyi rusange gusa, naho mu bijyanye na siyansi ntihagire ubukorwa.”

Umuyobozi Mukuru Ushinzwe Ubumenyi, Ikoranabuhanga n’Ubushakashatsi muri Minisiteri y’Uburezi, Dr. Marie Christine Gasingirwa, avuga ko ukora ubushakashatsi adahera ku mafaranga.

Yagize ati “Ubushashatsi buhera ku bitekerezo, amafaranga aza nyuma. Ushobora kuba ufite igitekerezo mugahuriza hamwe imbaraga n’abandi, amafaranga mukayashakira ahandi.”

Yakomeje avuga ko ubushakashatsi u Rwanda rukeneye ari ubujyanye no kubyaza umusaruro ibyo rufite.

Ati “Turashaka gutangiza ikigega cyitwa ‘Rwanda National Innovation Fund’ kigamije gufasha abahanga udushya. Kizaza gishyigikire ubushakashatsi ku nzego zose.”

NEPAD (gahunda y’Ubufatanye bushya bw’ibihugu bya Afurika mu iterambere) hamwe n’Umuryango wa Afurika Yunze Ubumwe, isaba za Guverinoma z’ibihugu gutanga nibura 1% by’ingengo y’imari igakoreshwa mu bushakashatsi.

Mu Rwanda, ubushakashatsi bwagenewe angana na 0,2% by’ingengo y’imari.

Umwarimu muri Kaminuza y’u Rwanda mu ishami ry’Ubumenyi n’Ikoranabuhanga, Ndagije Charles yemeza ko ubushobozi ndetse n'ubumenyi ku bakora ubushakashatsi bituma bugira ireme
Umuyobozi Mukuru Ushinzwe Ubumenyi, Ikoranabuhanga n’ubushakashatsi muri Minisiteri y’Uburezi, Dr. Marie Christine ashimangira ko u Rwanda rukeneye ubushakashatsi bwo kubyaza umusaruro ibyo rufite

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE