Abakibaswe n’amateka mabi tubamaganire kure be gukomeza kutwanduriza abana-Mukabalisa

Yanditswe na Kanamugire Emmanuel
Kuya 1 Ukwakira 2016 saa 06:40
Yasuwe :
0 0

Perezida w’Inteko Ishinga Amategeko, Umutwe w’Abadepite, Donathille Mukabalisa asanga hari bamwe mu Banyarwanda bakigoswe n’amateka mabi ashingiye ku moko n’urwango u Rwanda rwanyuzemo bakwiye kwegerwa bakigishwa,bakwanga kumva bakamaganirwa kure ngo batazanduza abakibyiruka.

Mukabalisa yifatanyije n’abayobozi batandukanye n’abaturage mu muganda udasanzwe w’Ubumwe n’Ubwiyunge bakoreye mu murenge wa Nyamirambo, ku wa Gatandatu tariki ya 1 Ukwakira 2016, aho bubakiye inzu n’akarima k’igikoni umuturage utishoboye warokotse Jenoside yakorewe Abatutsi.

Yasabye abaturage gukomera ku bumwe n’ubwiyunge bw’Abanyarwanda kandi bagakomeza kubuteza imbere kuko bwabonetse hari bamwe mu Banyarwanda babwitangiye, mu rugamba rwo kubohora igihugu no guhagarika Jenoside.

Muri rusange ngo ubwo bumwe bwagezweho nk’uko bigaragazwa n’ubushakashatsi bwakozwe na Komisiyo y’Igihugu y’Ubumwe n’Ubwiyunge ku gipimo cy’uko buhagaze mu banyarwanda bwerekanye ko buri kuri 92.5% mu gihe mu myaka itanu ishize bwari kuri 83.2%.

Abaturage aho bari hose mu Rwanda basabwe kwitabira ibikorwa biteganyijwe muri icyi cyumweru cyane kwegera abakibaswe n’amateka mabi yaranze u Rwanda, bagomba kwegerwa ngo bahinduke.

Mukabalisa ati “Muzitabire ibiganiro abantu bahure basuzumire hamwe inzitizi bagihura nazo mu rugendo rw’ubumwe n’ubwiyunge, kuko turacyari mu rugendo, ntabwo turagera aho twifuza.”

Yongeyeho ati “Abantu bafatanyirize hamwe bashake ibisubizo kuri izo nzitizi, bakebure abantu bakigoswe n’amateka mabi twanyuzemo, abo ayo mateka yagize imbata, batari batera intambwe yo kugira ngo bahindure imitekerereze yabo.”

Abagifite iyo mvumvire ngo ntibashobora kuyobekana kuko ngo baba bari mu baturage kandi ngo baba baziranye hagati yabo.

Ati “Tuba tubazi, turi kumwe ahangaha, buri wese aba azi abo bantu. Dukwiye kubakangurira kutaraga abana bacu amacakubiri, tubamaganire kure be gukomeza kutwanduriza urubyiruko.”

Mukabalisa kandi yatunze urutoki uturere twagaragajwe n’iyo raporo ko turimo abaturage bakibona mu ndorerwamo y’amoko, nk’aho muri Nyarugenge bari ku gipimo cya 70%, mu gihe abagifite ingengabitekerezo ya Jenoside ari 59%.

Perezida wa Komisiyo y’Igihugu y’Ubumwe n’Ubwiyunge, Musenyeri Rucyahana John yavuze ko nubwo bumaze kugera ku kigero cyiza, hari izindi mbaraga zisabwa ngo kigere ku gipimo cya 100%, kuko amacakubiri yagejeje u Rwanda ku icuraburindi ryatumye hatangirwa inzira y’ubumwe n’ubwiyunge ngo ryigishijwe igihe kinini, ni ukuvuga kuva ku mwaduko w’abazungu mu Rwanda ndetse no kuri repubulika ya mbere n’iya kabiri.

Gutangiza iki cyumweru byakozwe ku nshuro ya cyenda, uyu mwaka mu gihugu hose hakaba hakozwe umuganda ku rwego rw’akagari.

Depite Mukabalisa, Musenyeri Rucyahana ma Meya Mukaruliza mu muganda
Depite Mukabalisa na Christine babiba umurama w'imboga
Gen Mubarak mu bifatanyije n'abaturage b'Akarere ka Nyarugenge mu gikorwa cy'umuganda
Depite Mukabalisa bashyira ibuye ry'ifatizo ku nzu yubakirwa uwarokotse Jenoside
Gen. Muganga mu gikorwa cyo kubaka
Musenyeri Rucyahana avuga ko hari byinshi byagezweho mu bumwe n'ubwiyunge
Musenyeri Rucyahana aganira n'itangazamakuru
Mukabalisa ageza ubutumwa ku baturage
Umuturage uri kubakirwa inzu yashimye iki gikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza