Abakora ibijyanye n’imbaho bagiye gufashwa mu kugabanya miliyoni $35 zikoreshwa mu kubitumiza hanze

Yanditswe na Sekamana Mathias
Kuya 24 Nyakanga 2019 saa 06:18
Yasuwe :
0 0

Ikigo cy’Igihugu gishinzwe ubushakashatsi n’iterambere ry’inganda, NIRDA, kigiye gufasha abakora akazi gafite aho gahuriye n’uruhererekane nyongeragaciro rw’imbaho, kubona imashini, mu rwego rwo kubafasha kunoza akazi kabo.

Ubushakashatsi bwa NIRDA bwagaragaje ko u Rwanda rutumiza hanze ibikomoka ku mbaho bifite agaciro ka miliyoni 35 z’amadolari ya Amerika buri mwaka. Bugaragaza kandi imbogamizi n’amahirwe biri mu ruhererekane rw’ibikomoka ku mbaho.

Gukoresha uburyo bwa gakondo mu gutema no gusatura ibiti no kubazisha amaranda, ni bimwe mu byagaragaye ko biteza igihombo kinini kuko ubwo buryo butuma habaho imyanda myinshi kandi akenshi itagira ibindi ibyazwa mo.

Umuyobozi Mukuru wa NIRDA, Kampeta Sayinzoga, yavuze ko nk’urwego rwa leta rubifite mu nshingano, ubu bushakashatsi bwatumye bamenya ibikenewe bakaba bagiye gufasha aho bikenewe.

Ati “Hari ikoranabuhanga ridahenze cyane ryafasha mu kugabanya ibihombo. Ikizakurikiraho ni ugufasha abikorera bari muri uru ruhererekane kubona ayo mamashini. Tuzababwira, hari amafaranga tuzabaha abazaba bujuje ibisabwa, ariko tuzanabahuza n’ibigo by’imari babashe kugura amamashini.”

Yavuze ko nubwo hakiri akazi kenshi ko gukora kugira ngo u Rwanda rwihaze mu bikomoka ku biti birimo impapuro n’ibikoreshwa mu bwubatsi, ikoranabuhangfa rifite byinshi rizafasha uru rwego.

Yijeje ko bazakorana n’izindi nzego za leta kugira ngo haboneke abashoramari baba abo mu Rwanda cyangwa hanze, kugira ngo hagabanywe amafaranaga u Rwanda rukoresha rutumiza hanze ibikomoka ku mbaho.

Yavuze ko mu ngengo y’Imari y’uyu mwaka harimo amafaranga yo gufasha abakorera mu dukiriro kubona imashini zidateza ibihombo, igisigaye ari ukubamenyesha ibisabwa ngo bazibone.

Kampeta yavuze ko iki kigo kizazana inzobere zitanga amahugurwa ku ikoreshwa ry’imashini zitunganya ibikomoka ku mbaho, ndetse rugafasha abantu kubona imashini zigezweho kandi zuzuje ubuziranenge.

Abakora akazi k’ububaji mu buryo bwa gakondo, bemeza ko usibye no kuba bubateza ibihombo, ngo ntibajya bemera no gukora akazi gafatika kuko bataba bizeye ko bazakarangiriza igihe.

Jerome Nyirimbabazi ukorera mu Cyanika mu karere ka Nyamagabe yagize ati “Akazi kaba gahari ariko icyizere ntacyo batugirira, kuko bavuga ko dufite ubushobozi bukeya. Tubonye imashini n’iyo twaba tuzishyura buke buke, twashirika ubute tukajya gusaba isoko kuko dufite ibikoresho tukumva ko twiyizeye.”

Mbanzabugabo Anatole ukorera ahitwa mu Nteko mu karere ka Nyaruguru, we yagize ati “Tuba dufite abo twigisha kubaza, ariko ntibyihuta kuko baba babyiganira ku iranda imwe. Kandi no gukora nk’intebe z’abanyeshuri, isoko barijyana aho babona imashini bikihuta.”

Imibare igaragaza ko abakoresha imashini mu ruhererekane nyongeragaciro rw’ibikomoka ku mbaho ari 1%, abakoresha uburyo gakondo bakaba 45% naho abakoresha uburyo buvanze ni 54%.

Ubwo abahagarariye inzego zitandukanye bagezwagaho ibyavuye mu bushakashatsi
Kampeta yavuze ko abakoresha uburyo gakondo bazafashwa kubona imashini

Amafoto: Dushimimana Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza