Kinazi:Abakobwa 250 babyariye iwabo;bamwe barataka gutotezwa

Yanditswe na Kanamugire Emmanuel
Kuya 25 Nyakanga 2016 saa 03:07
Yasuwe :
0 0

Mu murenge wa Kinazi ho mu karere ka Huye habarurwa abakobwa bagera kuri 250 babyariye iwabo nk’uko bivugwa n’ubuyobozi bw’aka Karere.

Bamwe muri aba bana b’abakobwa bavuga ko hari ubwo bajya batotezwa n’imiryango cyangwa bakagirwa ibicibwa mu mu rugo mu gihe baba batwite cyangwa baramaze kubyara.

Iki kibazo cyo gutotezwa no kwirukanwa cyagaragajwe ubwo umushinga CECUP w’Abadage usanzwe ukora ibikorwa by’ubufasha wari waje kureba aho bageze biteza imbere nyuma yo kubatera inkunga.

Ubuyobozi bw’umurenge wa Kinazi ku bufatanye na CECUP bafashije aba bakobwa kwibumbira hamwe mu itsinda yitwa “Humura mwari” aho bigiramo imyuga itandukanye nko kudoda no kuboha uduseke.

Jeanine Kayitesi umwe muri aba bakobwa avuga ko nubwo bafashwa kwiteza imbere bagifite ikibazo cyo gototezwa n’imiryango yabo.

Ati “Ntabwo kuba umuntu yabyaye aba abaye ikirumbo kuko aba afite umutwe utekereza, kuko hari n’abo biba byagwiririye. Njyewe nagize umubyeyi mwiza abasha kumba hafi ariko hari bagenzi banjye batotezwa bakanirukanwa mu rugo ugasanga bagiye kwicumbikira”.

Bamwe mu babyeyi na bo bavuga nubwo umukobwa watewe inda itateguwe aba agayishije umuryango, kumutoteza bidakwiye kuko ikibazo kidakemuzwa ikindi.

Aba bakobwa bo mu murenge wa Kinazi bavuga ko nubwo babanje kubaho mu buzima bugoye nyuma yo kubyarira iwabo, umushinga wa CECUP wabakuye mu bwigunge bigishwa imyuga itandukanye bahabwa n’ibikoresho birimo imashini zidoda imyenda.

Ettl Claudio, umwe mu bahagarariye CECUP avuga ko bahisemo gufasha aba bakobwa kuko basanze bababaye.

Claudio ati “ Dusanzwe dufasha ibihugu mu bijyanye n’uburezi, umuco n’amahoro, twamenye amakuru ku Rwanda kimwe n’ibindi bihugu bya Afurika, hanyuma tumenya n’ibibazo by’aba bakobwa babyarira iwabo, dutekereza uburyo twabatera inkunga kuko ni urubyiruko kandi nirwo mbaraga z’igihugu bakeneye kugira ejo heza”.

Umuyobozi wungirije ushinzwe imibereho myiza y’abaturage mu karere ka Huye, Christine Niwemugeni yavuze ko umubare w’abana b’abakobwa baterwa inda zitateguwe uri kwiyongera muri aka karere, bityo ngo bari gushaka uburyo babikumira binyuze muri gahunda zitandukanye zirimo n’umugoroba w’ababyeyi.

Niwemugeni avuga ko mu rwego rwo kubafasha kwiyubaka akarere kabahaye igishanga bazajya bahingamo imyaka, hagamijwe kubarinda ubwigunge no kuba bajya mu ngeso zitari nziza.

Bimwe mu bikorwa by'ubukorikori byakozwe n'abakobwa babyariye iwabo
Umuyobozi wungirije ushinzwe imibereho myiza y’abaturage mu karere ka Huye, Christine Niwemugeni
Bamwe mu bahagarariye CUCUP baje kureba ibyo abakobwa batera inkunga bamaze kugeraho

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza