Kwamamaza

Abakobwa 200 biga siyansi beretswe uko bashyira mu bikorwa ayo masomo

Yanditswe kuya 1-11-2016 saa 12:20' na Tombola Felicie


Abakobwa 200 biga Siyansi n’Ikoranabuhanga baturutse mu bigo 10 by’amashuri yisumbuye hirya no hino mu gihugu basuye inganda n’ibigo bitandukanye hagamijwe kubatinyura no kubereka uko amasomo biga ashyirwa mu bikorwa.

Ni igikorwa cyateguwe n’abagore 22 bibumbiye mu Ihuriro Nyarwanda ribarizwamo abagore n’abakobwa b’abanyamwuga mu bijyanye na Siyansi, Ikoranabuhanga, iby’ubwubatsi n’ubugeni ndetse n’imibare (Techwomen Rwanda), bagize amahirwe yo kujya muri Amerika guhugurirwa mu bigo bikomeye ariko biyoborwa n’abagore.

Abitabira aya mahugurwa iyo basubiye mu bihugu byabo bareba icyo bashobora gufasha abandi bagore n’abakobwa.

Abo mu Rwanda bafashe icyemezo cyo kujya mu mashuri yisumbuye bakereka abana b’abakobwa biga Siyansi n’Ikoranabuhanga ko ibyo biga bishoboka ndetse bagomba kubyiga babikunze kuko bikenerwa henshi.

Ubwo kuri uyu wa Mbere, tariki ya 31 Ukwakira 2016, abanyeshuri 200 batemberezwaga mu nganda ngo barebe ubutabire, ikoranabuhanga, imibare n’ibindi biga uko bikoreshwa bibyazwa umusaruro mu buryo bufatika, Marie Claire Murekatete umwe mu bagize iri huriro Techwomen Rwanda ryateguye iki gikorwa yasabye abo bakobwa kwigirira icyizere.

Ati “Ndabasaba kwigirira icyizere, mwabonye ko mu nganda abakobwa n’abagore bakoramo ari bake kuko Siyansi n’Ikoranabuhanga batabishishikarizwaga. Mwebwe rero kuko mumenye neza hakiri kare ko ibyo mwiga mu Butabire, Imibare n’Ikoranabuhanga bikoreshwa mu nganda n’ahandi hatandukanye mubishyiremo umwete atari ugupfa kwiga gusa. Icyo musabwa ni ugutekereza icyagirira akamaro igihugu namwe kibateza imbere noneho mwarangiza mukagishyira mu bikorwa.”

Yakomeje avuga ko ikindi bagambiriye ari ukugira ngo abo bana b’abakobwa babigireho bajye batekereza ko hari abagore n’abakobwa babishoboye.

Ati “Ikindi dushaka ni ukugira ngo aba bana b’abakobwa babyiruka batugire inshuti zabo, batwigireho ,bumve ko nubwo biga ikoranabuhanga na siyansi natwe nka bakuru babo twabigezeho bityo na bo bagire umwete.”

Dusingizima Margaret, umunyeshuri mu ishuri rya Siyansi rya Musanze ngo kuri we yiyunguye ubumenyi buzatuma arushaho gukunda ibyo yiga.

Ati “Hari ubwo twigaga nk’Ubutabire cyangwa Ubugenge nkumva ko ari ukubyiga gusa ariko nyuma yo kubona uburyo amavuta yo kwisiga dukenera akorwamo babyifashishije narushijeho kubiha agaciro gakomeye kurenza uko nabifataga.”

Umutesi Yvette we yiga ibijyanye n’amashanyarazi mu ishuri rya TCC Nyamata ngo kuri we uru rugendo ni intangiriro yo gushyira imbaraga mu byo akora.

Iyi gahunda yo gufasha abakobwa yatangiye ari ukubasanga ku bigo bigamo bitandukanye, igice cya kabiri kwari ukubatembereza mu nganda n’ibigo bikomeye izasozwa muri uku kwezi mu mwiherero uzabahuza bakamurika imishinga bakoze yahindura ubuzima maze iya mbere igahembwa.

Aba bakobwa basuye uruganda rwa Sulfo, ibigo birimo Sahasra, KLab, Fablab n’ahandi.

Buri mwaka abagore batanu bize siyansi n’ikoranabuhanga muri buri gihugu bagira amahirwe yo kumara ibyumweru bitanu muri Amerika basura inganda n’ibigo bikomeye muri gahunda y’Ishami rishinzwe ibijyanye n’Uburezi n’Umuco muri Leta Zunze Ubumwe za Amerika.

Mu Rwanda abagore batangiye kwitabira iyi gahunda muri 2013 ubu bamaze kugera kuri 22 bahawe ayo mahirwe yo gusura inganda n’ibigo bikomeye byo muri Amerika.

Abanyeshuri baturutse mu bigo bitandukanye hamwe n'abari mu ihuriro Techwomen Rwanda
Abakobwa biga ikoranabuhanga beretswe ibikoresho bigezweho muri FABLAB
Gahongayire Anathole, umwe mu bahagarariye abagore bari mu ihuriro Techwomen Rwanda
Murekatete Marie Claire wari uhagarariye abagize ihuriro Techwomen Rwanda
Ubumenyi biga mu ishuri nibwo bukoreshwa mu nganda mu gutunganya amavuta
Beretswe uko ibikoresho nk'amacupa bikorwa
Abanyeshuri berekwa uko laboratwari zikoreshwa basuzuma ibikoresho byakozwe
Basobanurirwa imikorere ya KLab
Bareba uko imashini zo mu nganda zikora

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved